—Mix kamina 'ën ñexuta 'ain, usa 'ain kana 'ën achúshi uni min bënë 'iti bitankëxmi abë upiti tsónun barixunti 'ain. 2 Ka kuat, nun aintsi Booz an ñu 'axunkë xanukamabëmi aín naënu tëkë, ax ka bërí xupibukëbë, anuxuan aín trigo bimi aín xo tákanan mëníoti anu kuania. 3 Usa 'ain kamina 'ën mi kakë ësoibi 'iti 'ain:

—Nashitankëx ro sanuira anun 'ianan min chupa upíira pañubiani kamina anu kuanti 'ain. 'Aínbi kamina pianan xëai sënë́nkëma pain 'ikë mia unánun 'unánmitima 'ain. 4 'Aínbi kamina uinu kara 'uxi 'ibútia a upiokinra isti 'ain. Istánkëx munu ñuitsima kuanxun aín taëmiuxun anuan rakukë chupa tabiti a tanain rakabuti 'ain. Usaími rakábukë ka anbi añu kaina 'ati 'ai kixun mi kati 'ikën.

5 Kixuan kakëxun ka Rutnën kakëxa:

—Uisai 'inun kaina 'ë ka usaibi kana 'iti 'ain kixun.

6 Kakëx ka Rut aín ñen kakësabi oi 'ikiani Booznën naënu kuankëxa. 7 Usai 'imainun ka Booznën upí sinánkëshi 'ixun pianan xëakëxa. Usokin 'atankëx ka anu ñu 'apákë aín bimi bixun tsamankin nankë rapasu 'uxi 'ibúakëxa. 'Ibuón ka imë́ naëx Rut ñuitsimaira uxun anúan rakukë chupa aín taëmixun tabitankëx a tanain rakabuakëxa. 8 Usa 'ain ka Booz ain 'uxonkënuax imë́ naëx bësui, kuainakëkinbi aín taëmi xanu rakákë tani ratuakëxa.

9 —Ratúkin ka ¿ui kaina mix 'ain? —kixun Booznën ñukákëxa.

Ñukákëxun ka Rutnën kakëxa:

—'Ëx kana an mi ñu mëëxunti xanu a 'ai kixun kakëxa. Mix kamina 'ën aintsi 'ibu 'ain usa 'ain kamina 'ë 'akinti 'ain. 'Ën kana min xanu 'inun 'ë biti kuëënin.

10 Kakëxun ka —¡Nukën 'Ibun ka! ¡Mi upíokin 'akinti 'ikë! —kixun Booznën kakëxa—. Kanan ka bërí kamina uinsaranbimi min bënë ñukë 'ain usai 'ikëma anun ësai 'ia kixun ka kakëxa. Usa 'ain sapi kamina 'ësama bëná uni barianan ñuñuira barikimabi ñuñuma unibi bariti 'ian. 'Aínbi kamina 'akëma 'ain kixun kakëxa. 11 'Ën kana mi kain, usa aín kamina rakuë́tima 'ain, kamabi 'ën ëmanu tsókë unikaman ka 'unánxa, mix kamina achúshi xanu upí sinánñu 'ai kixun. Usa 'ain kana añu 'anun kaina 'ë kain a mi 'axúnti 'ain. 12 'Aínbi ka asérabi 'ëx min aintsi 'ibu 'aínbi bëtsi min aintsi 'ibuira mi 'urama 'ikë anu 'ikën.

13 Usa 'ain kamina ënë imë́ ënu bërúti 'ain. Imë́ishi ka min aintsi 'ibu 'ixun mi bisatankin biti 'ikën; 'aínbi kana an bitsiama, 'ën mi binuxun Nukën 'Ibun ismainunbi mi kain. Usa 'ain kamina bërí ënubi pëkaratamainun 'uxti 'ain.

14 Usakian kakëx ka a imë́ Booznën taëmiu 'uxi rakabuakëxa. Usaia 'ikë a pëkarati xabakuatsini pëkara iratisama 'aínshi niruax ka Booznëan usai 'inun kónkësabi oi kuankëxa: 'Aínbi ka ënë xanu ka naënu kuanxa kixun uínbi 'unántima 'ikë kixun kakësabi oi 'iakëxa.

15 Usa 'ain ka Booznën kakëxa:

—Min chupa anunmi rakukë a bikin kamina upíokin rëtëkërë kati 'ain. Kakëxuan rëtëkërë kaxun Rutnën tuinmainun ka cebada cuarenta kilo inumikin 'aruxuankëxa. 'Aruxun papimikëx a buani anuaxa ukë ëmanu kuankëxa.

16 Kuanxa anua 'ikë anubi bëbaia ka aín ñen Rut ñukákëxa:

—¿'Ën ñe xuta uisa kara anumi kuankë anu 'iax? Kixuan ñukákëxun ka Rutnën usaía 'ikëkama ñuixuanan usakian Booznën 'akë kamabi ñuixuankëxa, 17 kanan ka ënë cebada kama 'inánkin 'ë kaxa:

—Ñu uanima mëkëinshi kuanx kamina min ñenu bëbatima 'ain.

18 Ësakian ñuixunkëxun ka aín ñe Noemínën kakëxa:

—'Ën ñexuta bërí kamina uisakin kara a unin mi 'aia isti 'ain. Ënë ñu ka usa 'iti 'ikë kixun mibëtan mëníokëma 'ixun a unin bërí upíokin sinántima 'ikën.