3 Mitsun kamina min papa bana kuanan min titan banaribi kuati 'ain.

'Imainun kamina anun ñu mëëtima nëtë 'ikëbë anun tantiti 'ain. 'Ëx kana mitsun Dios 'ain.

4 Usa 'ain kamina a rabinuxun bëtsi ñu uniotima 'ain, 'imainun kamina dios isa kixun a rabinuxun manë charoxun uniotima 'ain. 'Ëx kana mitsun Dios 'ain.

5 Uínsaran kaina mitsun a ñukama 'ë 'axunkin ñuina anun mëníonanti 'akin xaroin, anun kamina 'ëx kuëëntisabi okin 'anan unikama kuëëntisabi okin 'akánti 'ain. 6 Ñuina 'ë xaroxunti rëxun kamina a nëtënbi piti 'ain, 'anan ka tëxëia noonkë aribi pëkarakëbëtan piti 'ain, 'aínbi ka tëxëtëkënkë a pëkaratëkënkë anun xarokë 'iti 'ikën. 7 Uin kara 'ë 'axunkin xarokë ñuina nami a rabë́ 'imainun achúshi nëtë 'inúkë 'aínbi pia, ax ka upíokin iskëma 'iti 'ikën, usa 'ikë ka Diosanribi kuëntima 'ikën; 8 uin kara a nami pia ax ka an usokin 'ai 'uchakë kupí tëmërati 'ikën, usa 'ikë kamina mitsux anu 'ikë anua a chikínti 'ain, an Nukën 'Ibu 'axunkë ñu upíira 'ikëbi usakin 'akë 'ikë.

9 Anúan mitsun ñu 'apákë biti nëtë 'ikëbëtan bikin kamina, kamaira këñukin bitima 'ain, 'imainun kamina baritëkënkin bikinmi tëxëokë a bitima 'ain. 10 'Aínbi kamina anu uvas 'apákë naë anua aín bimi bikin kamaira bitima 'ain, 'imainun kamina menu pakëkë abi baritëkënbiankin bikinma ënti aín; a kamina uni ñuñumakama 'imainun bëtsi menu 'ikë mibë tsókë unikaman binun ënti 'ain. 'Ëx kana mikaman 'Ibu Dios 'ain.

11 Bëtsi unin ñu kamina mëkamakantima 'ain. 'Ianan kamina këmëi bananan bëtsi unikamabë paránantima 'ain.

12 Unin asérabi ka kixun sinánun kamina ñu 'anuxma 'ën anë ñui banatima 'ain, usai banakin kamina 'ëmi uni bananun 'imitima 'ain, usai banakin kamina 'ën anë 'atima oti 'ain, 'ëx kana min 'Ibu 'ain.

13 Mi rapasu 'ikë uni kamina 'atima okin mëëxun 'ain ñu bikuantima 'ain.

'Ianan kamina an mi ñu mëëxunkë uni pëkarakëbëtan kupíoxun kakinma a nëtënbi kupíoti 'ain.

14 'Imainun kamina pabë unikamami 'atimati banai ami kuaitima 'ain.

'Ianan kamina anúan uni bënxuñu niti aín bainu ami tuaxkia pakëtisa okin ñu nantima 'ain. Usakin 'akinma kamina 'ën bana kikësabiokin 'akánti 'ain. 'Ëx kana min 'Ibu 'ain.

15 Unin mix 'apu aín bëtsi unibëtan bana mëníoxun kakëxun kamina kana 'aima kakinma an ñu 'akë ëanan, an ñu 'akëma a tëmëratanun 'atima otima 'ain, uisa ñu kara 'axa kixun pain istankëxun kamina a rabë́bi tëmëramiti 'ain.

16 Manan bëkinkin kamina abëmi 'ikë unikama ñuitima 'ain.

Min 'unánkë unían bëtsi uni 'ai kuankëbë kamina abë kuantima 'ain. 'Ëx kana min 'Ibu 'ain.

17 Mix abë 'ikë unimi 'atimakin sinani kamina ami nishtima 'ain.

Min 'unánkë unían 'atima ñu 'aisatania 'unánkin kamina 'axunma 'anun kati 'ain. Usakin ñu 'aia iskinbi min 'unánkë uni kakëma 'aish kamina abëbi 'uchakë 'iti 'ain.

18 Axa mimi nishkë uni nuibatima ami nishanan kamina axa mibë nuibanankë unikamaishi nuibatima 'ain. Min 'unánkë uni kamina mixmi bërúankakësaribi okin bëruánti 'ain. 'Ëx kana mitsun 'Ibu 'ain.

19 A tanti bana 'ën mi kakë ënëx kikësabiokin kamina 'ati 'ain.

Mitsun 'arakakë vacamia ñuina itsin bëchinun kamina 'amitima 'ain.

Min naënu ñu 'apákin kamina mëskukin ñu bërukama 'apátima 'ain.

'Anan kamina bëtsi bëtsi ñumanën mëskukin 'akë chupa pañutima 'ain.

20 Uix kara an ñu 'axunkë xanu bëtsi unin binuxun kakë 'aínbi abë 'iaxa, an ka a xanuxa marukëma 'ianan axia 'inun ënkëmapain 'ikëbi, usakin akë kupín an binuxun kakë uni a kupíoti 'ikën; 'aínbi ka uni 'imainun xanux uisabi okinma ënkë 'iti 'ikën. 21 Usakin 'akë 'ixun ka unin achúshi carnero anuxun 'ë rabiti xubusa okin 'akë aín xëkuë anu buánti 'ikën. 22 Buánxun 'inánkëxun ka sacerdotekaman carnero xarokin aín 'ucha tërënxunun ñukáxunkëxun kana, 'ën unin 'uchakë 'ën tërënti 'ain.

23 Uínsaran kaina anumi tsóti me anu atsini kuani anuxun ñu 'apátankëxun, kamina koia aín pëñan tëaima 'ianan, aín bimiribi rabë́ 'imainun achúshi baritia sënë́nmikin pitima 'ain. 24 Anun rabë́ 'imainun rabë́ baritia sënë́nkëbëtan mitsun ñu 'apákë kamabi aín bimi bitankëxun achúshi fiesta 'akin 'ë nanxunti 'ain, 25 'imainun kamina mapai achúshi bari 'ikëbëtan bixun mitsun ñu 'apákë aín bimi piti 'ain. Usokin 'akëbë ka mitsun ñu 'apákë aín bimi 'aisamaira 'inun bimiti 'ikën. 'Ëx kana mitsun 'Ibu Dios a 'ain.

26 'Imainun kamina uisa ñuina namibi aín imi këñun pitima 'ain.

'Ianan kamina uisa ñu kara 'iti 'ikë kiax sinani kiti a unántima 'ain, 'imainun kamina uisa ñu kara 'inuxun 'aia kixun sinani kitima 'ain.

27 Mitsun bu buinarakin tëanan kamina min kuëëni rëbu rëmëniokin tëakantima 'ain.

28 'Imainun kamina uni ñukë 'ain, anun rabanan mitsun nami tëatima 'ain. Usai 'ima 'ianan kamina uisa ñubi tankin mitsun naminu kuënëotima 'ain. 'Ëx kana mintsun 'Ibu 'ain.

29 Mitsun 'ini bëchikë kamina bëtsi bëtsi unibë 'ikë xanukama 'ikësai 'inun 'imitima 'ain. Usai 'inun ënkëxun 'aisama ñu 'ai axbi 'atima orakanan, ka mitsun ëmanu 'ikë unikamaribi an 'atima 'imiti 'ikën.

30 'Anun 'ë rabiti nëtë 'ikëbë kamina anun tantiti 'ain. 'Imainun kamina anuxun 'ë rabiti xubusa okin 'akë anuxunribi uisa 'atima ñubi 'atima 'ain. 'Ëx kana mitsun 'Ibu a 'ain.

31 Uni an ñunshinan 'amikëxun ñu 'akë 'imainun an ñu tankë uni kamanu kamina kuankantima 'ain. Usai abë banakin kamina mitsúnbi 'aisama ñu 'ati 'ain. 'Ëx kana mitsun 'Ibu Dios a 'ain.

32 Uni apankama mi rapasu ukëbë kamina ax kuaintamainun niruti 'ain. Usai 'i kamina 'ëx kikësabi oi 'iti 'ain. 'Ëx kana mitsun 'Ibu a 'ain.

33 Bëtsi menu 'ikë unikama axa mitsubë tsókë akama kamina ubiotima 'ain. 34 Mitsúxmi nuibanankësaribi okin kamina aturibi nuibati 'ain, atux ka mitsusaribi 'ikën. Mitsux pain kamina atux 'ikësaribiti Egipto menu 'ikë uni 'aímabi tsóakën. 'Ëx kana mitsun Dios a 'ain.

35 Mitsun ñu tupunkin kamina 'ain chaxkë́ 'imainun 'ain naxba anuira tupúnxumabi bëtsi parántima 'ain, 'imainun kamina aín 'ië anuira sënën tupúnxumabi bëtsi uni parántima 'ain. 36 Mitsun anun ñu tupúnti anun tupunkin kamina anu sënën tupuntia 'akë anubia aín xumúx 'itánun tupúnti 'ain. 'Ëx kana mitsun Dios an Egipto menua mitsu chikían a 'ain.

37 Usa 'ain kamina a tanti bana 'ëx kikë usakinbi 'ati 'ain; a bana kamina tanti 'ain. 'Ëx kana min 'Ibu a 'ain.