14 Moisésnën ka Israel unikama bana ñuixunkin ësokin kakëxa: A mekama anumi mitsux kuanti anu 'ikë unikamaxa usai ka ñu 'iti 'ikë kiax kimainun ka an ñunshinan 'amikëxun ñu tankë unikamaxribi kiti 'ikën; 'aínbi ka usakinra a ñukama 'anun Diosan mitsu 'amitima 'ikën. 15 Usa 'aínbi ka Nukën 'Ibu Diosan mitsunuaxa achúshi uni an Dios kikë bana ñuikë 'ën mitsu ñuixunkësaribi okían ñuixunun 'imiti 'ikën, aka mitsun rëbúnki kaman aín bana tanti 'ikën. 16 Ënëx ka asérabi 'ikën, mitsux kamina anumi aín bashi Sinaí kakë anu timë́xun Dios ñukati kamina ësai kikankën: bërí kananuna amiribishi Nun Diosan kakëxun kuatëkëinsama tanin, 'imainun kananuna chaiira 'inuan tsi rëkirukësai 'ikë aribi bamatima kupín istisama tanin kiax kiakën. 17 Usai mitsux kia okin ka Nukën 'Ibun 'ë kakëxa: Asabi ka usaími kikë ax 'ikën. 18 'Ën kana atunuaxa achúshi uni an 'ën bana ñuiti uni 'imiti 'ain, min 'akësarabi okin an bana ñuixunun 'imiti 'ain, an ka mitsun aintsibi 'ixun 'ën kakë banakama mitsu ñuixunti 'ikën, 'imainun ka 'ën kakë banakama abi mitsu ñuixuntëkënti 'ikën. 19 Uikaman kara an 'ën bana ñuikë unix 'ën anë ñui kia kuaisamatankin ax kikësa okin 'aisama tania a kana 'ën 'atimokin uisa karana oisatani usokin 'ati 'ain. 20 'Aínbi ka 'ën bana ñuikë uni 'ixunmabia an 'ën kakëxunmabi bana ñuikë, a 'imainun bëtsi dios ñuikin uni bana ñuixunkë a unikamax ka 'akë 'iti 'ikën. 21 Mitsun kamina ësokin sinánti 'ain: ¿Uisaxun karanuna ax ka Nukën 'Ibu kikë bana 'ikë kixun a 'unánti 'ain? ësokin sinánkin kamina mitsun 'unánti 'ain: 22 An bana ñuikë uni axa Nukën 'Ibun anë ñui kikë 'aínbia ax kikësabi oi 'itia kikë usai ñu a 'ikëbëtama kamina mitsun 'unánti 'ain, ax ka Nukën 'Ibu kikëma bana 'iaxa kixun, usa 'ain kamina an bana ñuixunkë uni ax ka axbi rabiakati kiaxa kixun 'unáni, mitsux ami rakuë́tima 'ain, kixun ka Moisésnën kakëxa.