3 Kuantankëx ka anua carnero bërúankë unikaman aín ñuina xëpukë a 'urama 'ikë bashi kini anu bëbakëxa, bëbaxka anua David 'ain suntárukamabë unëkë 'aínbi 'unánkëma 'aish. Saúl anu puikatsi kiax kini anu atsíankëxa, 4 usai 'ikëbëtan ka aín suntárukaman David munura baxëxkin ësokin kakëxa:

—Kaina sinanin Nukën 'Ibun ka ax mimi nishkë uni uisakin kaina 'aisatani usakinmi 'anun 'inánti 'ai kixun mi ká bana ka asérabi sënë́anxa. Usa 'ain kamina uisa kaina oisatani usakin bërí 'ati 'ain. Ësokin kakëx a 'itsaira sinanibi ka David ñuitsimarua nirutankëxun, Saúlnën pañukë aín tari kuëbí tanumashi tëakin biakëxa; 5 'aínbi ka usokin 'atankëxbi sinanati 'axumari 'anuma kana 'ia kixun sinánkin, 6 aín suntárukama munura baxëxokin kakëxa: ¡Nukën 'Ibun ka ax 'apu 'ikë uisabi oxuma 'anun 'ë 'amitima 'ikën! ¡Ax ka asérabi 'apu 'ikën! ¡Usaia 'ikë ax ka Nukën 'Ibun usai 'iti kaisa 'ikën! 7 Ësokin kakin ka Davidnën aín suntárukama kananuna uisabi otima 'ai kixun sinánmikin Saúl uisabi omiama 'ikën, usakin uisabi okëxma ka anua atsínkë bashi kini anuax chikíkiani kuankëxa.

8 Kuankëbë a kaxú anua unëkë bashi kini anuax chikíkin, ka munuma kuënkë́nkin kakëxa:

—¡'Ën 'apu 'ën 'ibu! kikëbëtan ka Saúlnën kaxú bësukinbi David aín bëmánanën me tikai tsóbutia isakëxa, 9 usai 'ikin ka kakëxa:

—¿Uisa kupí kaina unikaman paránkin mi isa Davidnën 'akatsi kixun mi baria kixun kakëxun atun bana tankin 'ë barin? 10 Mibi kamina iskë 'itsían, bëría Nukën 'Ibun aín bashi kininu atsínkë mi 'anun 'inánkëxun 'ën 'ati, 'ixunbi kana mi 'aisamatan. Usa 'ixun kana mi uisabi okinma chikimia, mix kamina 'apu 'aish Nukën 'Ibun kaísun 'imikë 'ain kixun 'unánkin. 11 “Min ka upíokin is 'ën 'apu añu karana tuian kixun kakëxa: Ënëx ka min pañukë tari aín kuëbí tukakin 'ën bikë 'ikën, ësokin 'akin kana mi 'akë 'itsían. Usa 'ain kamina 'unánti 'ain 'ën kana mi uisabi oisamatan kixun, 'ianan kana këmëxun mi 'ati kuëënkëma 'ain. 'Aínbi kamina mix 'apu 'ixunbi 'akatsi kixun 'ë barin. 12 ¡Usa 'ain ka Nukën 'Ibun nu rabë́ uisa kara oisatania usokin 'ati 'ikën, 'anan ka uin kara bëtsi 'aisama oisatania a istankëxun! aín 'apu 'ikëbi mi 'anan 'ëribi 'ati 'ikën, 'aíshbi kana 'ëx uínsaranbi mi 'akatsi kitima 'ain. 13 Bërámabi ka uni ësai banai kiakëxa: An ñu 'atima 'akë uni an ka ñu 'atima 'atishi sinania; 'aínbi kana 'ëx usama 'ain, usa 'ixun kana uínsaranbi mi 'akatsi kixun sinántima 'ain. 14 'Imainun kaina ¿Mix Israel unibunën 'apu 'aíshbi kaina uix ukëbë a kaxú 'akatsikiax uan? ¿Ui kara ami 'anuxun nuibëtsinkin barikë ax 'ik? ¡'Ëx karana achúshi 'uchiti bamakësa 'ianan achúshi 'iasaribi 'ain! 15 Usa 'ain ka Nukën 'Ibun ka istankëxun uisa kara oisatania usakin nu rabë́ 'ati 'ikën; ¡'anan ka min 'akatsikixun nuibëtsiniabi 'ë 'akinti 'ikën!”

16 Ësai kitankëx David sënë́nkëbë ka, Saúl munuma banai kiakëxa:

—¡An 'ë usakin kakë mix kamina 'ën piaka David 'ain! Ësokin kaíshi masánuituti inkin, 17 ka kakëxa:

—Mixmi kikë ax ka asérabi 'ikën, 'ën mi 'aisama oti sinánxun 'akëxunbi kamina min 'ë usaribi okin 'atima oti sinánkëma 'ain. 18 Bërí kamina 'ë ismian min kamina 'ëx upitax kuanun 'akinin kixun, Nukën 'Ibun mi uisa kaina oisatani usakin 'anun nankë 'ixunbi kamina 'ë uisabi okëma 'ain. 19 Ax ka asérabi 'ikën, uínbi ka ax ami nishkë uni mërakin usabi 'inun ënima ka uisa oxun kara 'ati 'ikë kixun sinánxun 'aisama oia. Usa 'ain ka Nukën 'Ibun mi upíokin 'akinti 'ikën 'ëmi bërí 'akinkësa ësaribiokin. 20 Bërí kana upíokin 'unanin mixmi Israel kaman 'apu 'ain ka atun min kakësabiokin 'ai upitax bukukanti 'ikën. 21 Usa 'ain kamina uisaxunbi sinántëkëntima okin Nukën 'Ibu anënbi 'ë kati 'ain, 'ën rëbúnkikama këñukin 'atankëxun kaina 'ën aintsin anëkamaribi uínbia atun anë sinántimokin tërënti 'ai kixun.

22 Usakian kakëxun ka Davidnën Saúl sinántëkëntima okin mëníokëxa. Usakin 'akëx ka Saúl aín xubunu kuantamainun David aín suntárukamabëbi anuaxa ukë aín bashi kini anubi kuantëkëankëxa.