2 Sorá kakë ëma anua Dannën rëbúnkinën me 'ikë anu ka achúshi uni Manoa kakë 'iakëxa. Aín xanu ax ka uínsaranbi tuama 'iakëxa. 3 'Aínbi ka achúshi nëtën Nukën 'Ibun ángelnën ami mërakin kakëxa: Mix kamina uínsaranbi tuakëma xanu 'ain, usa 'aínbi kamina bërí tutankëx achúshi bëbu tuá bakënti 'ain. 4 Usa 'ain kamina uvas baka xëanan uisa ñu paë batabi xëatima 'ain, 'anan kamina a pikëma ñu a pitima 'ain, 5 ësokin kamina 'ati 'ain, ami bakënti tuá ax ka Diosan uni achúshi 'ikën kixun unikaman 'unánun ka kania uínbi ain bu tëatima 'ikën, an pain ka filisteo unikaman 'atima oia israel unibu 'akinti 'ikën, ainanshi 'inun ka Diosan bakënkë 'ikëmabi kaisaxa.

6 Usokin kakëx kuanxun ka xanun aín bënë ñuixunkin kakëxa: Achúshi Diosan uni ka anu 'ëx 'ikënu uaxa, anuxun ka ënkinma 'ë kaxa, kakëxun iskëxbi ka Nukën 'Ibun ángel iskësa 'iaxa. Usa 'ikë kana uikara ax 'ikë kixun ñukákëma 'ain, anbi ka ui uni kara ax 'ikë kixun 'ë kakëma 'ikën. 7 'Aínbi ka ësokinshi 'ë kaxa: 'Ëx isana achúshi bëbu tuáñu 'iti 'ai kixun, kanan ka uvas baka vino 'akë paëkë abi xëaxunma 'anan a pitima ñu pixunma 'anun 'ë kaxa, a tuakëxisa Diosnanshi 'iti 'ikën, 'ianan isa a bakënkëma 'ikë kaísa 'ixun ain bamati nëtë utamainun 'akinti 'ikë kixun ka 'ë kaxa. 8 Ësokian aín xanun ñuixunkë 'ixun ka Manoanën abë banakin Nukën 'Ibu kakëxa: 'Ën kana mi kain 'ën 'Ibu amiribishi kamina ami xukë min uni a nunu xutëkënti 'ain, uisokin karana ax bakënti tuá axa bakënkëbëtan 'ati 'ai kixun 'unánun nu kai unun.

9 Ësokian Manoanën ñukákëxun ka Diosan kuakëxa, kuaxun ka aín ángel achúshi xukëx kuanx ka aín xanua naënu 'ain ami mëratëkëankëxa. 'Aínbi ka ain bënë Manoa abëma 'iakëxa, 10 usai ami mërakëxun ka abákiani kuanxun ain bënë kakëxa:

—¡Ka kuat, axa bëtsi nëtën 'ëmi mëraëxankë uni ax ka amiribishi 'utëkëanxa kamina isi kuanti 'ain!

11 Ësokian aín xanun kakëx ka bënëtishi nirukiani Manoa aín xanubë kuanxun uni anubi nikë mërakin kakëxa:

—¿Mix kaina axa 'ën xanubë bëtsi nëtën banaëxankë uni a 'ain? Kakëxun ka unin kakëxa, 'ëx kana a 'ain. 12 Ësokin kakëxun ka Manoanën kakëxa: Minmi nu kakë usaibi 'ikëbëtan, ¿karana uisokin a tuá kanioti 'ain? ¿uisa karanuna a tuá oti 'ain?

13 Kakëxun ka Nukën 'Ibun ángelnën ësokin kakëxa:

—Min xanun ka añu 'anun karana 'ën kan usakinbi 'ati 'ikën: 14 'akin ka uvas baka 'akë vino a xëanan bëtsi 'inun uvas baka bëtsiokin paëokë a xëatima 'ikën, 'anan ka a pitima ñu 'atima a pitima 'ikën. Usakin bëtsi ñu 'akinma ka 'ën 'anun kakë usakinshi 'ati 'ikën.

15-16 A unix ka Diosan ángel 'ikë kixun 'unánkinmabi ka Manoanën ësokin kakëxa:

—Mi kuanun kamina 'ën cabra bëna achúshi rëtankëxun piti 'arumimainun kaínti 'ain. Kixun kakëxunbi ka Nukën 'Ibun ángelnën kakëxa:

—'Ëx tikixunbi kana minmi 'amikë piti mibëtan pitima 'ain. Usa 'aínbi kamina min cabra bëna a rëtankëxun Nukën 'Ibu upíokin xaroxunti 'ain.

17 Usakian kakëxun ka Manoanën Diosan ángel kakëxa:

—'Ë kamina uisokin anëkë kaina mix 'ai kixun kati 'ain, nun kananuna min nu kakë bana usai 'ikëbëtan asérabi ka an nu kakësabi oi 'iaxa kixun sinánti 'ain. 18 Kiabi ka ángelnën kakëxa:

—¿Uisoti kaina 'ën anë unántisa tanin? 'Ën anëx ka uínbi 'unántisama 'aish upíira 'ikën. 19 Usokian kakëx kuanxun ka Manoanën ain cabrito bëna bianan akëñuan 'ati ñu bimikama bitankëxun mapara kamanan nanxun Nukën 'Ibu 'aímai këñutanun xaroxuankëxa. Usokin 'akë ka Nukën 'Ibun Manoa 'imainun ain xanu an iskëma ñu upíira 'axuankëxa: 20 'axunkëbëa tsi rëkirui rëarukësa a nëbë́tsia anun Nukën 'Ibun ángel naínu kuania ka Manoa 'imainun ain xanun isakëxa. Usai 'ia isi ka rabëtaxbi aín bëmánanën me tikai tsóbuakëxa. 21 Usai 'ia iskin ka Manoanën sinánkëxa a unix ka asérabi Nukën 'Ibun ángel 'iaxa kixun, usai 'itankëx ka amiribishi ami mëranan ain xanumiribi mërátëkëama 'ikën; 22 usai 'ian ka aín xanun ësokin kakëxa: Bërí sapi kananuna nu rabë́ ñuti 'ain, nun kananuna asérabi Dios isan. 23 Kiabi ka aín xanun kakëxa:

—Nukën 'Ibun nu bamamisa tankin ka nunnu a xaroxunkë ñukama 'imainun a 'inainshiti 'akë ñukama upí isanan ënë ñukama nu ismikë 'itsianma, 'imainun ka ënë banakamaribi nu ñuixunkëma 'itsianma.

24 Usakian kakëx tutankëx ka aín nëtë sënë́nkëbë achúshi bëbu tuá bakë́ankëxa, bakënxun ka Sansón kakin anëakëxa. Anëkëx kania ka Nukën 'Ibun a tuá upíokin sinánxukin nuibakin 'akiankëxa. 25 Achúshi nëtën ka Sansón anua Dan kakë unikama bukukë Sorá 'imainun Estaol kakë ëma anuxunbi, Nukën 'Ibun bëru ñunshinan añu kara 'ati 'ikë kixun ismiakëxa.