15 Ësokin ka Moisésnën Israel unikama katëkëankëxa: Achúshi uníxa këmëi banai a unin ka 'atima ñuira 'akin a tanti bana kikësokin 'akinma uni 'axa kikëbëtan kamina asérabi ka ax 'ikë kixun sinántima 'ain. Usa 'aínbi kamina rabë́ 'imainun achúshi uni an usai ka asérabi 'iaxa kixun bana ñuiti bëkë axa asérabi ka usakin 'axa kikëbëtan usa ka kixun kati 'ain. 16 Usa 'aínbi ka an ñu 'atima 'akë uníxa bëtsi uni ñui a unix ka ñu 'atima 'ai 'uchaxa kikëxbi ax këmëia kikë 'iti 'ikën, 17 usa 'ain ka axa nishanankë uni rabë́ ax 'apunu kuanan Nukën 'Ibunu 'imainun sacerdotekama an bana mëníokë akamanu a nëtën ñu mëkëbë anu kuanti 'ikën. 18 Anuxun ka an bana mëníokë aín 'apukaman uni rabë́ bëruinra oxun uisai kara 'iaxa kixun upíokin ñukati 'ikën, ñukákëxia, ax bëtsi unimi manánkë ax këmëkë 'ain ka, 19 bëtsi uni 'atima oti sinanx ami këmëi manánkë uni axbi 'atima okë 'iti 'ikën. Usakin 'akëbë ka an ñu 'atima 'atishi sinánkë uni raíri ax mitsunu 'aíma 'iti 'ikën. 20 Usakin 'aia isi rakuë́kin ka aín patsan kamax ñu 'atimaira 'ati sinanima rakuë́ti 'ikën. 21 Usa 'ain kamina uin kara bëtsi uni 'aia a nuibakinma 'axun rankanti 'ain, uin kara bëtsi unin bëru 'atima oia ax ka usaribi okin ain bëru 'atima okë 'iti 'ikën. 'Imainun ka uin kara bëtsi unin xëta 'atima oia aín xëtaribi 'atima okë 'iti 'ikën, 'anan ka uin kara bëtsi unin mëkën 'atima onan aín taëribi 'atima oia a uninanribi ka bëtsi unin aribi 'akë 'iti 'ikën kixun ka Moisésnën kakëxa.