—Ënuax kuankin kamina Egipto menuami chikínbëtsinkin bëkë unikama buánti 'ain, 'ën min chaitiokë Abraham, Isaac 'imainun Jacob akama aín rëbúnki 'inánuxun ká me anu kamina kuanti 'ain. 2 'Ën ángel kana an mitsu kuania rëkuëonxun buánti xuti 'ain. 'Imainun kana 'ën a menua 'ikë ëmakama cananeos, amorreokama, hititas, ferezeos, heveos 'imainun jebuseos akaman menumi mitsux bukunun chikínti 'ain. 3 A mex ka anu a piti ñu 'aisamaira 'imainun buna rëpa 'aisamaira 'umpax iskësa 'ianan anu tsótisa upí 'ianan anuxun kamabi ñuina kanionan anu ñu 'apátisa 'ikën. 'Aínbi kana 'ëx mitsubë kuantima 'ain, mitsubë kuankinbi atuna mitsu këñunun 'imin. Mitsux kamina bana kuakëma unibuira 'ain.

4 Ësakin Diosan kakëx utankëxun ka Moisésnën Israel unikama bana ñuixuankëxa. Ñuixunkëxun kuati ka Israel unibu masá nuituti nitë́xëkin atun tëñutikama uínbi tëñuama 'ikën, 5 usakian kanun ka Nukën 'Ibun Moisés kakë 'iakëxa:

—Israel unikama kamina kati 'ain: Mitsux kamina sinan iruarakë unibuira 'ain. ¡'Ëx mitsubë 'ixun kana bënë́kinshi mitsu këñúkë 'itsian! Usa 'ain kamina bëríbi mitsun tëñuti 'imainun mëñusuti akama uisa karana mitsu oi isnun pañutima 'ain. 6 Usakin kanuan kakëxun ka aín bashi Horeb, kakë anuxun Israel unikaman atúan pañukin aín naminu 'akë ñukama ëankëxa.

7 Usa 'ain ka Moisésnën xubu chukúma 'akë anua 'ikankë a 'uri takumiakëxa, takumitankëxun ka anuax Nukën 'Ibubë mërananti xubu kakin anëakëxa. Uix kara Diosbë banakatsia, ax ka xubu chukúma 'uri 'ikë anu kuantankëx abë banakëxa. 8 'Imainun ka Moisés anuax Diosbë mërananti xubu chukúma anu atsini kuankëbë ka kamabi unix aín xubusa okin 'akë aín xëkuënubi sëtëakëxa, sëtë́xun ka Moisés xubu chukúmasa anu atsinkiani nëtëti kuania iskankëxa. 9 Usai Moisés atsínkëbëishi ka achúshi kuin ubútankëx anua atsínkë xëkuënu nirakëakëxa, nirakëkëbë ka Nukën 'Ibu Moisésbë banakëxa. 10 Usaia anuax Diosbë mërananti xubu chukúma aín xëkuënu kuin nirakëtia isi ka kamabi uni aín xubu xëkuë anuaxbi rantinpuruni tsóbukin Dios rabikankëxa.

11 Diosbë banai ka Moisés ain 'unánkë unibëa uni isánani banakësa 'inun banakëxa, usai anuax banatankëx ka Moisés anua 'ikankë anubi kuantëkëankëxa. 'Aínbi ka uni bëna Josué kakë Nunnën bëchikë an 'akinkë xubusa okían 'akë a bërúankë ax uínsaranbi anuax kuaiama 'ikën.

12 Ësakin ka Moisésnën Nukën 'Ibu kakëxa:

—Ka kuat, min kamina ënë unikama bërúanun 'ë kan, 'aínbi kamina uin kara 'ë 'akinti 'ikë kixun 'ë kakëma 'ain. 'Imainun kamina 'ëx isana upí sinánñu 'aish 'itsaira min nuibaisa 'ai kixun 'ë kan kanan kamina 'ëx isana min kuëënkësabi okin 'ai kixun 'ë kan. 13 Min nu 'akinsa tankin kamina añu 'ati kaina kuëëni 'ë asérabi kati 'ain, usakinmi kakëxun kana 'ënribi mi nuibati 'ain. 'Imainun kamina ënë unikamax ka min unibu 'ikë kixun sinánti 'ain. 14 Ësokian kakëxun ka Nukën 'Ibun kakëxa:

—'Ënbi kana mitsu kuania buani usa 'ain kamina 'aisamaira okin sinani bënëtima 'ain. 15 Kakëxun ka Moisésnën kakëxa:

—'Aínbi kamina mix nubë kuankinma ënuax kuantanun nu xutima 'ain. 16 Mixmi nubë kuankëbëtama kara uisaxun, ¿min uni Israelkama 'imainun 'ënribi min kamina nu nuibakin 'akini kixun 'unánti 'ain? Usakin min unikama 'imainun 'ë 'akinkëx kananuna bëtsi menu 'ikë unikamasamaira 'iti 'ain. 17 Kakëxun ka Diosan kakëxa:

—Asabi ka usa 'ain kana mitsubë kuanti 'ain, asérabi kana 'ën mi nuibatin 'imainun kana upí uni 'ikë mix kikësabiokin 'ën mi 'akinti 'ain kixun ka Nukën 'Ibun kakëxa.

18 —¡Usakian kakëxun ka Moisésnën Dios kakëxa!

—'Ë kamina min kushi ismiti 'ain.

19 'Aínbi ka Nukën 'Ibun ësokin kakëxa:

—'Ëx kana nuibanairakë 'ain, usa 'ain kana uikama karana 'akinsa tani akama 'akinti 'ain. 'Akianan kana mi nuibakin 'ën anëmi ñuinun mi 'imianan uikama karana nuibati akama nuibati 'ain. 20 'Aínbi kana mi kain 'ën bëmánan kamina istima 'ain ui unin kara 'ën bëmána isia ax ka bamakë 'iti 'ikën. 21 Kanan ka ësakinribi Nukën 'Ibun kakëxa:

—Ka kuat, anu 'ëx 'ikë 'urama ënu ka mapara achúshi 'ikën. Akamanan kamina nirakëti 'ain. 22 Usa 'ain kana 'ëx mi rapasu inúkin, mapara kini mëu nankin mi 'ën mëkënan bëpanti 'ain. 23 Usokin inúkin mi 'atankëxun 'ën mëkën bikëbëtan kamina 'ën kaxuishi isti 'ain 'aínbi kamina 'ën bëmánan istima 'ain.