Moisésnën Israel unikama usaía 'iti ñuixunkin 'ësëkin ká bana
4
Bërí kamina Israel unikama mitsun kuati 'ain, ax kikësaibi 'iti bana 'ën mitsu 'unánmikë ami kuanxun ax kikësabiokin 'akëbëtan ka a 'inánnuxua Diosan nun chaitiokëkama ka a me mitsu 'inántankëxun anuax upitax tsónun mitsu 'imiti 'ikën. 2 Kamina ënë banakama iskinbi ax kikësama okin bëtsi banakëñun mëskukima 'anan achúshi banarabi bikuankima ax kikësabiokin 'akin ëntima 'ain, 'ën mitsu kakësabiokin; 'anan kamina ax kikësaibi oí 'iti Dios kia bana usaibi a menu tsókanti 'ain. 3 Mitsúnbi kamina uisakin kara Israel unikama Nukën 'Ibun 'amikëxun Baal-peor anuxun anua 'ikë unikama këñunbi atun rabikë dios akama këñunbi këñuia isakën; 4 'aínbi ka uikamax kara asérabi ami katamëaxa akamax kuni bamakëma bëríbi tsotia.5 'Ën kana mitsu usai 'iti 'imainun ax kikësai 'iti bana Diosan mitsu kanun 'ë kakë banakama a ñuixuan, usa 'ain kamina a menu tsóxun ax kikësokinbi 'akánti 'ain. 6 Usakin mitsun a banakama kikësokin 'ai sinánñuirabu 'ianan ñu 'ati 'unáinrabu 'inun mitsu 'imikëbë ka bëtsi menu tsókë unikamax kiti 'ikën: Israel unikamax ka ëma chaiira 'ianan sinánñuira unibu 'ikë kiax kiti 'ikën 7 ¿Uinu 'ikë bëtsi menu 'ikë unikamax kara kushiira diosñu nu 'akësaribi okin an atu 'akintiñu 'iti 'ik? 8 ¿Bëtsi menu 'ikë unikamax kara asérabi ax kikësabi oi 'iti bana 'ën mitsu bërí 'unánmikë ësaribi banañu 'iti 'ik? 9 Usa 'ain kamina mitsu 'akinkia Diosan 'aia iskë ñukama, uinsaranbi manukinma abi sinánkin; mitsun bakë bëchikë 'imainun mitsun babakamaribi ñuixunti 'ain.
Moisésnën 'ain bashi Sinaí anuxun unikama Dios kikë bana sinánmikin katëkëan bana
10 A nëtë kamami mitsux aín bashi Sinaí kakë anu 'ain ka Nukën 'Ibu Diosan ësokin 'ë kakëxa: Kamabi unikama kamina 'ën bana kuakin 'unánkian uisakinra kara kamabi nëtën ënë menu tsókin 'ain bakë bëchikamanribi atun 'akësaribi okin 'anun 'unánmiti 'ikën. 11 Mitsúxmi aín bashi Sinaí kakë a 'urama 'ain ka anuax tsi rëkiruia iskësa 'inun a manámi kuarui anuax kuin xapu 'unënkësa 'ianan tunan 'inun 'iakëxa; 12 usaía 'ikëbë ka Nukën 'Ibu tsi rëkirukësa a mëuküax mitsu kai banakëxa. Mitsúnbi kamina ax banaia kuakën, aín bana kuakinbi kamina, aín nami isanan a ñu ñubi mëratia iskanma 'ain. 13 Nukën 'Ibunbi ka mitsu 'unánmiakëxa achúshi ñu 'akin ax ka mapai rabë́ bana maxá paránu kuënëokë ax kikësaibi oi 'ikin mitsun a tanti bana 'iakëxa. 14 'Anan ka 'ë a tanti bana 'imainun ax kikësoi 'iti bana anumi kuanti me anu kuantankëxun mitsu anuxun ax kikësabiokin 'ati 'unánminun 'ë kakëxa.
Moisésnën Israel unikama Dios isa kixun bëtsi ñu uniotankëxun rabixuma 'anun kixun katëkëan bana
15 Amiribishi ka Moisésnën Israel unikama katëkëankëxa: A nëtë́an nukamabë Dios tsi rëkirukësa nëbëtsinuax banai aín bashi Sinaí kakë anuax kikëbëtan kamina a ñu ñubi iskanma 'ain. Usa 'ain kamina bëruinra okanti 'ain, 16 bërúankanan kamina uisa ñubi uniokin uni tankin 'anan xanu tankinribi uniotima 'ain, 17 'anan kamina ñuina tankin unionan ñuina pëchiu tankinribi 'atima 'ain, 18 axa pukun niríkë ñuinakama tankin 'anan kamina bakanu 'ikë ñuina tankinribi 'atima 'ain. 19 'Imainun kamina manámi bësukin naínua iskin bari, 'uxë 'ispakama, 'imainun uisa ñukama kara anu 'ikë akama iskin a ñukama rabiti sinántima 'ain, Diosan ka uisa ñu kara anu 'ikë abi kamabi uninan 'inun uniokëxa.
20 Usokin a ñukama unio 'ixun ka Nukën 'Ibun mitsu Egipto menuax 'aisamaira ñu mëëi anuxun manë xaroti 'akë anuax 'ikësai tëmëraiabi Diosan chikínxun ain uni 'inun mitsu 'imiakëxa, usa 'ikë ka ain uni 'inun nu 'imiaxa. 21 'Aínbi ka Nukën 'Ibun mitsun 'ucha kupí 'ëmi nishkin 'ëx isana Jordán kakë baka a sikatima 'ianan a 'inánuxun ka me upí anu bëbatima 'ai kixun 'ë kakëxa. 22 Usa 'ain kana ënë me Moab kakë ënuaxbi ñui Jordán kakë baka a mitsubë sikarakëkiani kuantima 'ain, usa 'ain kamina mitsuxëshi kuantankëxun me upíirakama a bitsi kuanti 'ain. 23 'Aínbi kamina anu kuantankëxun Diosan mitsubëtan achúshi ñu 'akë a manutima 'ain. Manukin kamina a rabinuxun ñu unionan uisa ñubi tankin Diosan a 'axuma 'anun mitsu kakë a 'atima 'ain, 24 mitsun 'Ibu Dios ax ka achúshi Dios an aín unikaman ñu 'atima 'ati kuëënxunkëma a 'ikën, ¡an ka mitsun ñu 'atima 'aia iskin tsi rëkirukënëan ñu nënkin këñukësa usaribi okin 'ati 'ikën!
25 'Itsa baritia a menu tsókin mitsun bakë bëchikënën bëchikë mitsun baba atúnribi Dios rabiti ënkin bëtsi ñubi uniotankëxun a rabitima 'ikën, usokin 'ai ami 'uchaia isi ka Dios mitsun 'akë ñu kuëënima nishti 'ikën, 26 'ën kana bërí mitsu naíkamë 'ëo 'imainun men unin kuakësa 'itanua kuamainun kain, 'aínbi kamina mitsux 'ën kakë bana kikësabiokin 'aíma anumi tsókankë me Jordán kakë baka 'ukëmanan 'itsama baritia tsókanti 'ain. Anuax ka 'itsama baritiashi tsótankëx raírinëx ñuti 'ikën.
27 Nukën 'Ibun ka anumi 'ikankë me anua bëtsi bëtsi menu 'ikë unibë mëskutimi abístanun mitsu 'imiti 'ikën, 'imikëbë ka 'itsamashi mitsun aintsi a menubi tsóti bërúti 'ikën. 28 Usai anuax abístankëxun kamina unínbia 'akë i 'imainun maxax 'akë a rabinuxun 'ain, a ñukaman ka isanan, kuanan pianan kaima 'ianan ka uínima. 29 'Aínbi kamina anua usa ñukama 'aínbi anuxun Dios kuëënkësabi oi ami katamëkin min nuitunënbi sinánkin ax kuënkësabi okinshi 'aia, ka mitsu 'akinti 'ikën. 30 Uínsaran kaina mitsux bëtsi ñu rabi tëmëratankëxbi amiribishi a ëni Nukën 'Ibumi sinanatëkënkani anun ka 31 an ka nuibanairakë 'ixun nuibakin, 'atima otankëxunbi mitsu ëntima 'ikën, usa 'ixun ka manukima nun chaitiokëkama sinántëkëntima okin kásabiokin asérabi ax kiásabiokin 'ati 'ikën.
32 Mitsun kamina ësokin sinánti 'ain, bërámabi nëtë ióñu 'ia 'imainun, Diosan ënë nëtënu uni uniotabakin unio; a kamina mitsun kamabi menu 'ikë unikama atunuribi kara Israel menu 'ikësaribiti Diosan 'akinkëx ñu 'iakëxa kixun ñukáti 'ain. 33 ¿Anu kara bëtsi menu 'ikë ëma an mitsun kuakësa okin, Diosan tsi rëkirukësa nëbë́tsinuxun kakëxun kuatíbi nux 'ikësai bamakëma 'iti 'ik? 34 ¿Anu kara bëtsi dios an ëma achúshi kaískin bëtsi ëmakama nëbë́tsinuxun, 'itsaira ñu 'anan atun iskëma, bëtsi bëtsi ñu 'akin atu rakuëmikin aín kushínbi Egipto menuxun nukama chikínbëtsinkin Diosan bëa usaribi okin 'akë 'iti 'ik? 35 Ax ka mitsun unánun usakin Nukën 'Ibu Diosan 'a 'ikën, 'imainun ka bëtsi Dios asérabi asaribi 'aíma 'ikën. 36 Ax ka mitsu naínuxunbi usaími 'iti banakama 'unánmi kiakëxa, 'imainun ka menuxunbi aín kushi ismikin tsi rëkirukësa 'inun mëramiakëxa, mërami anuax kia kananuna tsi rëkirukësa nëbë́tsinua aín bana kuakën. 37 An ka nun chaitiokëkama nuibakëxa, 'imainun ka aín rëbúnkikamaribi ainan 'inun kaískin, aín kushínbi Egipto menua chikíankëxa. 38 Chikínkin ka mitsun ismainunbi a menu 'ikë unikamaxa 'aisamaira 'ianan mitsusama nun titikaisama kushiirabu 'aínbi, anu kuantankëxun atun me binun kiakëxa, usa 'ain kamina bërí a me mitsunan 'inun anu kuantankëxun bitsi kuanti 'ain.
39 Usa 'ain kamina a banakama upíokin 'unánkin manukima sinánti 'ain, naínu 'ianan ka menuribi, asaribi bëtsi Dios 'aíma 'ikën. 40 Mitsun kamina a tanti bana 'imainun ax kikësabi oi 'iti 'ën bërí mitsu ñuixunkë bana ënë tanti 'ain, tani kamina min rëbúnki kamabëbi 'itsa baritia Diosan mitsu 'inánti me anu xënibua 'aínbi tsóti 'ain, kixun ka Moisésnën atu kakëxa.