'Apákëx tuatabaia ñu bimi bixun Dios 'inánti kia bana
26
Moisésnën ka bëtsiokin Israel unikama katëkëankëxa: Uínsaran kaina Diosan mi 'inánkatsi kia me anu bëbatankëx anu 'ikani anu kamina, 2 a menu ñu 'apáxun ax pain tsinasati bimikë a bitankëxun pëkëtia kaki achúshi, uinu kara anuxun a rabiti xubusokin 'ati Diosan kaisaxa a menu 'atankëxun anu uanti 'ikën. 3 Anuxun ka Sacerdotekaman mitsu kati 'ikën: 'Ëx kana ësai bërí kin a me 'inánkatsi kixuan nun chaitiokëkama Nukën 'Ibun ka me anu kananuna bërí 'ain kiax ka kiti 'ikën. 4 Ësai kitankëx sënënia kakimi bëkë a 'inánkëxun ka Sacerdotenën bitankëxun anuxun Nukën 'Ibu Dios rabikin ñuina xaroti 'akë anu nanti 'ikën; 5 usakin nani ka Nukën 'Ibu Diosan kuamainun ësai kiti 'ikën: 'Ën rarakamax ka 'itsamashi 'aíshbi arameo 'ikësa achúshi menushi tsótima kuaínbëkini tsótankëx Egipto menu kuantankëx anu tsóti bërúakëxa, anuax ka 'itsa baritia 'ikëbë achúshi ëma chaiira 'ianan kushiirabu 'imainun 'aisamaira 'inun 'uakamë 'ëokëxa. 6 Usai 'ikëbë atumi rakuë́kin ka egipcio unikaman 'aisamaira ñu mëëmikin 'atimaira okin atu tëmëramiakëxa. 7 Usa 'ain kananuna nun chaitiokë kaman Dios a ñukákën, ñukákëxun ka nun bana kuakin egipcio unikaman 'aisamaira okin ñu mëëmikëx tëmërai ñutisari 'ia an nu isakëxa; 8 iskian ax kushiira 'ixun chaiira ñu 'akëbëa Egiptonu 'ikë unikama ami rakuëkëbëtan ka nukama anua chikíankëxa, 9 chikinbëtsinkin ka anua piti ñu 'aisamaira 'ikë ënu bëakëxa, bëtankëxun ka anua a xëati ñu buna rëpasa 'aisamaira 'ianan a piti ñuribi 'aisamaira 'ikë ënë menu nu bëakëxa. 10 Usa 'ain kana asábi ka kakin 'ën ñu 'apákë aín bimi tsinasakian anpan tuakëkama Nukën 'Ibun nu 'inánkë me anu 'apákëxa bimia bixun bëan.Ësai pain kitankëxun kamina kakinuami bëkë min ñu bimi Nukën 'Ibu Dios nanxunishi rantinpuruni tsóbukin a rabiti 'ain. 11 Usakin 'axun kamina achúshi fiesta 'akin Dios kamabi ñu 'akinkë kupí asábi ka kakin min aintsikamabëtanbi timë́xun 'anan levitakama 'imainun bëtsi menu 'ikë mitsubë tsókë unikama abë timë́ax kuëënti 'ain kixun ka Moisésnën atu kakëxa.
Kamabi ñu 'apákë bixun kamaira 'inankimabi chukúma chukúmashi 'inánti 'ikë kixun ka bana
12 Usa 'ain ka Moisésnën Israelkama usaía 'iti bana ñuixunkin katëkëankëxa: Achúshi achúshi bari 'ikëbëtan kamina mitsun ñu 'apákë tsinasatia bimikë a bixun kamaira 'inankimabi Dios achúshi achúshi unin ami 'inánkë këñúkëbëtan 'inánti 'ikën, 'aínbi kamina uínsaran kara rabë́ 'imainun achúshi baritia 'ia anun ñuñuma unikama 'ianan levita, 'imainun mitsubë tsókë bëtsi menu 'ikë uni, papañuma tuá xanu raëmëkë akamabi 'inánti 'ain, ax ka uinu 'ikë ëmanu kara 'ia anuxunbia atun piti 'iti 'ikën, 13 usakin 'atankëx kamina Diosan kuanun ësai kiti 'ain: 'Ën kana 'apáxun bikë ñu bimi amo 'ën xubunu mi 'inánti buküanan, ax ka 'ën mi nanxunti a 'ikën, 'imainun kana levita unikama 'ianan bëtsi menu 'ikë unikama axa nun menu tsókë 'imainun papañuma tuákama xanu raëmëkë akama 'inan. Usakin 'akin kana manukinma min bana kikësabiokin 'an. 14 'Imainun kana a mi nanxunti nankë ñu akama 'ën aintsi ñukë 'ain 'atima sinani masá nuituti 'ianan 'uchakë 'ixun pikëma 'ain, 'ianan kana bëtsi menu 'ikë unikaman 'akësokin anua uni ñukë maínkë anu uanxun nanxunkësokin nankëma 'ain. 'Ën 'Ibu Dios 'ën kana uisokin 'anun kaina 'ë ka usakin mix kikësabiokin 'an. 15 Min kamina naíkamë 'ëo anuxunbi iskin xubu chaiorukin upíira okin 'akë aín manánxun iskësokin iskin, uisai kara ënë menuax ñu 'ia a 'unánin, usa 'ain kamina min unibu Israelkama upíokin sinánxunin, min nu 'inánkë me anua, usa 'aish ka ënë menu a xëati ñu 'imainun a piti ñu 'aisamaira ënu 'ikën, minmi nun chaitiokëkama a 'inánuxun kásabiokin.
Israel kama Nukën 'Ibun aín uni 'aish upí 'iti sinánmitëkëan bana
16 Moisésnën ka amiribishi Israel unikama ësokin katëkëankëxa: Nukën 'Ibu Dios an ka bërí aín bana kuënëo 'imainun ax kikësabi oi 'iti bana akamami mitsun min nuitunënbi sinánkin ax kuëënkësabi okinshi mitsun 'ati kuëënia. 17 Mitsux kamina bërí Dios ax isa mitsun 'Ibu 'ikë kiax kian, kianan kamina ax kikësabi oi 'iti bana 'imainun a tanti bana kuënëo akamax kikësabiokin tanti 'ai kian. 18 'Imainun ka Nukën 'Ibu ësai kiaxa Israel unibu mitsux kamina achúshi ëma asérabi bërí 'ën unibu 'iti 'ain, 'ëx kiásabiokin kana 'ën mitsu kaisakën, usa 'ain kamina ax kikësabira oi 'iti bana a tanti 'ain. 19 Nukën 'Ibu Diosan ka kamabi menu 'ikë ëmakama 'akëxa, 'aínbi ka an mitsúxmi ëma achúshi kushiira 'aish ainan 'ikë ñuikania kuati bëtsi ëmakama mitsumi rakuënun Dios kikësabi oi 'ikanti aín.