25
Uikamax kara bëtsibë nishananxa ax ka anuxuan ami uni manánkëxun 'apun bana mëníokë anu buánkë 'iti 'ikën; anuxun ka 'apun uin pain kara ami nishkin bëtsi 'atima oxa a 'atima oti isanan bëtsi a uisabi otima 'ikën. 2 An ñu 'atima 'akë uni a usokin 'aisa 'ikë ka an ismainunbi menu nipatankëxun an ñu 'atima 'akë kupín rishkinun bëtsi uni an bana mëníokë unikaman 'amiti 'ikën. 3 'Aínbi ka usa unikama ax cuarenta okinra rishkikë 'itima 'ikën, usakin 'akin ka aín aintsi 'ikëbi 'atima okë uni ax 'aisamaira tëmërati 'ikën, usokëx mitsumi rakuë́kin ka usa ñu 'atëkëntima 'ikën. 4 Trigo bimi tákanuxun chakakin ka 'ain rëukukëma piia kixun vaca bënë, a ñuina kuëatsimiti 'akë a ain kuëbínu atsímitima 'ikën.Moisésnën Israel kama aín xukënan raënkë xanubë kara uni uisai 'iti 'ikë kixun ñuixuan bana
5 Moisésnën ka amiribishi Israel kama katëkëankëxa: Achúshi unix ka a xukë́n rabëtaxbi ain papan menu xubuñu 'iti 'ikën, 'aínbi ka bëtsix aín xanumi bëbuokin bëchiamaxi ñukë 'iti 'ikën, ñukë 'ain ka raëmëkë xanu ax ain bënën aintsima unibë biranantima 'ikën, aín bënën xukë́n aín bënëitsi abë kuni ka birananti 'ikën. Usakin bikëx ka aín xukënan raënnkë xanu bikë ax ka aín xukënan raënkë xanu ka unin biti 'ikë kikësa okin 'akë 'aish asábi 'iti 'ikën. 6 Usakin bixun a xanumi bëchitabaxun ka aín xukë́n ñukë aín anënbi 'akë 'iti 'ikën, usakian 'akëx ka Israel unikamanuax a unin anë nëtë́tima 'ikën. 7 'Aínbi aín bënën xukënan bisama tankëx ka a xanux aín 'apu kamami manani kuanti 'ikën, kuanxun ka kati 'ikën: 'Ën bënën xukë́n 'ën bënëitsi ka ain xukë́n ñukë aín anën bëchitankëxun 'ati kuëënima; Israelnuxua aín anë manúkantima kupí kana usakin 'aisatani 'imainun ka 'ë bisama tania, usai 'ikin ka aín xukënan raënkë xanubëa uni 'iti bana kikësa okin 'aisama tania. 8 Usaia ami manánkëxun ka a ëmanu 'ikë aín 'apukama abë bananua a uni unun kixun kamiti 'ikën, kamikëx uaxia a xanu kana 'ën xanu 'iti bitsima kikëbë, 9 a 'urama ukin ka aín aínitsin aín kushikaman ismainunbi aín taxaka amo 'ikë táchikinshi bëtushu kakin kati 'ikën: ¡Ka iskan ësokin ka uni aín xukë́n ñukin raënkë xanumi an bëchikësa 'itánun bëchitisama tankë uni a 'ati 'ikën! 10 Usakian aín 'aininën 'an ka aín bënëitsin aintsikama ax aín taxaka táchikë kakin anëkë 'ikë kamabi Israel menuxun 'unánkë 'iti 'ikën.