—Moisésnën ka nu Egipto menua chikínbëtsinkin bëaxa. 'Aínbi kananuna uisai kara 'iaxa kixun 'unanima, usa 'ain kamina achúshi dios an nu bërúanxun buánti 'axúnti 'ai kixun ka kakankëxa. 2 Kakëxun ka Aarónën atu asabi ka kixun kakëxa:

—Mitsun xanukama 'imainun min bëchikë bëbu min bëchikë xanu akamaxa pabinu paruntamëkë kuri 'akë akamina timëbëtsinkin 'ë bëxúnti 'ain. 3 Ësakian Aarónën kakëxun ka kamabi Israel unikaman, aín pabinu pañukë kuri 'akë a timëbiankin Aarón buánxuankëxa, 4 buánxunkëxun timëxun ka kurikama charokëxa, charatia ka vaca bëna tankin i 'akë anu 'aruakëxa, 'arukëxa xëntsai 'ikë ax 'iruia ka manë xëta okë cincel anun ramëniokin vacabi 'inun upíokin mëníokëxa. Mëníotankëxun ka atu 'inánkëx ka Israel unikamax kiakëxa:

—Ënëx ka dios an Egipto menua nukama chikínbëtsinkin bëkë a 'ikën. 5 Usai kia kuankin ka Aarónën vaca bakë tankin 'akë kuri a maxá bukunrukin 'atankëxun anu nitsíankëxa, nitsintankëx ka unikama kai munuma banai kuëníshkin atu kakëxa:

—Imë́ishi kananuna Nukën 'Ibu rabikin achúshi fiesta 'ati 'ain.

6 Ësakian koonkë pëkarakëma 'aínshi nirutankëxun ka kamaxunbi atun ñu 'atima 'ai 'uchakë kupí Dios ñuina rëxun 'aímai këñutanun xaroxuankëxa. Usakin pain 'atankëxun ka kamabi Israel unikaman timëkamë 'ëoxun bukubuxun pianan xëakëxa. Usakin xëatankëx ka raírinëx ransakëxa.

7 Atúxa usai 'ikëbëtan ka Nukën 'Ibun Moisés kakëxa:

—Ënuax kuabutankëxun kamina Egipto menuami bëkë unikaman ka 'atima ñu 'ai 'uchakin 'ën kakë bana a kuaisama tanxa isi kuanti 'ain. 8 Bënëkinshi ka atun usai 'iti 'ën kakë banakama manuxun bëtsi ñu 'axa. 'Akin ka vaca bakë tankin 'akë kuri unioxa, usakin 'axun ñuina xaroxunkin rabi ka ësai kia: Ënëx ka Israel unibunën dios an nu Egipto menua bëkë a 'ikën kiax ka kikanxa. 9 Ësakinribi ka Nukën 'Ibun Moisés kakëxa:

—'Ënbi kana uisa kara ënë unikama 'ikë kixun 'unan, usa 'ixun ka 'ën bana kuakinma atun nuitu iruaratia. 10 ¡Usa 'ain kamina atumi nishkin këñunun 'ë ënti 'ain, bërí kana xuamati atumi nishin usa 'ain kana atu këñuti 'ain! 'Aínbi kana min rëbúnki kamaxa 'uakamë 'ëotanun 'imiti 'ain. 11 Ësai nishi kiabi ka abë banakin Moisésnën Dios ësokin kakëxa: ¿Nukën 'Ibu uisoti karamina min unibu Egipto menua min kushínbi chikínbëtsinkin bëtankëxun min ami nishkin këñuti 'ain? 12 ¿Uisoti karamina egipcio unibunëxa mi ñui Diosan ka anu uni 'ikëma menuxun këñuminuxun Israel unikama ënua chikínbiankin uanxa kinun këñumiti 'ain? Usa aín kamina nishkinbi; Israel unikama këñútimi sinánkë a ënti 'ain. 13 Min uni 'iakama Abraham, Isaac 'imainun Jacob akama kaimi kia bana akamina sinánti 'ain, 'ën kana min rëbúnkinëxa naínu 'ikë 'ispa tupuribi 'itánun, 'uákamë 'ëomikin 'ën mi ñuixunkë mekama min rëbúnki 'inánti 'ain kixun kamina atu kakën. 14 Ësakian Moisésnën kakëxun ka sinanakin Nukën 'Ibun Israel unikama këñunun 'imiama 'ikën.

15 Usa 'ain ka Moisés aín bashinuax utëkënkin maxá pará rabë́ Diosanbia aín bana amo rabë́bi kuënëoxun usai ax kikësa oí 'iti bana 'inánkë a bëi uakëxa. 16 Ax ka Diosanbi 'akë 'iakëxa 'imainun ka Diosanbia amo rabë́bi usaía ax kikësabi oi 'iti bana kuënëokë 'iakëxa. 17 Usai abë ukin an pain kuankin ka Josuénën Moisés kakëxa:

—'Aisamaira uni 'akanani 'ikësa 'inun anu 'ikë anuax sharatia kana kuatin. 18 'Aínbi ka Moisésnën kakëxa:

—'Ën kuakëx ka bëtsi kanantankëx kuëëni sharati 'ikëma 'ikën, 'imainun ka abë 'akanankin bëtsin kanánkëx masá nuituti sharati 'ikëma 'ikën, 'ën kuakëx ka uni paë́ax sharákësari 'ia. 19 Usaia anuax 'ikankë anu bëbakinbi ka Moisésnën unikaman vaca bakë kuri 'akë a rabia 'aisamaira sharati ransaia isakëxa, isi xuamati atumi nishkin ka Moisésnën maxá parusha rabë́ tuinbëtsinkë a bashi tanain tukibutanun niakëxa; 20 nikinshi ka vaca bakë tankin kuri 'akë a bitankëxun tsinu 'aruakëxa, 'arukëxa 'aímai xarátia ka bitankëxun putuakin rëankëxa, rëxun ka putuakë a 'umpaxnu mëskútanun sakakëxa; sakatankëxun ka Israel unikama kakëxa bërí kamina ënë 'umpax xëakanti 'ain kixun kakëxun ka xëakankëxa.

21 Usakin 'amitankëxun ka Moisésnën Aarón ami nishkin usakian 'akë a ñuikin kakëxa:

—¿Añu kara ënë unikaman mibëtan, minmi 'aisamaira okin 'uchaminun 'ax? 22 Kakëxun ka Aarónën kakëxa:

—'Ëmi kamina xuamati nishtima 'ain. Minbi kamina 'unan ënë unikamax ka 'atima ñuishi 'ati kuëënia. 23 Usa 'ixun ka atunbi 'ë kaxa: Kamina achúshi dios an nu rëkuë́nxun buánti 'axúnti 'ain, kananuna 'unanima an nu Egipto menua chikinbëtsinki bëkë Moisés kara uisai 'iaxa kixun. 24 Ësakian kakëxun kana 'ën: Kamaxunbia atun kuri timëbëtsinkin 'ë bëxunun kan, kakëxuan bëia kana tsi rëkirukënu purua purukëx ka charati achúshi ¡vaca bakë́sa 'inun 'iaxa kixun ka paránkin kakëxa!

25 Usaia 'ikë Moisésnën iskëxbi ka Israel unikama atúxbi bërúankakëmasa 'aish paë́nkë 'ikëa ami nishkë unin uxun ami kuainuxun 'aisa 'iakëxa, Aarónën upíokin bërúankëma 'aish ka usai 'iakëxa, 26 usai 'ikë isi anúan atun 'ikënu atsínkanti bai 'ipitiu nirakëkin ka atu kakëxa:

—Uikamax kara Nukën 'Ibu kuëënkësabi oí 'ia, akamax ka 'ëbë timë́ti 'ikën.

Kiaxa kikëbë ka kamabi Levitas unikamax Moisés anu 'ikë anu timë́akëxa. 27 Timë́kë ka atu Moisésnën kakëxa:

—Ësai ka Israel unibunën Dios kiaxa: Mikaman achúshi achúshinën kamina mitsun manë xëtokë bibiani anumi 'ikënu kuantankëxun, xëkuëtibi nirakëkin min aintsi 'ibu an ñu 'atima 'akë 'anan bëtsi unikamaribi 'anan min 'unánkë 'imainun axa mi rapasu 'ikë kamaribi 'ati 'ain.

28 Ësakian kakëxun ka Levitas unibunën Moisésnën kakësabiokin 'akëxa, a nëtënbi ka tres mil uni 'akëxa. 29 Usakin 'akë ka Moisésnën kakëxa:

—Bërí ka Nukën 'Ibun mitsu upíokin sinánxuanan sacerdote kamasa 'inun 'imia, mitsúnbi kamina bëtsían aín bëchikëbi 'amainun raírinën aín xukë́n 'ibubi 'an. Usa 'ain ka bërí Nukën 'Ibun mitsu upíokin sinánxunti 'ikën.

30 Usakin ónkë pëkarakëbëtan ka Moisésnën unikama kakëxa:

—Mitsux kamina 'atima ñuira 'ai chaiira 'uchakan, usa 'ain kana aín bashi mapërakëtankëx Diosbë banai kuanti 'ain, mitsux 'uchakë kupín kara uisokin Nukën 'Ibun 'ë kaia kuati kuanti 'ain.

31 Usokin atu kabiani amiribishi anua 'ikë anu mapërakëtankëxun ka Moisésnën Nukën 'Ibu ësokin kakëxa:

—Asérabi ka unikaman chaiira 'uchakin vaca bakë́sa okin kuri unioxa a ka Israel unikaman aín dios isa kixun kaxa. 32 'Aínbi kana 'ën atun 'uchami tërënxunun mi ñukáxuni uan; atun 'uchakë ¡tërëntisama tankin kamina 'ë 'ati 'ain 'anan kamina 'ën anë kirikanu kuënëokë aribi tërënti 'ain!

33 Kiabi ka Nukën 'Ibun kakëxa:

—Uikamax kara 'ëmi 'uchaxa aín anë kamaishi kana kirikanua tërënti 'ain. 34 Usa 'ain kamina ënë unikama a me 'inánnuxun mi kakë anu uanti 'ain. 'Ën ángel kana an mi rëkuë́n obianun xuti 'ain. 'Imainun kana uínsaran kara uni 'aisamaira tëmëramiti nëtë 'ia a nëtën, kana atun 'ucha kupín 'ën 'aisamaira tëmëramikin 'atima oti 'ain.

35 Usakin kakëxa Moisés aín bashinuax kuan ka Nukën 'Ibun achúshi 'insín a unikamanu xuakëxa, Aarónëan vaca bakë́sa okin 'akë kuri rabikë kupín ka Diosan 'atima okëxa.