3 Bërí kamina mitsun 'unánti 'ain, Nukën 'Ibu ka bërí mitsubë 'ikë kixun, usa 'ixun ka tsi rëkirukënëan ñu këñubiankin xarokësa usa okinshi an 'akëxa a ëmakamax mitsumi rakuë́tia kamina këñuti 'ain. Usakin mitsun aín ëmanubi bëbarukin 'akin këñukëx ka, unix munuma bëkui bënëtishi bëpëkikë usaribi okin Diosan aín kushínbi këñuti 'ikën. 4 Usokin 'anuan Diosan 'amikëxun atu chikíntankëx kamina mitsux kitima 'ain: Asérabi kananuna nun kushínbi 'a kixun sinánkantima 'ain, min ënë me anu 'inun nu 'inan; usakin Nukën 'Ibun 'akëx ka aín 'ucha kupínbi atu chikínkë 'iti 'ikën. 5 Usa 'ain ka mitsun upí 'ixun biti kupíma a memi binun; atun 'ucha kupín mitsun ismainunbi atun menua a unikama Nukën 'Ibun chikínti 'ikën, 'imainun ka anbia nun chaitiokë Abraham Isaac 'imainun Jacob akama kásabiokin 'ati 'ikën. 6 Mitsun kamina 'unánti 'ain, Diosan ka mitsu upí unibu 'ikëmabi a me 'inania kixun, usa 'aínbi kamina bana kuaisama tankin mitsun nuitu iruarakë unibu 'ain.

7 Mitsun kamina uínsaranbi anu uni 'ikëma menuxua Nukën 'Ibu Diosan kakëxunbi kuaisama tan bana a manutima 'ain. 'Ianan kamina Egipto menuax chikíkin 'ásabiokin ënë menu bëbakinbi, an kakësabiokin 'aisama tankanin. 8 Aín bashi Horeb kakë anuxun ka an kakësabiokin 'akinma kamina 'itsaira Nukën 'Ibu nishmiakën, usakin 'itsaira nishmikëxun ka Diosan këñutisatankinbi mitsu këñuama 'ikën. 9 Usai 'ikëbë kana 'ëx maxáx pará rabë́ anua achúshi ñu mitsu 'axunkin Nukën 'Ibun aín bana kuënëokë a bitsi aín bashinu mapërakëakën, mapërakëax kana anu cuarenta nëtë 'imainun cuarenta imë́ ñu pima 'ianan xëaimabi 'iakën. 10 Usai mapërakëax anu 'ikë ka Nukën 'Ibu maxá pará rabë́ anu aín banakama kuënëokë a 'ë 'inánkëxa, ax ka nuxnu aín bashi Sinaí anu timë́kë 'ain ka a nëtën tsi rëkirukësa a mëuxun nukama kakë bana a 'iakëxa.

11 Cuarenta nëtë 'imainun cuarenta imë́ ax inúkëbëtan ka Nukën 'Ibu maxá pará rabë́ a 'ë 'inánkëxa, ax ka anua achúshi ñu mëníokë kikë a bana kuënëokë 'iakëxa, 12 'imainun ka ësokinribi 'ë kakëxa: Ënuax kamina bënëtishi taramëkëbukiani kuanti 'ain. Egipto menuami chikínbëtsinkin bëkë unikaman ka 'atima ñu 'ai ënananxa. Bënëkinshi ka 'ën usakia 'ati kakë bana manuaxa, usa 'ixun ka a banakama parëkin bëtsi ñu tankin manë charóxun achúshi ñu unioxa kixun. 13 Kanan ka ësokinribi Nukën 'Ibun 'ë kakëxa: 'Ënbi kana ënë unikama 'unan usa 'ixun ka aín nuitu iruarakin 'atima ñu 'axa. 14 Usa 'ain kamina 'ën a sinánxuma 'anun 'ëmi bana kantima 'ain, 'ën kana menua a unikama uínbia atumi sinántima okin atu maë rakátanun këñuti 'ain, 'aínbi kana min rëbúnki kamaxa atux 'iásamaira 'aish kushiirabu 'ianan 'aisamaira 'inun 'uákamë 'ëonun 'imiti 'ai kixun ka 'ë kakëxa.

15 Kakëx aín bashi anuaxa tsi rëkirukësa 'ikë anuax taramëbukuatsini ukin kana 'ën maxá pará rabë́ anua achúshi ñu a tanti bana kuënëokë a 'ën mëkënanbi tuinbëtsikin bëakën. 16 Bëkinbi kana mitsúxmi Nukën 'Ibumi 'uchakin manë charóxun vaca bakë tankin 'axun rabikin Nukën 'Ibun kakësabiokin 'ati ënxun 'aia mërakën, 17 mërakin kana anua aín banakama kuënëokë maxáx pará rabë́ tuínxun bëkinbi mitsun ismainunbi a tukibutanun niakën.

18 Usokin 'atankëx kana Nukën 'Ibu ismainunbi menu rantipuruni 'ëx bëráma 'ikësaibi 'iakën, 'i kana cuarenta nëtë 'imainun cuarenta imë́ añubi pima 'ianan xëaima 'iakën, mitsux ñu 'atima 'ai 'uchakin Nukën 'Ibu nishmikë kupí kana usai 'iakën. 19 Usai Nukën 'Ibu xuamati mitsu këñutisatani nishkëbë kana 'ëxribi ratuakën; 'aínbi ka Nukën 'Ibun mitsu këñukatsi kiax kiabi 'ën kakëxun kuakëxa. 20 'Ianan ka Aarón xuamati ami nishkin bamamisa tankëxa, taniabi kana 'ën anun rabanan në́kin Nukën 'Ibu kakën; 21 katankëxun kana vaca bakë tankin a rabimi 'uchakankë a bitankëxun tsinu 'aruakën, 'arukëxa 'aímai xarátia kana bitankëxun upíokin putuakin rënxun, aín bashimiaxa ukë xëxá 'umpaxmi sakakin puakën.

22 Usonan kamina Taberá, Masá anuxun 'anan Quibrot-hataavá anuxunribi Nukën 'Ibu kikësabi oi 'ikinma mitsun nishmiakën. 23 'Imainun kamina Nukën 'Ibun mitsu Cadés-barnea anuax kuanxumi an mitsu 'inánti me a bitánun kakëxbi kana biti 'ain kixun sinanima, mitsux 'ikësabi 'itëkënkin an kakësabiokin 'ama 'ain. 24 ¡A nëtën 'ën mitsun uankë, anubi kamina Nukën 'Ibun bana kuaisama tankën!

25 'Ën mitsu ñuixunkë usokian Nukën 'Ibun mitsu këñutisa tankëbë kana, 'ëx rabuxunën menu rantipuruni tsóbutankëx cuarenta nëtë 'imainun cuarenta imë́ 'iakën, 26 'ikin kana anuxun munuma banakin kakën: 'Ën 'Ibu Dios ënë unikama kamina usakin 'atima aín, atux ka min uni 'ikëmi Egipto menuxun tëmërakin ñu mëëiabi mix kushiira 'ixun chikínbëtsinkin bëa a 'ikën. 27 Usa aín kamina min unikama Abraham, Isaac 'imainun Jacob akaman ka min kakësabiokin 'akëxa kixun sinánkin. Ënë unikama ñu 'atima 'ai 'uchaiabi a sinánkin 'aisamaira otima 'ain, 28 ënë unikamami usakin 'akëbë ka aín menuami chikínbëtsinkin bëkë Egiptonu 'ikë unikama kiti 'ikën: Nukën 'Ibun ka Israel unikama a 'inánkatsia kia me a 'inánkima ami nishkin, ënu upitax tsótiabi anu uni 'ikëma menuxun këñuminuxun chikínbiankin buánxa kiax kiti 'ikën. 29 Usa 'ain ka atux min unibu 'aish min unibubi 'ikën; min kamina Egipto menua min kushínbi atu chikiankën kixun ka Moisésnën Dios kakëxa.