2 Usa 'ain kamina a menu 'ikë unikama abë 'akanankin këñutankëxun anuxuan atun dios a rabikë, ain bashi, matá me 'imainun in papa pëñanakëkë a tëmúxuan atun, dios rabikë akama këñuti 'ain. 3 Këñuanan kamina a rabinuxun ñu tankin 'akë, maxá akama tukapanan, imo chakama xaronan anuxuan ain dios rabikë, akamabi këñuti 'ain, usakin 'an ka uinu 'ikë uníxbi ami sinántëkëntima 'ikën.

4 Usa 'ain kamina mitsun Nukën 'Ibu Dios, atúan aín dioskama rabikësa okin rabitima 'ain. 5 'Aínbi kamina mitsun aintsi ñaká achúshi anu tsókë me a Nukën 'Ibun kaísa anu xubusa okin chupa 'atankëxun anuxun ashi rabi kuanti 'ain. 6 Anuxun kamina ami sinánkian raírinën ain ñuina rëtankëxun 'aímai xarátanun xaromainun kamina mitsun ñukama raíri 'inánan, a 'inánti manë panshian 'inánan, a 'inánti nankë 'imainun, a 'inánti kuëënxun 'inánkëkama këñunbi, ain ñuinakaman tuatabakë aín upí akamaribi 'inánti 'ain. 7 'Inánkin kamina xubusa okin chupa 'akë anuxun mitsun aintsikamabëtanbi xara okëxa tëxëkëkama kuëënkin piiti 'ain, ax ka ñu mëia Diosan mitsun ñu 'apákë ain bimi 'imainun mitsun ñuinakamaribi 'aisamaira 'inun 'imikë 'ikën.

8 Usa 'ain kamina mitsun a menuxun ënuxunmi 'akësa okin, mitsun ñuina amanuxun xarotima 'ain. 9 Usa 'aínbi kamina anu mitsux upitax bukukanti Nukën 'Ibu Diosan mitsu 'inánti me anu bëbakëmapain 'ikanin. 10 Usa 'ain kamina Jordán kakë baka shitákiani kuantankëxun a me anu tsónuxun, binux abë 'akanankin anu 'ikë unikama maëmitankëxun an mitsu ubioti uni 'aíma 'aimi upitax anu bukukanun bitsi kuanti 'ain, 11 usa 'ain kamina mitsun uinu kara Diosan anuxun a rabiti me kaisia anuxun xubusa okin chupa 'akë a nantëkëni anuxun kamina Dios 'axunkin ñuina xaroti 'ain, raírinëan 'aímai këñutanun 'amainun ka, raírinënribi 'aimairai këñutanuma xuiti 'ikën, 'imainun ka atun ñu 'apákë kamaira 'inankima uiti 'itsa kara 'inánti 'ikë atishi 'inánti 'ikën, 'inámainun ka uin kara manë panshíanën kupíoia an kupíomainun, ka uin kara a 'inánti nanxa akamaribi 'inánti 'ikën. 12 'Imainun kamina anuxun Nukën 'Ibu Diosan isnun fiesta 'akin, mitsun bakë bëchikëkama 'imainun an mi ñu mëëxunkë unikama 'imainun axa mitsubë 'ikë, levita unikama mitsún biti me a bitima 'ikën.

13 'Imainun kamina Nukën 'Ibumina bëtsi menuxunbi ñuina rëxun raroxuni bërúankati 'ain; 14 usakin 'akin kamina uinu 'ikë menuxun 'anun kara Diosan kaisakëxa, anuxuinshi 'akin anua bëtsi unikama tsóa me anuxun 'ati 'ain, anuxun kamina 'ën mi kakësabiokin 'ati 'ain.

15 'Aínbi kamina mitsun ñuina 'arakakë 'anan 'arakakëma aribi piisatankin uinu karamina 'i anuxunbi Nukën 'Ibu Diosan mi 'inánkëxun piti 'ain. A nami ka kamaxunbi uix kara mëníokakë 'imainun mëníokakëma 'ikë akamanbi chaxu nami 'akësokin piti 'ikën.

16 'Aínbi kamina a ñuinakama aín imikëñun pikinma ain imi 'aimakin 'ibumitankëxun xuixun piti 'ain. 17 Usa 'ain kamina anumi 'ikankë ëma anu xubusa okin 'akënuxun rabiti 'akë anuxun mitsun trigo 'apáxun kamaira 'inánkimabi 'inánkë a 'ianan uvas baka, xëni 'imainun tuatabakian mitsun ñuinanën tuákë akama 'imainun Nukën 'Ibu 'inánuxun nankë 'ianan a 'inánti sinánxun nankë akama pitima 'ain. 18 'Imainun kamina Nukën 'Ibu Diosan isnun 'akin mitsun uinu kara an kaisia, anuxun Diosan ismainun 'akin mitsun bakë bëchikëkama 'imainun an ñu mitsu mëëxunkë 'imainun mitsun aintsi levita unikama atubëbi timë́xun mitsun ñu 'apákë 'ain bimi bixun pi kuëënti 'ain.

19 'Ianan kamina a menu tsókin mitsun aintsi levita unikama uínsaranbi manutima 'ain. 20 Uínsaran kara Diosan anumi mitsux 'ikankë me a cha 'inun ax kiásabiokin 'inántëkënia anuxun kamina uínsaran kaina, nami písa tani anun mitsun kuëënkësa okin nami piti 'ain. 21 Anuxun a rabiti xubu 'atia Nukën 'Ibu Diosan mitsu 'ura kaisa me anu 'aínbi kamina a 'ura 'ixunbi anuxun mitsun 'arakakë, vaca 'imainun ovejakama Nukën 'Ibu 'inánkëkama a rëxun piti 'ain, anumi mitsux 'ikë me anuxunbi, usakin 'ai kamina xubusa okin chupa 'akë anu kuantima 'ain. 22 Usakin 'akin kamina chaxu nami mëníokaxumabi kamaxunbi mitsun pikësa usakinbi 'ati 'ain. 23 'Aínbi kamina uisaxunbi ñuinanën imi pitima 'ain, aín imi kupí ka ñuina nitsia, usa 'ain kamina ñuina ain imikama këñunbi pitima 'ain. 24 Usa 'ain kamina piti 'anuxun pain aín imi 'aimakin 'ibúmiti 'ain. 25 Usakin mitsun ñuina imi pikëbëma ka mitsun 'ati ñukamax upí 'imainun, mitsun bakë bëchikë kamanribia 'akë ñukamax Nukën 'Ibun iskëx upí 'iti 'ikën. 26 'Anan kamina Dios 'inaishiti sinánxun nankë ñukama a 'imainun Nukën 'Ibu 'inánuxun sinánkë akamabi uinu kara anuxun a rabiti xubusa okin 'ati an kaisia anu atankëxun nanti 'ain, 27 anuxun kamina mitsun Dios ñuina rëxun xaroxunti 'akë anuxun xaroti 'ain. 'Anan kamina ñuina a rabikin 'akin min aín imi bikë a anuxun Dios ñuina xaroxunti 'akë anu chikuti 'ain, 'anan kamina aín nami piti 'ain.

28 Usa 'ain kamina 'ën mitsu kakë banakama ënë kuakin mitsun 'ën kakësabiokin 'ati 'ain, usakin 'ai kamina mitsun bakë bëchikëkamabëbi upí tsóti 'ain, usakin 'aia ka Diosan upí 'ikë isti 'ikën.

29-30 Uínsaran kaina Diosan 'akinkëxun 'akin a menu tsókë unikama abë 'akanankin këñutankëx a me 'ibuai mitsux anu tsóti, anun kamina a unikaman 'akësaribi okinmina atúnbi 'axun rabikë dios atun 'akësaribi okin rabiti sinani bërúankati 'ikanin. 31 Usakin kamina atun akësokin Nukën 'Ibu Dios rabitima 'ain, atun ka aín dioskama rabikin atun bakë bëchikëbi xaroxunkin rabia, usakian atun 'akë a kamina min kuëënima.

32 Usa 'ain kamina mitsun 'ën kakë banakama ënëx kikësabiokin 'anan; uisaxunbi mëskukin 'ën nankë banakama nantima 'ain, kixun ka atu Moisésnën kakëxa.