Moisés ñukë mainkan bana
34
Ësokin pain atu kakin sënë́ontankëx ka Moisés, anu uni 'ikëma me Moab kakë anua 'ikë Nebo kakë aín bashi rëbu, Pisgá Jericó ëma 'ukëmanan 'ikë anu mapërakëakëxa. Anuxun ka Nukën 'Ibun anu sënënia Galaad kakë me a këñunbia anua Dannën rëbúnki kaman me 'iti aribia isnun ismiakëxa, 2 ismianan ka anua Neftalí, Efraín, 'imainun Manasés a kaman rëbúnkinën me 'iti a 'imainun kamabi Judánën rëbúnki kaman me 'iti anubi sënë́onkin parúmpapa Mediterráneo kakë a këñunbi ismiakëxa, 3 ismianan ka Négueb, 'ianan Jordán kakë baka, 'imainun Jericó ëman bëararakë me sapan anua xëbin 'apákësa kian sënënakëkë Sóar ëma 'ikë akamabi isnun ismiakëxa. 4 Ismikin ka Nukën 'Ibun ësokin kakëxa: Ënë mekama ñuikin kana 'ën min chaitiokë Abraham, Isaac 'imainun Jacob akama kakën, a me kama kana min rëbúnki 'inánuxun 'ain kixun. Usa 'ain kana anu bëbanuxumabi min bërúnbi isti 'ën kuëëan.5 Usa 'ain ka Moisés Diosan uni ax Moab kakë me anuax Nukën 'Ibun kakësabi oi ñuakëxa. 6 Ñuia ka a menubi Nukën 'Ibu Diosanbi Moab kakë me 'ukëmanan 'ikë Bet-peor anu maíankëxa, usa 'ikë ka bërí nëtënbi uinu 'ikë unínbi anua maían me a 'unánkëma 'ikën. 7 Moisésnëx ka ciento veinte baritiañu 'aish ñuakëxa; usa 'aish ka aín ñuti nëtë sënë́ntamainun kaniakëtibi 'insínkëma 'ixun aín nami paë tanima 'ianan aín bërumi ñukëma 'ixun upíokin iskë pain 'iakëxa.
8 Usai 'ian ka israel unikama Moisés bënini ini achúshi 'uxë 'imi anu uni 'ikëma me Moab kakë anuax rarumakëxa, usai 'i ka a nëtëkama sënë́mi Moisés ñukë 'ain masá nuituti nitë́xëti inkankëxa. 9 'Imainun ka Diosan Moisés kakësabi oi Nunnën bëchikë Josué a ain maxkánu aín mëkën nankin Moisésnën aín sinan 'inánkë 'iakëxa. Usa 'ikë ka Israel unibunën aín bana kuakin Moisés Nukën 'Ibun kásabiokin Israel unikaman Josuénën bana tankëxa.
10 Usa 'aínbi ka uínsaranbi Israel menu bëtsi an Nukën 'Ibu kikë bana uni ñuixunkë axa Moisés 'ikësaribiti aín 'Ibubë aín 'unánkë unibë uni banakësai 'ikë 'aíma 'iakëxa, 11 'ianan ka Nukën 'Ibun 'amikëxun an Egipto menuxun unin 'akëma ñu 'akin faraón 'imainun, an ñu 'axunkë aín unikama 'imainun kamabi a menu 'ikë unikama isnun Moisésnën 'asaribiokin 'akë uni 'aíma 'iakëxa, 12 'imainun ka Diosan aín kushin 'amikëxun Moisésnën 'asaribiokin an kamabi Israel unibunën ismainunbi ñu chabuira 'akin an atu ismikë uni 'aíma 'iakëxa.