Ñu piishi ka uni tsótima 'ikë kixuan Moisésnën ka bana
8
“Moisésnën ka amiribishi Israel unikama katëkëankëxa, ax kikësabi oi 'iti bana 'ën mitsu kakë ënë kamina tanti 'ikanin, usakin ax kikësabiokin 'ai kamina bakë bëchipati achúshi ëma chaiira 'ixun atu 'akin kupitanunma 'axun kamina, a 'inánnuxua nun chaitiokëkama Diosan ka me a biti 'ain. 2 Usa 'ain kamina sinánkanti 'ain, Diosan ka anu uni 'ikëma menu cuarenta baritia 'imi tëmërai ninun nu 'imiakëxa akamina manukinma sinánkanti 'ain, usakin ka mitsu tankin 'anan ami karamina asérabi sinanatëkëni isti 'anan ax kikësabiokin aín bana 'ai 'isnuxun mitsu 'akëxa. 3 'Imainun ka ñu narakamikinma tëmëramikin numin pain 'imitankëxunbi maná kakë piti mitsu pimiakëxa, a pitix ka mitsun 'unánkëma 'imainun nun chaitiokë kamanbi 'unánma piti 'iakëxa, usokin 'akin ka ñu pishi ka uni tsótima 'ikë Nukën 'Ibun banaribi 'ai ka uni ami katamëti tsóti 'ikë kixun 'unánmisatankin Diosan usakin 'akëxa. 4 Usai pain cuarenta baritia 'imi nikëbëbi ka atun chupabi këñutima 'ianan 'itsaira nikëbëbi atun taëbi 'uáma 'ikën. 5 Mitsun kamina 'unánti 'ain Diosan ka mitsu 'unámikin unían aín bëchikë ñu 'atima 'aia 'unámikin 'akësa usaribi okin mitsu 'unánmisa tanxa.6 Usa 'ain kamina, ax kikësabi oi 'iti aín bana Diosan nu 'inánkë ax kikësabiokin 'ati 'ain. 7 Usakin 'aia ka Nukën 'Ibun mitsu anua me upí 'imainun a xëati xëxá 'umpax 'imainun me sapan 'imainun aín bashinubi 'umpax upíira 'ikë anu mitsu buánti 'ikën; 8 a mex ka anua trigo 'imainun cebada, uvas 'apákë 'itsaira 'ianan olivos higuera i 'apákë, 'imainun i bimiñu 'aisamaira anu 'ikë me upí a 'ikën. 9 A menu bëbatankëx kamina mitsux uinua karanuna piti biti 'ai kixun sinani bënëanan, bëtsi ñukamaribi biti kuëëni bënëtima 'ain; aín maxánua kamina hierro kakë manë panshian mëranan aín bashinuaribi cobre kakë manë upí akama biti 'ain. 10 Usa 'ain kamina anuxun mitsu 'inánkë ñu a piti 'itsaira 'ain kuëënkin anuxun Dios rabiti 'ikanin, mitsua me upí anbi 'inánkë kupí.
Diosmi manuama 'inun kixun Moisésnën Israel kama ka bana
11 Usa 'ain kamina Nukën 'Ibu Diosmi manútima bërúankakin ax kikësabiokin 'ati 'ain. 'Akin kamina ax kikësaibi oi 'iti aín bana a tanti 'ain, 'ën mitsu bërí kakë aín bana ënëx kikësabiokin 'akánti 'ain. 12 Usakin 'akëbëa mitsun a ñu piti 'itsaira 'ia pi puchati kamina xubu upíirabu 'atankëx anu 'iti 'ain, 13 anu 'ikin kamina mitsun vaca 'imainun ovejakama 'aisamaira 'inun 'uakamë 'ëomainun ka usaribiti kuri 'imainun manë panshian 'ianan kamabi min ñukamax 'itsaira 'ikëbë, 14 anun rabiti kamina nux kananuna ñuñuira 'ai kixun sinánkin Nukën 'Ibu Dios an Egipto menua tëmërakin ñu mëëiabi mitsu chikían ami manutima sinánti 'ain; 15 an ka anu uni 'ikëma ënën menma kuan 'aisama me anua pianankë runu 'ianan nibanta 'ëo 'imainun 'umpax ñuma me anunbi nu bëakëxa, 'aínbi ka mapara irunuabi 'umpax mitsun xëanun 'imiakëxa, 16 'imianan ka anu uni 'ikëma menuxun maná kakë piti nun chaitiokë kaman 'unánma piti a nu pimiakëxa, usakin 'akëx karanuna ami sinani 'isnuxun, ka nu tankin usakin 'akëxa. 17 Usa 'ain kamina mitsun ësokin sinántima 'ain: Nun kananuna ënë ñukama nun kushínbi bia kixun. 18 Usa 'ain kamina mitsun Diosmishi sinánti 'ain, an ka kushi okin mitsux mi kamabi ñu binux kushinun mitsu 'imiaxa, 'imikin ka ax kikësabiokin achúshiñu nukën chaitiokë kamabëtan 'asaribiokin 'axa.
19 Aínbi ka Nukën 'Ibu Diosmi manukuainxun mitsun, bëtsi dioskama rabia 'ën sinánkëxun mitsu 'atima okin këñuti 'ikën. 20 Usaribi okin ka Nukën 'Ibu Diosan anumi mitsux kuanti menu tsókë unikama 'aíma 'itánun maëmiti 'ikën, usakinribi ka Diosan kakësoi 'iama mitsu maënun 'imiti 'ikën, kixun ka Moisésnën kakëxa.