¡Uínbi ka uisai kara 'inuxun 'aia kixun 'unanima!
27
Imë́ishi kana usakin ñu 'ati 'ai kiax kamina kitima 'ain.Kamina 'unanima imë́ishi karamina uisai 'iti 'ain.
2 Mibi rabiakatima kamina bëtsi unikaman kunia uisa uni kaina 'ai istankëxun mi rabinun 'iti 'ain;
usa 'ain ka mibi rabiakati ax upíma 'ikën.
3 Maxákama 'imainun masikama ax ka 'ëñë 'ikën,
'aínbi ka usamaira 'unántisa 'ikëbia ñu 'unánkëma unikama atun nishkë ax 'ikën.
4 Xuamati uni 'akatsi nishkë, 'imainun ñu 'akatsi nishkë an ka uni 'atimanun 'imia,
'aínbi ka bëtsin ñu 'akëbë nutsikë ax nëtë́tima 'ikën, 'imainun ka sinanima kishikë 'ikën.
5 Ñu 'atima 'aia kashikin bëtsi kati ax ka asábi 'ikën,
usa 'ain ka kakinma unë́xun nuibakë usamaira ax 'ikën.
6 Nun 'unánkë unían uisakin kara nu 'aisatania usakin 'akë ax ka asábi 'ikën,
'aínbi ka numi nishkë unían nu nuibakin mëkën 'inánkin bikë ax nun 'unánkë unían nu bikë usamaira.