Nukën 'Ibu Diosan bana kikësaibiira 'iti Moisés kia
6
Ënëx ka ax kikësabi oi 'iti bana, 'imainun a tanti bana, Diosan 'ën mitsu 'unánminun 'inánkë 'ikën, usa aín kamina anumi kuankanti me anuxunbi manukinma, a banakama mitsun tanti 'ain. 2 Usokin kamina mitsun Nukën 'Ibu Dios ami rabikanti ax kikësabiokin 'akánti 'ain, 'ai tsókin kamina, a tanti bana 'imainun ax kikësabi oí 'iti bana, 'ën 'unánmikë ënë mitsun bakë bëchikë 'imainun mitsun babakama 'unánmiti 'ain; usakin 'ai kamina 'itsa baritia a menu tsókanti 'ain. 3 Usa aín kamina, 'ën aintsi Israelkama mitsun, a bana tankin ax kikësabiokin 'ati 'ain. Usakin 'akëbë a mitsun 'ati ñukama upí kuankëbë kamina achúshi ëma 'ai ënë menu 'uakamë 'ëoti 'ain, anua a xëati ñu buna rëpasa 'aisamaira 'ianan a piti ñuribi 'aisamaira 'ikë kixuan Diosan mitsun chaitiokëkama ká anu kuanti 'ain.4 Israel unikama mitsun kamina 'ën kakëxun kuati 'ain, Nun 'Ibu Dios ax ka Nukën 'Ibu achúshishi 'aish ashi 'ikën. 5 Min 'Ibu Diosmi kamina asérabi kuëëni këmëima sinánti 'ain, usai 'i kamina ami katamëti ax kuëënkësabi 'oíshi 'iti 'ain. 6 'Ën mitsu bërí kakë banakama ënë kamina manukinma upíokin sinánkanti 'ain, 7 'imainun kamina mitsun bakë bëchikëkama ënkinma 'unamiti 'ain; a kamina uinu kara min xubu 'ikë anuxun 'anan uinu kaina kuani anuxunbi ñuixuanan uinu kaina uxi anuxun 'anan anumi 'uxonkë anuax pëkarakuatsinkëbë nirunuxun ñuixunti 'ain. 8 Ënë banakama, ax kikësabi oi 'iti, ënë upíokin 'unánkin sinani kamina anun mëtëkërëkikësa 'ianan anun 'unántiorakati min bëmánanu anun bëtëkërëkikësa 'iti 'ain, 9 'imainun kamina 'itánun 'anan mitsun xubu xëkuënuribi ënë bana kuënëoti 'ain.
Moisésnën a bana kuati usai 'iti ñuikin israel unibu 'ësëa bana
10 Nukën 'Ibu Dios an ka mitsu a me 'inánuxuan nukën chaitiokë Abraham, Isaac, Jacob akama sinanatëkëntima okin ka a asérabi mitsu 'inánti 'ikën. A ëmakamax ka chaiirabu 'aish upíirabu ëma 'ikën, usa 'aish ka mitsun 'ama a ëmakama 'ikën; 11 a xubukamanu ka kamabi ñu upíirabu mitsumi buákakin náanma 'ikën; anua 'umpax biti me kini a kamina mitsun naëama 'ain, 'imainun ka anu 'ikë uvas 'apákë 'imainun olivos anu 'ikëkama aribi mitsun 'apáma 'ikën, usa 'aínbi kamina anu kuantankëxun mitsun a ñukama panankima puchákin piti 'ain. 12 Usakin 'aínbi kamina mitsun 'Ibu ami manútima 'ain, an ka Egipto menuxun, ñu mëëi 'aisamaira tëmëraiabi mitsu chikíankëxa. 13 Usa 'ain kamina Nukën 'Ibu ashi rabianan ax kuëënkësa okinshi ñu 'axúnti 'ain, 'imainun kamina sinanatëkënkinma asérabi aín anëinshi ñu 'ati 'ain. 14 'Anan kamina mitsu rapasu 'ikë unikaman dios isa kixun rabikë ñu rabitima 'ain. 15 Nukën 'Ibu Dios an mitsu 'akinkë, ax ka ñu 'atima 'ati kuëënima, usa 'ixun ka mitsun ñu 'atima 'aia isi nishkin mitsúxmi ñankáishi 'i maë rakátanun mitsu 'imiti 'ikën.
16 Nukën 'Ibu Dios kamina uisa kara mi oia iskatsi kixun, Masá kakë me anuxun 'akansa okin tantima 'ain. 17 Usa 'ain kamina asérabi bëtsi ñu 'atimi bërúankakin ax kikësabi oi 'iti bana 'imainun a tanti bana Dios kikësabiokin 'ati 'ain. 18 Mitsun kamina ax kuëëntisabi okin upí ñuishi Nukën 'Ibun ismainun 'ati 'ain, usakin 'akëbëtan ka a 'inánnuxua Nukën 'Ibun mitsun chaitiokëkama ka me upí a mitsu 'inánti 'ikën, 19 usokinmi 'akëbëtan ka Nukën 'Ibun axa mitsubë 'akanainsa tankë unikamaribi ax kikësabiokin abámiti 'ikën.
20 Uínsaran kara mitsun bakë bëchikëkaman mitsu ñukatia: ¿Uisa kikë kara Diosan ax kikësai 'iti bana 'imainun a tanti banakama Nukën 'Ibu Dios kia bana ax 'ik? 21 kixun ñukákëxun kamina mitsun ñuixunti 'ain: Nukën 'Ibu Dios an kamabi ñu nu 'akinkë ka faraónën Egipto menuxun tëmëramikin ñu mëëmiabi aín kushinbi nukama anua chikíankëxa. 22 Nukaman kananuna isakën bëtsi bëtsi ñu chaiirabu 'akian Nukën 'Ibun Egipto menu 'ikë 'apu aín xubunubi bëtsi bëtsi ñu 'aia isakën; 23 usakin atunu 'aia 'isia ka Diosan anuabi nu chikínbëtsinkin a 'inánnuxua nun chaitiokëkama ka me a binun nu bëakëxa. 24 Usokin bëtankëxun ka Nukën 'Ibu Diosan nukamanu ax kikësabi oi 'iti bana a 'unáni ami sinania iskin nu 'akinkëx kananuna upí 'iti 'ain, 'imainun ka bërí 'akësaribi okin anbi nu bërúanuxun 'aia. 25 Usokin aín bana kikësokinbi 'akëbë ka nun 'ati ñukamax upí 'iti 'ikën, usa 'ain kananuna ax kikësabiokin aín bana bëruanxun 'ati 'ain, Nukën 'Ibu Diosan usakin 'anun 'ën mitsu kanun kakësabiokin, kixun ka Moisésnën atu kakëxa.