—Ënupan ka tsóbuti ut kixun. Kakëx aí ka aín aintsi ax tsóbuakëxa. 2 Tsóbukëbëtan ishi ka Booznën mapai rabë́ uni apanbu a ëmanu 'ikë kuëankëxa, kuënkë́xa aia ka a rapasu tsóbunun kixun kakëxa. Kakë́xa atux tsóbukëbëtan ka 3 Booznën aín aintsi a kakëxa:

—Noimíka Moabnuax utëkëanxa, usa 'ixun ka nun aintsi Elimélec aín me 'ia a maruti sinánxa. 4 'Ën kana ësokin minribimi 'unánun mi kain, min marutisa tankin kamina 'ati 'ain, usa 'ain kana bërí ënë ëmanu 'ikë aín kushibu ënëkaman kuamainunbi mi kain. Mix kamina Elimélecnën aintsi 'ibu 'ain, usa 'ixun kamina min a me marutisa tankin maruti 'ain. Min 'aiama kana 'ën maruti 'ain, usa 'ain kamina 'ën 'unánkë 'inun 'ë kati 'ain, mi 'imainun 'ëxëshi kana a me maruti asábi 'ain. Kakëx ka aín aintsi 'ibu ax kana maruti 'ai kiax kiakëxa. 5 Usai kia ka Booznën ësokin kakëxa:

—'Aínbi kamina 'unánti 'ain Noemí aín me marukin kamina moabita xanu kasunamëkë Rut aribi min xanu 'inun biti 'ain, usakinmi 'akëbë ka axa ñukë uni aín me ax aín anën 'akë 'iti 'ikën. 6 Ësokin kakëxun kuakin ka aín aintsin kakëxa:

—Usa 'ain kana a me marutima 'ain, a me marukin 'ën kuríkinën ñankáishi kupíotima kupí kana bitima 'ain. 'Ën bakë bëchikë kamanbi ka anun 'ën kupíokë kuríki aín kupí bitëkëntima 'ikën. Usa 'ain kamina min marutisa tankin maruti 'ain; 'ën kana minmi 'ën 'akësa 'inunmi marunun mi kain. 7 Bërámabi ka Israelkama bëtsi ñu 'inani usaibi 'ikë 'aish 'iakëxa: usa 'ain ka aín aintsi ainan 'ikë ñu 'inani 'ianan, bëtsi ñu marukin sënë́onxun 'inani 'ianan, ainanbi 'inua a marukë ñu a bëtsi 'inánkin aín taxaka amo 'ikë ëchíkin bëtsi 'inánkëxa, usakin ka atux usai 'ikë 'ixun usabiokin 'akëxa, 8 aín aintsi an ka aín taxaka táchikikin bikin 'inánkin Booz kakëxa:

—Min kamina maruti 'ain. 9 Usakin 'inánkëxun ka Booznën anua 'ikë uni apanbu 'imainun abë 'ikë unikama kakëxa:

—Mitsúnbi kamina 'unánin 'ën kana Noemínën me Elimélec Quilión 'imainun Mahlónën me 'ia a maruti 'ain. 10 'Imainun kana mitsun ismainunbi Rut moabita xanu raëmëkëa aribi 'ën xanu 'iti biti 'ain, usa 'ain ka a me 'ën bikëbë aín bënë Mahlón ñua aínbi aín anë ñunuax nëtë́tima 'ikën, 'ianan ka uisaxunbi ënë ëmanuxun manukë 'itima 'ikën. Bërí kamina mitsúnbi usakin 'aia isin.

11 Ësai kia ka anu 'ikë 'apukama 'imainun anua timë́kë unikama atúnribi kakëxa:

—Usa ka nunbi kananuna 'unanin. ¡Usa 'ain ka min xanu 'iti Rut a Nukën 'Ibun Raquel 'imainun Lía 'asaribiokin 'akinti 'ikën, 'akinkëxun ka 'itsaira tuapakëxa usa 'ain kananuna israel unibu ain rëbúnki nux 'ain! 'Imainun kananuna mixmi bëtsi uni kamasamaira 'ianan upí sinánñu 'ain Efrata kakë 'ikëbi Belén kakë ëma ënu 'iti kuëënin. 12 Usa 'ain ka Nukën 'Ibun a mi bikë xanu ënëmi 'itsaira bakë bëchipanun mi 'amiti 'ikën. Usakin 'imikëbë ka 'aisamaira min aintsikama 'iti 'ikën, Tamarmia Judá kakë uni aín bëchikë Fares ainan 'iásaribiti. 13 Usa 'ain ka anuan biti nëtë sënë́nkëbëtan Booznën aín xanu 'inun Rut biakëxa. Bitankëxa abë 'iaka Nukën 'Ibun tutankëxa bëbu tuá bakënun 'imiakëxa, 'imikëxun ka bëbu achúshiokin tuakëxa.

14 Usakian 'an ka anu 'ikë xanu kaman Noemí kakëxa:

—¡An min baba achúshi mi 'inánkë Nukën 'Ibu ax ka upíokin rabikë 'iti 'ikën, an ka min kani oia atua bërúanti 'ikën! ¡Usa 'ain kananuna min baba ax kara kanitankëx Israel kamanuax uisa uni kara 'iti 'ikë kixun isti 'ain! 15 An ka mi upíokin sinánmianan kaniakëtiabi mi 'akinti 'ikën, min ñexuta Rut aín tuá 'ikën, usa 'ain ka aín ñe 'ikë, an mi nuibakë ax ka mapai achúshi 'imainun rabë́ tuákën 'akësamaira okin mi nuibatia. 16 Usa 'ain ka Noemínën aín baba 'itsaira kuëënkin bikin nuibakëxa, usakin nuibakin bitankëxun ka anbi bërúankin kaniokëxa. 17 Usakin aín baba 'ikúkë Noimí isí ka a 'urama 'ikë xanukamax kiakëxa: ¡Ax ka Noemínën tuá 'ikën! Usa 'ikë ka a rapasu 'ikë xanukaman atúnbi Obed kakin anëxuankëxa a tuakëx ka kanitankëx Jesé aín papa 'iakëxa, 'imainun ka David aín xutókë 'iakëxa.

18 Ënë unikamax ka Fares kakë uni aín rëbúnki 'iakëxa: Fares ax ka Hezrón aín papa 'iakëxa, Ram ax ka Aminadab aín papa 'iakëxa. 19 Hezrón ax ka Ram aín papa 'iakëxa, Ram ax ka Aminadab aín papa 'iakëxa. 20 Aminadab ax ka Nahasón aín papa 'iakëxa, Nahasón ax ka Salmón aín papa 'iakëxa. 21 Salmón ax ka Booz aín papa 'iakëxa, Booz ax ka Obed aín papa 'iakëxa. 22 Obed ax ka Jesé aín papa 'iakëxa, 'imainun ka Jesé ax Davidnën papa 'iakëxa.