Amiribishi Diosan 'atabakin kuënëo 'ikëbi achúshi bana këñutima okin 'akë a kuënëotëan bana
10
Nukën 'Ibun ka ësokin 'ë kakëxa: Minbi kamina maxá pará rabë́ a pain mi 'inánkë usabi okin 'ati 'ain, 'anan kamina achúshi ñu bunántisa okin i 'ati 'ain, 'abiankin abi buani kamina aín bashinu 'ëbë banai mapërakëti 'ain. 2 'Ën a pain mi 'inánkë maxá pará anu kuënëokë 'ikëbimi tukakë banakama abi kana anu kuënëotëkënti 'ain, a kamina bunántisa anu nanti 'ai kixun ka Diosan 'ë kakëxa.3 Kakëxun kana bunántisa okin i acacia kakë a 'akën, 'anan kana maxáx rabë́ pará okin 'akën, 'axun a buani kana aín bashi mapërakëakën. 4 Anuxun ka Nukën 'Ibun maxá pará rabë́ anu mapai rabë́ axa kikësabi oi 'iti aín bana kuënëokëxa, a paian aín bashinuxun nukamax timë́kë 'ain tsi rëkirukësa mëuxun 'a usabi 'itánun. Kuënëoxun 'ë 'inánkëxa, 5 'inánkëx kana 'ëx aín bashinuax taramëkëbuakën; usai taramëbutankëxun kana bunántisa okin 'akë anu maxá parókin 'akë rabë́ anu 'aruakën Nukën 'Ibun 'ë kakësabiokin, ax ka anu nan 'aish bëríbi anubi 'ikën.”
10 'Ëx kana cuarenta imë́ 'imainun cuarenta nëtë bërámabi 'itabati 'ikësabi aín bashinu 'iakën, 'imainun ka amiribishi 'ën kakëxun kuakin Diosan mitsu këñutisa tankinbi 'ama 'ikën, 11 'akima ka 'ë ësokin kakëxa: Kuantankëxun kamina min aintsikama mëníokanun kai kuanti 'ain 'ën a ñuikin aín chaitiokëkama, aín rëbúnki 'inánuxun ka me a bitsi kuanuxa mëníokanun kixun kamina kai kuanti 'ain.
Usai Israel kama 'itia kia Diosan bana
12 Usa 'ain ka Moisésnën israel unikama kakëxa: ¿añumi mitsun 'ati kara Diosan kuëënin? An ka kuëënia ax kikësabiokin aín bana kuakin, nun nuitu upí 'ixun nuibakin ami sinánkin rabiti, 13 'imainun ka axa kikësaibira oi 'iti bana 'imainun a tanti bana 'ai kamina mitsux upítax bukuti 'ain. 14 'Aínbi kamina mitsun sinánti 'ain Nukën 'Ibu Diosnan ka naíkamë 'ëo 'imainun a 'urira 'ikë ñukama 'imainun menu 'ikë ñukamaxribi ka ainan 'ikën. 15 Usa 'ain ka Nukën 'Ibu nun chaitiokëkama nuibakëxa, nuibakin ka aín rëbúnkikama kaisakëxa, a kananuna nux 'ain, usa 'aish kamina bëtsi ëmanu 'ikë uni kamasama ënu nux bërí 'ain.
16 Usa 'ain kamina achúshi ñu 'akë kikë bana manukin mitsun nuitu iruakinma sinánti 'ain, 17 Nukën 'Ibu Dios ax ka achúshi 'aish dios kamasamaira 'ianan, 'ibukaman 'Ibu samaira 'ikën; ax ka Dios kamabi ñu manámi 'ikë ainan 'ianan 'Apuira 'aish kushiira 'ikën, usa 'ain kamina ami rakuë́ti 'ain, an ka bëtsi unikama upionan bëtsi unikamaribi 'atima oíma, 'imainun ka upiokinshi ñu 'axúnti kuëënia; 18 an ka tuá papañuma 'imainun xanu kasunamëkë nuibakin aín piti ñu 'inánan aín pañuti chupa bëtsi menu 'ikë unikama mitsubë tsókë akama këñunbi 'inania. 19 Mitsun kamina bëtsi menu tsókë unikama nuibati 'ain, mitsux pain kamina bëtsi menu tsókë uni 'aíshbi Egipto kakë ëmanu tsókankën.
20 Usa 'ain kamina Nukën 'Ibu Dios ashi rabianan ënkinma ax kuëënkësabi okinshi 'akánti 'ain, 'imainun kamina sinántëkëntima asérabi aín anën ishi kana ñu 'ati 'ai kiti 'ain. 21 Ax ka mitsun ashi rabiti Dios a 'ikën; usa 'ixun ka ax Dios 'ixun mitsu kupí ñu chaiirabu mitsun ismainunbi 'akëxa. 22 Usa 'ain ka mitsun chaitiokëkama Egipto menu bëbakë atux setenta unishi 'iakëxa, 'aínbi ka bërí Nukën 'Ibu Diosan atúxa 'uakamë 'ëonun 'imikin 'ispa naínua imë́ iskësaira 'inun 'imiakëxa kixun ka Moisésnën kakëxa.