Moisésnën Israel kama bëtsi ñukama rabixunma 'anun kixun 'ësëkin ka bana
7
Nukën 'Ibu Dios an ka a 'inánkatsia kia me anu mitsux bëbai kuankëbëtan, mapai achúshi 'imainun rabë́ ëmakama mitsubëtan sënë́nma kushiirabu a mitsun ismainunbi chikínti 'ikën: Ax ka hititas, gergeseos, amorreos, cananeos, ferezeos, heveos 'imainun jebuseos, akama 'ikën. 2 Uinsaran kara Diosan a ëmakama mitsubëa 'akananun 'imia, anun abë 'akanankin 'atankëxun kamina atu nuibakin atubëtan añu ñubi 'ati sinántëkëntima 'ain. 3 'Imainun ka atun aintsisa 'inuxun mitsun bakë bëchikënën atun 'ini bëchikë bimainun uni bënakamanribi atun bëchikë 'ini chipashkama bitima 'ikën, 4 bikëxunbi ka atun mitsun bakë bëchikëkama Nukën 'Ibu rabiti ëmikin atun rabikë dioskama rabiti 'unánmiti 'ikën; usokin 'unánmikëbë atumi nishkin ka Nukën 'Ibu unix munuma bëkuishi bëpëkikë usokin bënë́kinshi maëkanun atu 'imiti 'ikën. 5 Usa 'ain kamina mitsun unikamabë mëskúti sinánkinma anuxua atun dios rabikin ñuina xarokëkama a rurupakin 'anan maxákama 'imainun upíirabu okin i tëakë a këñuanan anuxua bëtsi ñukamaribi rabikë a këñutanun xaroti 'ain. 6 Mitsux kamina ainan 'itia Nukën 'Ibun kaisa a 'ain; usa 'ikë ka Nukën 'Ibu Diosan achúshi ëma upíira 'inun mitsu 'imiaxa, usa 'aish kamina bëtsi menu 'ikë ëmakamasamaira upíira 'inun mitsu 'imiaxa.Diosan ñu 'inánkëxun bitsia usai Israel kama 'iti Moisésnën ka bana
7 Moisésnën ka amiribishi Israel unikama ësokin kakëxa: Nukën 'Ibun mitsu kaískë ax ka ëma upíira 'ianan, chaiira 'ikëa mitsu kaisama 'ikën. Usa 'ain kamina a ëmakamasama chukúmara 'ain. 8 Nukën 'Ibun ka Egipto menuax 'aisamaira tëmëraiabi mitsu chikíankëxa, 'imainun ka aín kushínbi 'apu faraónën 'ibuaxun ñu mëëmiabi mitsu chikíankëxa, usa 'ixun ka an mitsu nuibakin nun chaitiokëkama kásabiokin 'akëxa. 9 Asérabi kamina 'unánkanti 'ain, Nukën 'Ibu Dios ax ka asérabi Dios 'ikë kixun, usa 'ixun ka an aín chaitiokëkama bërí 'ama 'ixun aín rëbúnkikamaribi uikaman kara ax kikësabiokin aín bana 'aia a unikama nuibatia; 10 'aínbi ka uikaman kara aín bana kuaisamatania a unikama panákinma bënë́kinshi uisakin kara 'aisatania usokin 'ati 'ikën. 11 Usa 'ain kamina ax kikësabi oi 'iti bana 'imainun a tanti bana 'ën bërí nëtën mitsu kakë bana ënë tankin 'ati 'ain.
Moisésnën ax kikësabiokin 'aia ka Diosan mitsu 'akinti 'ikë kixun Israel unibu ka bana
12 Ësokin ka Moisésnën aín aintsi Israel unikama raíri kakëxa: Asérabi mitsun 'ën 'unánmikë bana ënëkama kikësabiokin 'akëbëtan ka Diosan an nun chaitiokëkamabëtan achúshi ñu 'akin kásabiokin mitsu 'akinti 'ikën. 13 'Akin ka an mitsu nuibakin 'uakamë 'ëoimi bëchipanun 'imianan mitsun bakë bëchikëkama upíokin sinánxuanan mitsun ñu 'apákë bitsia aribi 'anan trigo bimi 'imainun, uvas baka 'akë, 'imainun xëni, akëñunbi, 'anan mitsun vaca bakëkama 'imainun, ovejakama a kamabi a me 'inánnuxua nun chaitiokëkama ka a menua upí 'inun 'imiti 'ikën. 14 Mitsux kamina bëtsi unikama akësamaira okin Diosan 'akinkë 'iti 'ain; usa 'ain ka mitsun xanu achúshirabi tuañuma xanu 'imainun bëbu uníxribi achúshirabi bëchikëma uni 'itima 'ikën, 'imainun ka mitsun 'arakakë ñuinakamaxribi ain xanu tuaima 'imainun ain bënëribi bëchima 'itima 'ikën. 15 'Imainun ka Nukën 'Ibun mitsunua bëtsi bëtsi 'insín 'imainun bëtsi bëtsi ñu 'aisamakama Egipto menu 'ia 'ikëmi 'unánkë usakin mitsunu 'imitima 'ikën; usa 'aínbi ka a ñu kamanbi ax mitsumi nishkë unikama tëmëramiti 'ikën. 16 Usa 'ain kamina mitsun bëtsi menu 'ikë unikama Diosan 'anun 'amikëxun 'akin; nuibakinma këñuanan atún diosmabi rabikë a rabitima 'ain, usakin 'akin a rabi kamina mitsúxbi këñuti 'ain.
17 Mitsun kamina sinántima 'ain: Ënë unikamax ka nusamaira 'aish 'aisamaira 'ikë kixun. Ësakin sinani kamina ¿Uisaxun karanuna atu chikínti aín? kiax kitima 'ain. 18 ¡Usa aín kamina mix atumi rakuë́tima 'ain! Rakuë́kinma kamina Diosan ka 'apu faraón 'imainun egipcio unikama ismainunbi ñu chabu 'akëxa kixun sinánti 'ain; 19 mitsúnbi kamina bëtsi bëtsi ñu chaiirabu 'aia isakën, Nukën 'Ibu Diosan ka 'aisamaira tëmëraiabi Egipto menua chikinuxun ain, kushi mitsu ismikin usokin 'akëxa, usokin 'a 'ixun ka Nukën 'Ibun kamabi ëma amimi mitsux rakuëkë akama egipcio unikama 'asaribiokin 'ati 'ikën. 20 'Anan ka chaiira rakuëtanun atu 'imikin Nukën 'Ibun axa abáti sinanx unë́këkama a 'imainun, axa ñukëma aribi këñutanun 'imiti 'ikën. 21 Usa 'ain kamina atumi rakuë́tima 'ain, nukaman 'Ibu Dios kushiira ax, mitsubë 'ain ka atux mimi rakuë́ti 'ikën. 22 Mitsun a ëmakama 'aia ka munu 'anun Diosan mitsu 'amiti 'ikën; usa 'ain kamina a unikama abë 'akanankin 'abuinkinshi këñutima 'ain, usakinmi 'ashibuinxun këñúkëbë ka ñuina raëkëma 'uakamë 'ëoi 'aisamaira mitsu rapasubi ukinbi pitima 'ikën. 23 'Aínbi ka Diosan a menu 'ikë unikama 'anun 'amikin kamabi këñukin 'anun mitsu 'amiti 'ikën. 24 'Amikëxun 'akin kamina atun 'apukama kamabi mitsun kakësokin 'anun 'amiti 'ain, 'imainun ka mitsun usokin 'aia an sinánti uni ënë menu 'aíma 'iti 'ikën. 'Ianan ka atun ëma achúshinënbi mitsun 'akëxun tënëtima 'ikën, usakin 'akin kamina achúshirabi bërutanuma këñuti 'ain. 25 'Anan kamina mitsúnbi atun diosmabi rabikë ñukamaribi në́nti 'ain, 'aínbi kamina ami bikë kuri 'imainun manë panshian akama bisa tantima 'ain; usakin 'aibi 'atima ñu 'ati sinania ka Nukën 'Ibun a upí istima 'ikën. 26 Usa 'ain kamina Diosan mitsu 'axuma 'anun kakë ñukama a mitsun xubunu buántima 'ain, usokinmi uania ka Diosan mitsu 'aisama oti 'iti 'ikën. A ñukamax ka 'aisama okë 'iti 'ikën, usa 'ikë kamina a ñukama 'aisama ka kixun isti 'ain kixun ka Moisésnën kakëxa.