—¿Añu karana 'ën an? ¿Uisa ñu 'atima karana 'ën an? ¿Añu 'ai 'ëx ami 'uchakë kara min papan 'ë 'akatsi kixun barin? 2 Kixuan kakëxun ka Jonatánnën kakëxa:

—¡Diosan ka mia 'ati kuëëntima 'ikën! ¡'Ën papan ka mi 'aisatania 'aínbi ka mi 'atima 'ikën! Min kamina 'unánti 'ain, 'ën papan ka añu ñubi 'atima 'ikë, an ka añu kara 'aisa tania axira cha 'ixunbi 'ë kaia. ¿Uisa kupín kara 'ën papan ësakian mi 'akë ënë 'ë ñuixuntima 'ik? ¡Usa ka 'itima 'ikën! 3 Kakëxunbi ka Davidnën munuma banakin katëkëankëxa:

—Min papan ka upíokin minmi 'ë 'itsaira nuibatia 'unánxa, usa 'ain ka min 'unánkimi an 'aisa tankë ñu a kuëënxuntima kuëënia. ¡'Aínbi kana uisaxunbi sinanatima okin Nukën 'Ibun kuamainunbi mi kain, 'ëx kana bamati 'uramashi 'ain! 4 Usakin kakëxunbi ka Jonatánnën ñukákin kakëxa:

—¿Añu ñuira mi 'axúnti kaina kuëënin? 5 Kakëxun ka Davidtan kakëxa:

—Ka kuat, imë́ishi ka 'uxë ió 'ikëbëtan fiesta 'aia, usa 'ain kana 'apubëtan pinux anu 'iti 'ain. Usa 'aínbi kana 'ëx anu 'itima 'ain, kamina imë́ishi 'ibaitia pë́karakë a xupibutamainun unë́tanun 'ë xuti aín, 6 usa 'ain kamina min papan 'ë ñukákëxun, 'ën kana mi bënë́kiani 'ën ëma Belénnu kuanuxun mi ñukan kixun kati 'ain, anuxun ka 'ën aintsikaman baritia 'ikëtibi 'akësokin ñuina xaroia anu kana kuan kixun kamina kati 'ain. 7 Ësokin kakëxua mi asábi ka kixun kakë ax ka asábi 'iti 'ikën; 'aínbia min kakëx nishkëbëtan kamina 'unánti 'ain, an ka 'ë 'atimoti sinanx ka usai 'ia kixun. 8 Usa 'ain kamina 'ën mi kamainun usakin 'ati 'ain, 'ëx kana an mi ñu mëëxunkë uni 'ain, 'imainun kananuna Nukën 'Ibun ismainun nux manutibi sinanatëkëntima oi nuibanankatsi kian. Usa 'ain kamina 'atimokin ñu 'aia minbi 'ë 'ati 'ain. Usa 'ain kamina min papanu 'ë buánti sinántima aín. 9 Kakëxun ka Jonatánnën kakëxa:

—¡Usakin kamina sinántima 'ain! 'Ën papan 'atimokin mimi sinania 'unánkin kana 'ën mi kati 'ain. 10 Kakëxun ka Davidtan ribi ñukákëxa:

—¿Uin kara min papan 'ë 'atimokatsi kixun mi kakëbëtan 'ë kati 'ik? 11 Kakëxunbi ka Jonatánnën kakëxa:

—'Ëbë kamina 'urinu kuanun uti 'ain. Kabiani ka a rabëtaxi 'uri kuani kuankëxa, 12 kuanxun ka anuxun Jonatánnën David kakëxa:

—'Ën kana sinanakinma Israel unikaman Nukën 'Ibu Diosan ismainun mi kain, 'ën papa kana imë́ishi 'ibaikë a pëkarakëbëtan ënë horanbi, uisa mi oti kara sinania kixun ñukati 'ain. An kara mi upioti sinania kara mi 'atima oti sinania ñukátankëxun kana an mi kati xuti 'ain; 13 'aínbi kana 'ën papan mi 'atima oti sinántëkënkëbëtan 'ën mi abátanun kanan upitaxmi kuantanun 'akiniama Nukën 'Ibun uisakin kara 'aisa tania, usakin 'ë 'atima oti 'ikën. ¡Usa 'ain ka Nukën 'Ibun mi 'akinti 'ikën 'ën papa 'akiansaribi okin! 14 'Ëx bamakëmapain 'aish tsókë 'ixun kana usakin mi 'ain, usa 'ain kamina Nukën 'Ibun mi nuibakin 'akinkë usaribi okin 'ë nuibati 'ikën. Usa 'ain kamina 'ëx bamakëbëtan, 15-16 'ën aintsikama uínsaranbi nuibati ëntima 'ain. ¡Nukën 'Ibun ka axa mimi nishkë unikama atun ñu 'atima 'akë 'aíma 'itánun këñuti 'ikën! Ësai kikin ka Jonatán 'imainun Davidtan uisaxi sinanatëkëntima oi mënionankëxa, 17 ësai ka Jonatán 'itsaira David nuibakë 'ixun, ax 'ikësabiokin nuibakin bërúain, amiribishi uisaxi sinanatëkëntima oi kítëkëankëxa. 18 Ësakin katankëxun ka Jonatánnën kakëxa:

—Imë́ishi ka 'uxë ió 'ikëbëtan fiesta 'aia, usa 'ain ka anu mix tsóti anu tsókëma, mi oi uinu karaisamina 'ai kiax ñukákananti 'ikën. 19 Usa 'aínbi ka rabë́ 'imainun achúshi nëtë 'inukëbëtan mi ëmanua 'aíma oi atian ira uinu karaisamina kuan kiax kikanti 'ikën. Usa 'ain kamina kuantankëx anumi nëtë itsin unëkë anubi unëti 'ain, unë́ti kamina maxá chaiirabu ami katamëti 'ain. 20 'Ën kana achúshi 'imainun rabë́ pia anumi unëkë au okin uisa okinra karana pia nikin ñuina 'ati 'ai tankin 'atankëxun, 21 kana an 'ë ñu mëëxunkë uni kati 'ain: 'ën nikë pia kamina barikin biti 'ai 'urama ka nipakëaxa kixun kati 'ain. 'Ën kaia kuati kamina chuámashirua chikiti 'ain, ax ka mix uisaibi 'itima 'ikën. Nukën 'Ibun ka mi asérabi 'akinti 'ikën. 22 'Aínbi kamina 'ën karana uisokin kai kuati 'ain: Karana piakama ka 'uri nikëx pakëaxa kixun mi kain, ax ka Nukën 'Ibun ka mix kuanti kuëënkë 'ikën. 23 Usa 'aínbi ka nu rabëtax kikë bana ax Nukën 'Ibun 'unánkë 'aish uínsaranbi manukinma ñuikë 'iti 'ikën.

24 Ësai kanantakëx ka David unëakëxa, unëan ka 'uxë ió 'iti nëtë sënë́nkëbë fiesta 'akin pinux 'apu aín mesanu tsóbuakëxa. 25 Usai 'ika ax 'ikësabi chikëmi këpiti tsóakëxa. Tsómainun ka Jonatán Abner bëtánain Saúl rapasu tsóbuakëxa. Tsóbukëbë ka anua David tsókë ax ñankáishi anu uíxbi tsókëma 'iakëxa. 26 A nëtën ka Saúl uisaibi kiama 'ikën, an ka sinánkëxa David sapi ka ñu 'atima 'axa, usa 'aish ka upiti mëniókakëmapan 'ikë kixun.

27 'Aínbi ka anua fiesta 'ati nëtë pëkaratëkënkë anun anua David tsókë ax usabi anu tsókëma 'itëkëankëxa. Usa iskin ka Saúlnën aín bakë bëchikë Jonatán ñukákëxa:

—¿Uisai 'iax kara Jesénën bakë bëchikë David piima 'iónxbi bërí nëtënribi ukëma 'ik? 28 Ësokin kakëxun ka Jonatánnën kakëxa:

—Davidnën ka bënë́kiani Belénnu kuankatsi kixun 'ë ñukónxa. 29 Ñukákin ka 'ë koonxa aín aintsikamainsa ñuina xaroia, usa 'ainsa atubëtan fiesta aín ëmanuxun 'ai kuanuinsa aín xukë́n apanën kamiaxa. Usa 'ain ka ënuxun 'akinma aín aintsikama isanan anuxun 'ai kuankatsia kixun ka 'ë konxa. Usa 'aish ka nubëtan pinux tsóbuti ukëma 'ikën 30 Usakin kakëx 'itsaira ami nishkin ka Saúlnën Jonatán kakëxa:

—¡Mix kamina min tita 'atima sinanñunën tuá 'ain, usa 'aish kamina mixribi usarabi 'ain! ¿'Ën karana 'unanima mix kamina Jesénën bakë bëchikë abëira nuibananima kixun, usakinmi 'akë a kupí kara min tita rabintima 'ik? 31 Usa 'ain kamina axa ënë menu tsókëbë mi 'imainun min aintsikama uínsaranbi 'apu 'itima 'ikën. ¡Usa 'ain kamina baribëtsinkin 'ë bëxunun uni xuti 'ain, a kana 'akë istisatanin! 32 Kakëxunbi ka Jonatánnën kakëxa:

—¿Uisa kupí kara ax 'akë 'iti 'ik? ¿Añu 'aisama kara ax bamanuxun 'ax? 33 Kixuan kakëxunbi ka Saúlnën 'ain manë xëtokë bikin anun Jonatán 'akatsi 'iakëxa, usakin 'akëxun ka asérabi ka 'ën papan David 'akatsi kixun kaia kixun 'unánkëxa. 34 Usokin kakëx axribi 'itsaira nishi ka Jonatán mesanuax niruakëxa, usai 'ikin ka masá nuitukin a pëkarakëbëtan fiesta 'akin piti a piama 'ikën, piima ka anuax nirukiani kuanx usakian aín papan David ñuikin ká a sinani 'itsaira masá nuituti nitë́xëakëxa.

35 Usai 'iónkë a pëkarakëbë ka a hora kaintia David koonkë 'ikëbë Jonatán an ñu mëëxunkë uni bëná achúshi buani anua David 'ikë anu kuankëxa, 36 kuanx anu nukuxun ka an ñu mëëxunkë bëná uni a kakëxa:

—'Ën nimainun kamina pia abákianxun barikin biti 'ain. Katankëxun ka an ñu mëmikë uni bëna ax abákiani kuankëbëtan ka Jonatánnën a 'inúmikin 'uri pakëtanun aín pia niakëxa. 37 Nikëbë abákianx anua pia pakëkë anu nirakëtia ka bëna uni a Jonatánnën, munuma kuënkëni banakin kakëxa:

—¡'Ën nikë pia ka mi 'uri pakëaxa! 38 Kakinshi ka amiribishi Jonatánnën munuma kuënkëonkin katëkëankëxa:

—¡Nirakëtima ka bënëtishi abákiantan! Kixuan kakëx abákiani kuanxun bitsínkin ka an ñu mëëxunkë bëná uni an pia bëxúankëxa, 39 'aínbi ka uisa kupí kara usakin 'aia kixun 'unánma 'ikën, 'unánkimabi ka an ñu mëëmikë unían 'ashikin 'akësa sinánkëxa, 'aínbi ka David 'axunkian Jonatánnën 'akë ax 'iakëxa. 40 Usakin 'atankëxun ka Jonatánnën an ñu mëëxunkë bëná uni aín pia ëmanu buaxuntanun kakin 'inánkëx.

41 Usakia kakëxa uni bëna ax kuankëbë ka David maxá chabu 'ikë a kaxú chikíakëxa, chikiti ka Jonatán bëtánain aín bëmána memi bëtiki rantinpuruni achúshi 'imainun rabë́ oi 'iakëxa. Usai 'itankëx ka a rabëtaxi bëtsuku kánani iankëxa, ini ka David intëkëinsamaira oi 'inun iankëxa. 42 Usai 'itankëx sënënia ka Jonatánnën David kakëxa:

—Chuámashi kamina kuanti 'ain, nu rabëtax kananuna amiribishi bëtsiokin sinántëkëntima oi, Nukën 'Ibun ismainunbi kian, 'imainun kananuna nu rabë́a ënxuma 'anun kan, usa 'ain kananuna uínsaranbi ënananima nuibananti 'ain, usa 'ain ka min rëbúnkikama 'akianan 'ën rëbúnki kamaribi 'akinti 'ikën.

Ësokin katankëx ka David kuantamainun Jonatánnëx anuaxa ukë ëmanu kuantëkëankënxa.