—Minbi kamina maxá pará rabë́ bëráma 'ën mi 'inánkësa usarabi okin abëtsinkin bëti 'ain, bëxunkëxun kana 'ën usai 'iti bana bëráma kuënëokëmi tukakë, usaribi okin a banabi kuënëotëkënti 'ain. 2 'Imainun kamina imë́ishi pëkarakëma 'aínshi aín bashi Sinaí kakë anu mapërakëti kuantëkënux mëníokati 'ain, mëníoka kiani mi kuankë kana aín bashi chairui sënënakëkë anua mi istisa tanin. 3 Uinu 'ikë uníxbi ka mix kuankëbë mibë kuantima 'ikën, uibi kana bashi anua kuania istisamatanin, 'imainun kana oveja 'imainun, vacakama abi aín bashi bëtánain anuxun pasto pi nitsia istisama tanin. 4 Usakin kakëxun ka Moisésnën maxá rabë́ bëráma Diosan 'inánkë usabi okin mëníokëxa, mëníonx ka pëkarakëma 'aínshi maxá pará okían ónkë a bibiani bashi Sinaí anu Nukën 'Ibun kakësabi oi kuankëxa. 5 Usa 'ain ka Nukën 'Ibu kuin mëu ubuax Moisésbë anu 'iakëxa, anu 'ixun ka aín anë ñuikin Diosan kakëxa. 6 Kai ka Moisésnën kuanun a inubuini munuma banai ësai Dios kiakëxa:

—¡'Ëx kana Israel unikaman 'Ibu 'ain! ¡'Ëx kana Dios ira 'ain, usa 'ixun kana 'ën anë mitsu 'unánmin! ¡'Ëx Dios 'ixun kana nuibakin mitsun nuibakëxunmabi 'akinin, usa 'ixun kana 'atima okima unikama nuibatin usokëxun tani ka unikama 'ëmi katamëti 'ikën! 7 'Imainun kana bërámabi usa 'ia 'aish xënibua 'aínbi usabi 'ixun nuibakin uin kara bana kuakinma ñu 'atima 'ai 'ëmi 'uchaia akama mëníoxunti 'ain; 'aínbi kana usashi ënkinma axa 'uchakë uni 'atima oti 'ain, usakin 'anan kana aín papa 'uchakë kupínribi aín bakë bëchikëkama 'imainun aín babakama 'ianan aín bëchikënën bëchikënëan bakë bëchipakëkamaribi 'atima oti 'ain. 8 Ësakin kakëxun kuati bënëtishi tsóbukin aín bëmánanën me tikai 'ikin ka Moisésnën Nukën 'Ibu rabikin, 9 ësakin kakëxa:

—¡'Ën 'Ibu! ¡'Ën 'Ibu! Asérabi nu nuibati kamina nu kuankëbë nubë kuanti 'ain. Ënë unikaman ka asérabi aín sinan iruarakin bana kuakëma 'ikën, 'aínbi kamina nux mimi 'uchakë a tërënkin minan 'inun nu 'imiti 'ain.

10 Nukën 'Ibun ka amiribishi Moisés kakëxa:

—Bërí mi kamainun kamina kuati 'ain, mi 'imainun min aintsikamabëtan kana achúshi ñu 'ain. 'Anan kana bëtsi menu tsókë unikamanbia 'ama ñu upíira 'ati 'ain, 'aia ka axa mitsu rapasu tsókë unikamanribi 'ën mitsunu ñu upíira unin iskëma ñu 'aia isti 'ikën. 11 'Ën kakësokinmi bërí mitsun 'akëbëtan kana mitsun ismainunbi anumi tsóti kuankanti me anu 'ikë unikama kuantanun chikínti 'ain, ax ka amorreos, cananeos, hititas, ferezeos, heveos 'imainun jebuseos unikama a 'ikën. 12 A menu atsínxun kamina a unikaman mitsubëtan ñu 'akatsikixun ubíokin kakëxunbi 'atima 'ain, atun 'akë ñu 'atima 'aimi atux 'ikësaribiti 'uchatima kupín. 13 Usai atubë 'ikinma kamina añu ñubi 'aíma 'itánun mitsun ira atúan a rabikë maxá 'imainun i upíira akama këñuti 'ain. 14 Usa 'ain kamina bëtsi dios rabitima 'ain, 'ëx kana mitsun 'Ibu an ñu 'atima 'aisama okin mitsu bërúankë a 'ain. 'Ën anëx ka Dios an ñu 'atima 'aisama okin bërúankë a 'ikën. 15 A menu atsinia anu 'ikë unikaman mitsubëtan ñu 'akatsikixun kakëxunbi kamina 'akantima 'ain, usakin kakima mitsun atubëtan 'akëxunbi ka mitsu atun dios rabikin pitia 'akë 'imainun a 'inántia 'akë ñukama 'akinkin mitsu 'uchamiti 'ikën, 16 usokin 'akima ka atun 'ini bëchikë xanukama mitsun bëchikë bëbu aín xanu 'inun 'inánti 'ikën, 'inánkëxun atun rabikë aín dios aribi rabi ka mitsun bëchikëkama 'ëmi 'uchati 'ikën. 17 Uinsaranbi kamina mitsun manë charoxun unisa okin 'atankëxun a rabitima 'ain.

18 Anun chamiti ñu këñuma 'akë pán piti fiesta kamina 'ati 'ain, 'ën mi kakësabiokin 'akin kamina anun chamiti ñukëñunma 'akë pán mapai achúshi 'imainun rabë́ nëtë 'imikin piti 'ain. Anunmi Egipto menuax chikía bari a 'uxë 'irutëkënkë anun kamina a sinánkin fiesta 'ati 'ain. 19 Kamabi mitsun rëkuë́n bakë bëchikë bëbukamax ka 'ënan 'iti 'ikën, 'imainun ka mitsun vaca, oveja, 'imainun cabrakama aín rëkuë́n tuá aín bënëkamaxribi 'ënan 'iti 'ikën. 20 'Aínbi kamina burro xanúan rëkuë́onkin tuákë axa aín bënë 'ain, a 'inankinma carneronën tuá achúshi 'inánkin cabranën tuá a 'inántima 'ain. Usa 'ain kamina añubi 'inánkima burron tuá aín tëxanu tëtsëkaxun rëtëti 'ain, usaribi okin kamina mitsun rëkuë́n bakë bëchikëkama 'inankinma 'ë 'inaishiti nankë a uinu kara nanti 'ikë anu nanxunti 'ain. Uíxbi ka 'ë rabi ñu bëíma 'utima 'ikën. 21 Mitsun kamina mapai achúshi 'imainun achúshi nëtë 'imikin ñu mëëti 'ain, 'aínbi kamina achúshi nëtë 'irutëkënkë anun tantiti 'ain, a nëtën mitsun ñu 'apákë aín bimi bianan ñu mëëti 'aínbi kamina a nëtën 'atima 'ain. 22 Kamina mapai achúshi 'imainun achúshi nëtë a sinánkin anumi mitsun ñu 'apákë ax pain bimikë bikë aín fiesta 'ianan, a baritian mi mitsun trigo bimi bikin sënë́onkë a 'iti 'ikë kixun ka Diosan kakëxa. 23 Kamabi unikamax ka achúshi baritia 'ikëtibi, rabë́ 'imainun achúshiti 'ë rabinux timë́ti 'ikën, 'ëx kana Israel unikaman 'Ibu 'ain. 24 'Ën kana mitsun ismainunbi anumi kuankanti menu 'ikë bëtsi unikama chikínti 'ain, chikínxun kana a me mitsunan 'inun 'inánti 'ain. Usa 'ain ka uinu 'ikë unínbi mitsun me bikatsi 'itima 'ikën, anuxun kamina achúshi baritia 'ikëtibi 'ë rabë́ 'imainun achúshi okin rabiti 'ain.

25 Ñuina rëtankëxun xarokin kamina aín imi këñun 'atima 'ain, 'imainun kamina pán anun chamiti ñukëñun 'akë aribi 'atima 'ain, 'ianan ka Pascua nëtë inúkin ñuina nami xarokë ax pëkarakëbëtan 'anuxun nankë 'itima 'ikën. 26 Mitsun ñu 'apákë ax pain bimikë aín bimi upíirabu bitankëxun kamina anuxun 'ë rabiti xubusokin 'akë anu uanti 'ain. 'Anan kamina cabranën tuá aín bënë rëtankëxun aín titan xuma bixun anun 'arutima 'ain.

27 Usa 'ain ka Nukën 'Ibun Moisés ësakin kakëxa: Ënë banakama kamina kuënëoti 'ain, ax ka achúshi ñu këñutima okin mi 'imainun israel unikamabëtan 'akë ñui kikë bana a 'ikën. 28 Usa 'ain ka Nukën 'Ibubë Moisés cuarenta nëtë 'imainun cuarenta imë́ aín bashi Sinaí kakë anu bërúakëxa anuxun ka añubi pima 'ianan xëama 'ikën. Anu 'ixun ka maxá pará anu këñutima okin ñuikë bana, mapai rabëbëtan sënën 'itánun kuënëokëxa.

29 Usakin 'atankëx ka aín bashi Sinaí kakë anuax Moisés taramëbuakëxa, anua usai 'iti bana maxá pará rabë́nu kuënëokë a bëi ka uakëxa, usai anuax ukinbi ka Moisésnën Nukën 'Ibubë banakë 'aían ain bëmánan chabáchabákikë 'ikëbi 'unánma 'ikën. 30 Usai aín bëmánan chabáchabákikë 'aish aia Moisés iskin ka Aarón 'imainun Israel unikaman ami rakuë́kin Moisés 'urama oma 'ikën. 31 Usai 'ia ka Moisésnën Aarón 'imainun Israel unikaman kushibu abë bananua unun kixun kuëankëxa, kuënkë́xa anu ukëbë ka Moisés atubë banakëxa. 32 Atubë pain banakë basiramashi ka Israel unikamaxribi anu rikiankëxa, rikiania ka Moisésnën usai 'iti banakama aín bashinuxun Nukën 'Ibun kakëkama ñuixunkin kakëxa. 33 Usakin atu bana ñuixuni sënë́nishi ka Moisés chupa achúshitan bëmápuküakëxa.

34 Uínsaran kara anuaxa Nukën 'Ibubë banati xubusa okin chupa 'akë anu atsinia, a nëtën ishi ka Moisés anúan bëmápukukë chupa bëókiakëxa anúan ax chikitëkënti 'itámainun. Usai 'itankëxun ka Moisésnën usakin atu kanun Nukën 'Ibun kakë banakama Israel unikama ñuixuankëxa. 35 'Aínbi ka Israel unikaman Moisésnën bëmánan ichutia isakëxa, iskëbë ka Moisés aín bëmánan chabákikëbë amiribishi chupan bëmápuküakëxa, anúan Nukën 'Ibubë banai atsíntëkënti nëtë 'itámainun.