Saúlnën 'aisatankëx David abá
21
Usai a rabëtax banai sënë́ntankëx ka David Nob kakë ëma anu tsókë sacerdote Ahimélec kakë abë banai kuankëxa, kuankëbë aín 'ikënuax chikikinbi a mërai ratúkin ka ñukákëxa:—'Apun ka achúshi ñu mëníonun 'ë xuaxa, kixun këmëkin uinbisa uisoti kara 'ë xutia 'unántima 'ikë kiaxa kixun kakëxa, uisa bana kara 'ën bëkë 'ikë aribi unántima 'ikë kiax ka kiakëxa. Usa 'ain kana 'ën nikinkë suntárukama 'ëbë mërananuxa unun kabëtsian. 3 'Aínbi kana panan ira, ¿ñu kaina piti nankëma 'ain? 'Ë kamina mapai achúshi pán 'inánan añu kaina nan a 'ë 'inánti 'ain. 4 Kakëxun ka sacerdotenën kakëxa:
—'Ën nankë pán 'aíshbi ka bëtsi pán kamasama 'ikë, ax ka sacerdote kamananshi 'ikën. 'Aínbi kana min suntárukamaxa xanu aín nami 'aíma a 'urapain 'ikë 'ain mi 'inánti 'ain. 5 Kakëxun ka Davidnën këmëkinma asérabi kakëxa:
—'Ën suntárukamabë 'akanani nitsi kananuna xanun nami 'ai a rapasu 'ima a 'ura 'ian. 'Imainun kananuna nitsi chikiti atun kakësabi oí nitsi tëmërakin suntárukamabë 'aish añu ñubi 'akëma 'ain, usa 'ain kananuna ñu 'atima 'akëma 'aish bërí upí 'ain. 6 Ësokin kakëxun ka sacerdotenën pán upíira nankë a bixun 'inánkëxa, anua bëtsi pán 'aíma 'ain, ax ka Nukën 'Ibu nanxunkë pán 'iakëxa, a bixun ka a nëtënbi anua bikë a mesanu bëtsi pán xana bërí 'akë nankëxa.