13
Anumi mitsux 'ikë anuaxa achúshi uni an bëtsi dios ñuikin bana ñuikë 'imainun an unin namákin iskë ñuikë uni këmënux mëraxun usai ka ñu 'iti 'ikë kixun ñuikëbëa, 2 ax kikësabi oí asérabi ñu 'ikëbëtan ka mitsu kati 'ikën: ¡Asabi ka, bërí kananuna anu kuanxun nun 'unánkëma; bëtsi dios rabi kuanti 'ain! 3 kixuan kakëxunbi kamina mitsun aín bana kuatima 'ain. Nukën 'Ibu Diosan ka asérabi karamina mitsun a nuibati ax kikësabiokin 'ai ami sinani isnuxun mitsu tankin usakin 'ati 'ikën. 4 Usa 'ain kamina Nukën 'Ibu Dios ashi an kakësabiokin 'akin; ax kikësaibi oi 'ikin a bana kuakin ashi rabikanti 'ain. 5 'Imainun kamina an bana ñuixunkë uni 'imainun an namákin isun usaika 'iti 'ikë kixun bana ñuikë uni a mitsunu mëratia 'ati 'ain, a unin ka Dios an Egipto menuxun tëmërakin ñu mëëiabi mitsu chikían ax kikësa okin 'anun 'ën kakë usakin 'axuma 'anun kixun mitsu 'unánmiti 'ikën. Usakinmi 'akëx ka mitsunuax uni 'atima sinánñukama 'aíma 'iti 'ikën.6 Bërí kana achúshi achúshi mitsu kain, min xukë́n apan 'ianan 'anáka, mitsun bëchikë bëbu 'ianan xanu 'ianan ami kuëënkë min xanu, 'imainun abëmi nuibanairakë uni, 'ianan mitsun papanbi bëtsin kuanumashi kakëxunbi kamina 'atima 'ain, 7 a dios kamax ka mitsu 'urama 'ikë ëma kamanuxun rabikë a 'ikën, usa 'aish ka mitsu 'urama 'ianan mitsu 'ura 'ixun, mekamanuxun amo amoxun mikama bëararati 'ikën, 8 usa 'ain kamina atux 'ikësai 'ima 'ianan atun kakëxun aín bana kuatima 'ain; 'ianan kamina atu nuibatima 'ain; nuibakin kamina tëmëraiabi atu 'akintima 'ain, 'anan kamina atún 'akë ñu unëi atubë nitima 'ain; 9 unëkima kamina a unikama rëti 'ain. Rëkin kamina min pain atún 'akëxumaishi mitsun pain, 'aia iskin ka raíri unikamanribi usaribikin 'ati 'ikën. 10 'Akin kamina maxaxan bamatanun 'ati aín, ax aín kuëënkësa okin 'akin Nukën 'Ibu Dios an nu Egipto menuax tëmëraia chikían a ënti sinánmikë kupí kamina usakin a unikama 'ati aín. 11 Ësokin mitsun a unikama 'aia isí ka Israel unikama bëtsi ñu atún 'akësokin 'atimi rakuë́ti 'ikë kixun ka Moisésnën kakëxa.