Israelnën rëbúnkikama an kakëxun kuaisama tanxbi ami sinanatëkënia Diosan 'akian bana
30
Uínsaran kara: 'Ën mitsu ñuixunkësabi oi upí ñu 'ianan 'aisama ñu 'ia Dios kikësabi oí 'ia, anun kamina uinu 'ikë menu kara mitsumi nishkë unikaman mitsu buania a menuxun kamina ënë banakama sinánti 'ain, 2 sinánkin atun dios mitsu rabikë a ënkin kamina min nuitubëtanbi sinánkin ax kuëënkësa okinshi 'aia ka Nukën 'Ibun mitsun bakë bëchikë këñunbi 'ën bërí mitsu kakë ësokinbi 'akinti 'ikën, 3 usokinmi 'aia ka Diosan mitsu 'atima oxunbi mëníokin nuibati 'ikën. Nuibakin ka amiribishi anua bëtsi menu 'ikë unikaman bëa me anubi mitsu buántëkënti 'ikën, 4 'imainun ka ami nishkë unikaman uinu 'ikë menubi kara uankëx amanu amanu kuankë 'ikëbi anuabi Nukën 'Ibu Diosan mitsun aintsikama 'ain menubi unun 'imiti 'ikën. 5 Usakin 'akin ka amiribishi Nukën 'Ibun anua nun chaitiokëkama tsóa me abia atunan 'inun bitëkënun anu buánti 'ikën; anuxun ka upitax bukukin 'ain chaitiokë kaman anuxun 'asamaira okin 'aisamaira bakë bëchipanun 'imiti 'ikë kixun ka kakëxa. 6 Usa 'ain ka Diosan mitsun nuitu mëníokin sinánmianan mitsun bakë bëchikëkamaribi 'ati 'ikën, an ka aín bana 'unámianan uisakin karamina mitsun a asérabi nuibati 'ai kixun 'unánmiti 'ikën usa 'ain ka a aín nuitubëtanbi sinánkin a menu atux upitax 'itsa bari 'imi tsóti 'ikën. 7 Usa 'ain ka Diosan mitsun rëbúnki kamami nishkë unikamaxa tëmërai 'inun 'ën bërí mitsu kakë ësai tsónun 'imiti 'ikën, 8 usai atux tëmërai tsómainun kamina mitsun Nukën 'Ibumi sinánkin ax kikësabiokin 'anan, ax kikësabira oi 'iti bana 'ën bërí mitsu kakë ënë tanti 'ain. 9 Usakin 'aia ka Nukën 'Ibu kamabi ñuñuira 'inun mitsu 'imianan, mitsun bakë bëchikëkama 'ianan atun 'arakakë ñuinanën tuákama 'imainun atun 'apákë ñukama 'itsaira 'inun 'imiti 'ikën; usakin 'aia isi kuëënkin ka mitsun chaitiokëkama asaribi okin Diosan mitsu 'akinti 'ikën, 10 'aínbi ka asérabi Dios kikësabira oi 'iti bana 'imainun a tanti bana anbia kuënëonun 'amikëxun 'ën kuënëo ënë tankin, ax kikësabiokin aín nuitubëtanbi sinánkin 'ati 'ikën.11 'Ën bërí mitsu ñuixunkë ax kikësabira oi 'iti bana ënëx ka mitsunan, tëirama 'ianan ax kikësabiokin mitsun 'aisabi 'ikën. 12 Ënë banax ka naínuma 'ikën, mitsúxmi ësokin sinani ësai kinuma: ¿Uin kara naínu kuantankëx uxun ënë bana kikësabiokin kananuna 'ati 'ai kixun 'unámikin nu kati 'ik? 13 'Imainun ka a banax parúmpapa 'ukëmanan 'ikën, mitsux ësai kinuma: ¿Uin kara parúmpapa sikarakëtankëxun 'unánbëtsini uxun ënë bana kikësabiokin kananuna 'ati 'ai kixun 'unánmikin nu kati 'ik? 14 Usamaka ax kikësabira oí 'iti bana a kamina mitsun upíira okin 'unanin, usa 'aish ka a banax ax kikësabiokin mitsun 'ati asábi 'ikën.
15 Ka kuat, bërí kamina kuati 'ain, 'ën kana añu karamina 'ati 'ai kixun mitsu kaiman, 'aínbi kamina uisai kaina bukuti 'ai kixun isanan, uisa upí ñu 'ai kaina upiti tsóti 'ai isanan uisa ñu 'ai kaina mitsúxbi ñuti 'ain kixun 'unánti 'ain. 16 'Ën bërí mitsu kakë ësokin 'akinmi a nuibati ami katamëkin ax kikësabira oi 'iti bana 'ianan a tanti bana kikësabi 'ia ka Diosan bakë bëchipatimi tsónun mitsu 'imiti 'ikën, 'imainun ka anumi mitsux tsóti me anu tsotia mitsu upíokin sinánxunti 'ikën. 17 'Aínbi kamina mitsun 'ën kakë banakama ënë kuatima, bëtsi dioskama rabi rantinpuruni ami 'ikin rabiti sinántima 'ain, 18 bëríbi kana 'ën mitsu ësokin kain ax mimi nishkë unikaman ka asérabi mitsu 'ati 'ikën, 'akëx kamina 'itsa baritiaira tsótima Jordán kakë baka shitátankëxunmi bikë me anu tsókantima 'ain. 19 Ënë nëtën kana bërí mitsu kain naí 'imainun men ka unin kuankësa okin 'ën mitsu kaia kuanti 'ikën, 'aínbi ka a menu tsókë unikamax këñuti 'ikën, usa 'ain ka upíokin sinánxunkë 'imainun 'atima okin sinánxunkë 'iti 'ikën, usa 'ain kamina uisai kaina mitsux tsóti 'ai isanan uisa ñu 'ai kara mitsun rëbúnkikama tsóti 'ikë kixun kati 'ain; 20 usa 'ain kamina Nukën 'Ibu Dios nuibati ami katamëkin ax kikësabiokin 'ati 'ain, usakin 'ai kamina 'itsa baritia a me 'inánnuxua sinanatëkëntima okin Nukën 'Ibun nun chaitiokë Abraham Isaac 'imainun Jacob ka a menu 'iti 'ain kixun ka Moisésnën kakëxa.