Uisakin kara unin ain xanu ënti 'ikën kixun Moisésnën Israel kama ka bana
24
Moisésnën ka amiribishi Israel kama ësokin katëkëankëxa: Uin kara aín xanu kuëënkin aín xanu 'iti biti 'ikën, 'aínbi ka aín xanun 'ixunbi anuxun ñu 'atima 'aia ax 'atima uni 'ixun kuëënkima, achúshi kirika anbi kuënëoxun ënë xanux ka bërí 'ën xanuma 'ikë kixun 'atankëxun aín mëkënubi 'inánti 'ikën 'inánkin ka aín xubunuaxa chikínun kati 'ikën. 2 Usakian 'akëx aín bënëbë ënanani ka aín xubunuax chikíkëa bëtsi unin anun kuënkin bikëxbi ka asábi 'iti 'ikën; 3 'aínbi ka anribia bitëkënkë ain bënëitsi, anribi a xanu anuxun 'atima ñu 'atëkënia iskin a kuëënkima achúshi kirika abi 'atankëxun 'inánkin aín xubunua chikínti 'ikën, 'aínbi ka an bikë uni ax ñukëbëtan, 4 ax pain aín bënë 'ia anbi aín xanu 'iti bitëkëinsatankibi, bëtsi unin bikëxun ñu 'atima 'akë a mëníokakëma 'ikë bitima 'ikën; ax ka achúshi ñu usai uni 'iti Nukën 'Ibu kuëënkëma 'ikën, usa 'ain kamina Nukën 'Ibu Diosan 'inánti me anuax mitsux usai 'i kuankantima 'ain.Usai ax kikësabi bëtsibë 'iti banakama ñuikin Moisésnën ka bana
5 Uin kara bërí xanu biaxa a unix ka 'akanani kuankëbë kuantima 'ikën, 'imainun ka aín 'apun uisa ñu mëëtibi 'anun achúshi baritia sënë́ntamainun katima 'ikën; usakia 'akëx ka a unix añu ñubi mëima aín xubunu achúshi baritia sënë́mi aín xanubë upitax 'i kuëëni 'iti 'ikën.
6 Uibi kamina 'ën ñu mi 'inámainun kamina min anun mëkënan ñu rënkë maxá 'ë ënxunti 'ain kixun katima 'ain, usakin mi 'akëx ka a unix anúan aín ñu rënxun piti 'aíma 'iti 'ikën.
7 'Ianan ka uin kara aín aintsi 'ikëbi Israel uni achúshi anbi ñu mëëmikatsi kixun 'anan maruti sinánxun maruti 'ikëbi mërakë uni ax ka 'akë 'iti 'ikën, usokin 'akëx ka an ñu 'atima 'akë unikamax mitsubë 'ikë 'aíma 'iti 'ikën.
8 'Imainun ka uix kara an nami shurunmikë 'insínan 'ia an añu ñubi mëima 'iti 'ikën Levitas sacerdote kaman kakësabi oi 'iti 'ikën. Usakin 'anun 'ën kakësabiokin atun 'ati 'ikën. 9 Mitsun kamina sinánti 'ain, uisakin kara Diosan Egipto menuax mitsux chikíküatsini ukëbëtan María ami 'atimati banaia 'akëxa kixun.
10 Uin kara bëtsi uni 'inantëkënuxua ñukákëxun aín kuríki 'inánan aín ñu 'inania ax ka aín xubunu atsínxun aín ñu bitëkënkinma anbia aín ñu 'inántëkënun kaínti 'ikën. 11 Usai 'ikinma ka anbia, añu kara 'inántisatania a 'inánuxun bimainun ëmánxun bëtsi uni kaínti 'ikën. 12 'Imainun ka uni ñuñuma anu 'iti 'ikën, a kamina aín ñu ñukákëxia chupa anuan mapukë chupañushi 'ikë a ñukáxun achúshi imë́ anun 'iti tíkatankëxun 'inántëkënti 'ain, ax ka anuan rakukë aín chupa achira 'ikën; 13 usa 'ain ka aín chupa bari xupinbukëbëtainshi anúan imë́ 'uxi rakunun 'inánkë 'iti 'ikën. Usakin mi 'inánkëxuan uni an upíokin sinánxunia ka Diosan min 'akë ñu upí isti 'ikë.
14 Ñuñuma uni kamina 'itsaira tëmixunbi kupíosama tankin tënanpatima 'ain, 'anan kamina mitsun 'aintsikama 'imainun bëtsi menu 'ikë uni mitsun ëmanu tsókë 'ikëbi usokin 'atima 'ain. 15 Usokin 'akinma kamina ñu mëbaitiaishi a nëtënbi kupíoti 'ain, an ka ñuñuma 'ixun anun aín piti maruti a kuríki kuëënia. Usokin bënë́kin kupíokëxuma ami tëmikë ñuñuma uni an ñukákëxun ka Nukën 'Ibun mitsúxmi 'uchakë 'ikë isti 'ikën.
16 Uinu 'ikë papaxbi ka aín bëchikënën 'atima ñu 'ai 'uchakë kupín 'atima okë 'itima 'ikën, 'imainun ka aín bëchikënëxribi aín papan 'uchakë kupínribi atima okë 'itima 'ikën, usa 'ain ka achúshi achúshi unix ñu 'atima 'aia 'uchakë kupí ñukë 'iti 'ikën.
17 'Ianan kamina axa mitsubë tsókë bëtsi menu 'ikë unikama 'atima onan papañuma tuákamaribi 'atima otima 'ain. 'Imainun ka xanu raëmëkë ñu 'inánkin anun rakukë aín chupa a bikuantima 'ain. 18 Usa 'ain kamina manúkantima 'ain, Egipto menuxun tëmërakin ñu mëëiabi ka anua Diosan mitsu chikíankëxa; usa 'ain kamina 'ën mitsu kakë ënë banakama kikësokinshi a tankin 'akánti 'ain. 19 Mitsun 'apákë ñu aín bimi bixunmi manuxun ëbiankë a bitsi kamina anu kuantëkëntima 'ain; a kamina axa mitsubë tsókë bëtsi menu 'ikë unikama a 'imainun papañuma tuá 'ianan xanu raëmëkë kaman barikin binun ënti 'ain, usakinmi ñuñuma unikaman binun 'aia ka Nukën 'Ibu Diosan mitsun 'akë ñukama upí 'inun 'imiti 'ikën. 20 Uínsaran karamina olivos kakë i aín bimi aceituna a bitsi anun kamina amiribishi aín pëñankama baritëkënbiankin aín bimi bikin tëokë a bitima 'ain, axa aín pëñanu bërúkë aceituna a ka bëtsi menu 'ikë uni mitsubë tsókë a 'imainun tuá papañuma abëtan raëmëkë xanukaman biti 'ikën. 21 Uínsaran karamina mitsun uvas 'apákë bimia aín bimi bitsi anun kamina amiribishi bikin tëxëokëkama barikin bitëkëntima 'ain; akamina bëtsi menu axa mitsubë tsókë a 'imainun tuá papañuma xanu raëmëkë atuan binun ënti 'ain. 22 Kamina sinánkanti aín mitsux pain kamina Egipto menu tëmëramikin ñumëmikë 'iakën; usa 'ain kamina 'ën mi kakë banakama ënëx kikësabiokin 'ati 'ain, kixun ka Moisésnën Israel unikama kakëxa.