4 A nëtëkamax ka anunmi timë́xun min 'Ibu anë rabikanti nëtë 'ikën, usa 'ain kamina a nëtë 'ikëbë upí 'inun timë́kanti 'ain.

5 'Uxë isítabakë anúan mapai rabë́ 'itankëx rabë́ 'imainun rabë́ nëtë ñantabukë anun kamina Pascua nëtë inúkin 'ë rabinux timë́kanti 'ain.

6 A nëtë 'iónxa mapai rabë́ 'imainun mapai achúshi nëtë 'ikë anun kamina anun chamiti ñu këñuma akë pán pikin fiesta min 'Ibu Diosmi sinánkin 'ati 'ain. 'Akin kamina mapai achúshi 'imainun rabë́ nëtë inumikin anun chamiti ñukëñunma 'akë pán piti 'ain. 7 A nëtë 'irutabakë axa upíira nëtë 'ain kamina anun timë́kanti 'ain. A nëtëkaman kamina uisa ñu mëëtibi 'ai tëkantima 'ain. 8 'Ianan kamina mapai achúshi 'imainun rabë́ nëtë 'imikin anun timë́xun pán pianan anun upiti timë́xun min 'Ibu rabikin ñuina xaroti 'ain. A nëtën kamina uisa ñu mëëtibi 'akantima 'ain.

9 Nukën 'Ibun ka Moisés amiribishi katëkëankëxa:

10 Israel unikama kamina ësokin kati 'ain: Uínsaran kaina 'ën mitsu 'inánuxun ka me anu bëbai kuani, anun kamina mitsun 'apákë trigo ax pain tuatabakë a nëakin bixun kamina sacerdote unikama 'inánti 'ain. 11 Anun tantiti nëtë 'iónxa pëkarakëbëtan ka sacerdote unikaman trigo bimi upíirabu 'ë 'inaishiti bikë a bëxunkëx ka asábi 'iti 'ikën. 12 'Imainun ka a nëtë́an trigo bimi nëakë bëkë a nëtënbi, mitsun 'arakakë ñuinanën tuá achúshi baritiañu uisaibi 'ikëma aribi 'ë xaroxunti bëti 'ikën. 13 Bëanan ka rabë́ 'imainun rabë́ okin tupunkë këñun aín chukúmashi trigo putuakë aín upí xënin chabóxun mamuakë aribi bëti 'ikën, ax ka ñuina nanxuinshiti xarokë sanuira ro a xëkë usaribi 'iti 'ikë. 'Imainun ka achúshi litro uvas baka bikë 'ë nanxuinshiti bikë aribi ami anpënkati nanti 'ikën. 14 Usakin anun 'ë nanxunti nëtë 'itamainun kamina mitsun pán këñun trigo tutushokë akëñun aín paxabi nankë anua bixun pitima 'ain. Ënë banax ka uínsaranbi ënkinmami ax kikësabiokin 'ati 'ikën, usa 'ikë ka aín papan tan 'ikë aín bakë bëchikë kamanribi uinu 'ikë menu kara tsotia anuxunbi ënë bana tankin 'ati 'ikën.

15 A nëtën mitsun trigo bimi nëakë aín upíirabu 'ë nanxunti buánkë, a nëtë pë́karakë ax ka anun tantiti nëtë 'iti 'ikën, anuxun kamina mapai achúshi 'imainun rabë́ semana sënë́nmikin tupúnti 'ain. 16 'Imainun ka mapai achúshi 'imainun rabë́ nëtë anun tantiti nëtë 'iónxa pë́karakë anun cincuenta nëtë sënë́nkë 'iti 'ikën. Usa 'ain kamina a nëtë sënë́nkë anun, 'ë nanxunti bërí bitëkënkë trigo anu nanti 'akë anu 'ë naxunti 'ain, 17 'imainun kamina mitsun trigo putuakë aín upí anun chamiti ñukëñun 'akë pán rabë́ aribi buánti 'ain, ax ka rabë́ 'imainun rabë́ kilosa harina achúshi achúshi 'akë 'iti 'ikën, ax ka a painmi mitsun 'apákë trigo aín bimi 'ë 'inánti bikë a 'iti 'ikën.

18 A pánkama këñunbi kamina mapai achúshi 'imainun rabë́ carnero aín upíira uisaibi 'ikëma achúshi baritiañu, 'imainun achúshi vaca bëna këñun rabë́ carnero, akamabi timëtankëxun 'ë 'axunkin xaroxunkë ax ka sanuira ro xëkësa 'inun 'ë 'axúnti 'ikën, 'imainun kamina mitsun ñu 'apákë akëñun uvas baka vino 'akë aribi 'ë nanxunti 'ain. 19 'Anan kamina achúshi chibu mitsun 'ucha kupín xarokë 'itánun 'inánti 'ain, 'imainun kamina rabë́ carnero achúshi baritiañu mitsun ñu 'atima 'akëkama mëníonani timë́xun Diosan istisabi oi kuëënkin pikanti nanti 'ain. 20 Nania ka sacerdotenën ñuinakama nanxunkë a këñunbi trigo aín bimi pán 'akë a 'imainun carnero rabë́ a 'ë 'axunkin xaroti 'ikën. Ax ka 'ënan upíira 'ianan sacerdote kamananribi upí 'iti 'ikën.

21 A nëtënbi kamina 'ë rabinux timë́kanti 'ain, 'imainun kamina anun uisa ñu mëëti chabi 'atima 'ain. Ënë banax ka uínsaranbi ënkinma ax kikësabiokin 'ati a 'ikën, usa 'ikë ka aín papan tan 'ikë aín bakë bëchikë kamanribi uinu kara tsotia anuxunbi ënë bana tanti 'ikën.

22 Anun mitsun ñu 'apákë bikë nëtë 'ikëbëtan sënë́onkin bixun kamina bikin ënkë a kamaira baritëkënbiankin bitima 'ain. Ax ka uni ñuñuma 'imainun bëtsi menu 'ikë uni mitsubë tsókë unikaman binun ënkë 'ikën. 'Ëx kana Dios 'aish mikaman Dios a 'ain.

23 Usa 'ain ka amiribishi Nukën 'Ibun Moisés kakëxa:

24 Ësokin kamina Israel unikama kati 'ain: Mapai achúshi 'imainun rabë́ 'uxë 'ikë anúan achúshi nëtë 'irutabakë anun kamina mitsux achúshi nëtë tantiti 'ain, 'imainun kamina a nëtë upiti timë́xun a sinánkin pakon banoti 'ain. 25 'Anan ka 'ë nanxunkë ñu aribi anuxunbi 'ati 'akë anuxun xaroti 'ikën, 'anan ka uisa ñu mëëti chabi 'atima 'ikën.

26 Usa 'ain ka Nukën Ibun amiribishi Moisés kakëxa: 27 Mapai achúshi 'imainun rabë́ 'uxë 'irutankëxa mapai rabë́ nëtë 'irukë anun ka mitsun ñu 'atima 'akëkama tërënti nëtë 'iti 'ikën. A nëtë 'ikëbëtan kamina añu ñubi piima upiti samáti timë́xun 'ë nanxunkë ñukama anuxunbi 'ati 'akë anuxun xaroti 'ain. 28 'Anan ka a nëtën uisa ñu mëëtibi 'atima 'ikën, ax ka anun ñu 'atima 'akëkama mëníoti nëtë 'iti 'ikën, a nëtën kana 'ën mitsun 'uchakama tërënti 'ain. 29 Uix kara a nëtën pikë mëëti samátisama tania akamina, uisa uni kara 'iti 'ikë abi mitsun ëmanua chikínti 'ain. 30 'Imainun kana uin kara a nëtën ain ñu mëëti 'aia a uni, uisa uni kara 'iti 'ikë usa 'ikëbi, a ëmanua chikínti 'ain. 31 Anun kamina uisa ñu mëëtibi 'atima 'ain. A banax ka uínsaranbi ënkinma ax kikësabiokin 'ati 'ikën, usa 'ikë ka ain papan tan 'ikë ain bakë bëchikë kamanribi uinu 'ikë menu kara tsotia anuxunbi tanti 'ikën. 32 Ax ka achúshi nëtë anun mitsux tantianan pima samáti nëtë 'iti 'ikën, usa 'ain ka mapai achúshi 'imainun rabë́ këñun rabë́ nëtë 'ikë a xupibukëbëtan onxun a pë́karakë a xupibutëkënkëbëtan anun sënë́onti 'ikën.

33 Amiribishi ka Nukën 'Ibun Moisés katëkëankëxa:

34 Ësokin kamina Israel unikama kati 'ain: Mapai achúshi 'imainun rabë́ 'uxë 'itankëxa anun mapai rabë́ 'imainun mapai achúshi nëtë 'ikëbëtan ka anun 'uta 'atankëxun anu timë́xun mapai achúshi 'imainun rabë́ nëtë 'imikin 'ë rabikanti 'ain, 35 a nëtë 'irutabakë anun kamina upiti timëkamë 'ëoti 'ain. A nëtën kamina uisa ñu mëëtibi 'akantima 'ain. 36 A nëtë kaman ka mapai achúshi 'imainun rabë́ nëtë timë́xun 'ë nanxunkë ñukama xaroti 'ikën, 'imainun ka a pëkarakëbë upiti timëanan 'ë nanxunkë ñukama a xaroti 'ikën. Ax ka achúshi nëtë anun timëanan uisa ñu mëëti chabi atima nëtë 'ikën.

37 Ënëx ka a nëtëkama 'ikëbëmi anun 'ë rabi timë́kanti nëtë 'ikën, usa 'ikë kamina mitsun a nëtëkama anun upiti timë́ti nëtë kakin anëti 'ain, anun kamina 'ë nanxunkë ñukama xaroxuanan 'aímai këñutia chimapushi 'itánun raíriribi xaronan, mitsun ñu 'apákë aín bimi upíbu bikë aribi xaroti 'ain, 'anan ka uvas baka vino, 'akë aribi anun 'ati nëtë 'ikëbë 'ikëbëtan 'ati 'ikën, 38 'anan ka ñu mëëtima nëtë anun 'atankëxun bëtsi nëtën 'ë 'inaishiti nankë 'imainun 'ë nanxunti sinánxun nankë aribi uix kara kuëënia an nanti 'ikën. 39 Mapai achúshi 'imainun rabë́ 'uxë 'ikë anua mapai rabë́ 'imainun mapai achúshi nëtë, anun mitsun ñu 'apákë bikin sënë́onkë 'ain kamina, achúshi fiesta 'akin 'ë rabi mapai achúshi 'imainun rabë́ nëtë 'imi timë́kanti 'ain, a pëkarakëbë ka anun tantiti nëtëribi 'iti 'ikën. 40 Nëtë 'irutabakë anun kamina mitsun ñu 'apákë aín bimi upíirabu tsasikin bianan, xëbin pëchi 'imainun i pëi 'aisamaira këñun áloma kakë i, baka kuëbí kookë aín pëi akama bitankëxun mitsun 'uta anu mi 'iti 'ati 'ain, 'atankëx kamina anuax mapai achúshi 'imainun rabë́ nëtë 'imi 'ë rabi kuëënkanti 'ain. 41 Kamabi baritia anúan mapai achúshi 'imainun rabë́ 'uxë 'irukë, anun kamina mapai achúshi 'imainun rabë́ nëtë inúkin 'ë rabikin achúshi fiesta 'ai timë́kanti 'ain. Ax ka usaibi 'ikanti achúshi bana 'ikën, usa 'ikë ka aín papan tan 'ikë ain bëchikë kamanribi tanti 'ikën. 42 Anúan mapai achúshi 'imainun rabë́ nëtë 'ikë anun ka kamabi israel unikaman, bakë bëchikëkama anuabi bakë́an atux, 'uta 'atankëx anu 'iti 'ikën, 43 usai 'iá 'ikë ka kamabi mitsun rëbúnkikaman 'unánti 'ikën, Egipto menua 'ën chikínbëtsinkin bëkëx ka Israel unikamax 'uta 'atankëx anu 'iakëxa kixun. 'Ëx kana mitsun 'Ibu Dios 'ain.

44 Ësokin ka Moisésnën ënë banakama ñuikin Israel unikama a nëtë 'ikëbëtan Nukën 'Ibu rabiti nëtë ñuixunkin kakëxa.