Kamabi ñux ka anun a 'ati nëtëñu 'ikën
3
Ënë menu ka anun kamabi ñu 'iti nëtë 'ikën; usa 'ain ka uínsaran kara 'ia a nëtë 'ikëbë anun ñukamax 'ia:2 Anu ka anun bakënti nëtë 'ikën,
'imainun ka anun bamati nëtëribi anu 'ikën.
Anu ka anun ñu 'apáti nëtë 'ikën,
'imainun ka anun ñu 'apáxun ëchíkin masóti nëtëribi anu 'ikën.
3 Anu ka anun ñu 'ati nëtëribi 'ikën,
'imainun ka anun ñu ronti nëtëribi anu 'ikën.
Anu ka anun ñu 'atima oti nëtë 'ikën,
'imainun ka anun ñu mëníoti nëtëribi anu 'ikën.
4 Anu ka anun inti nëtë 'ikën,
'imainun ka anun kuaiti nëtëribi anu 'ikën.
Anu ka anun uni ñukëbë masá nuituti nëtë 'ikën,
'imainun ka anun ransai kuëënti nëtëribi anu 'ikën.
5 Anu ka anun maxax abístanun puti nëtë 'ikën,
'imainun ka anun timëkin biti nëtëribi anu 'ikën.
Anu ka anun 'ikúkananti nëtë 'ikën,
'imainun ka anun 'ikúkanantima nëtëribi anu 'ikën.
6 Anu ka anun ñu 'aisa kara kixun tanti nëtë 'ikën,
'imainun ka anun ñu 'akatsikixun 'axunbi sinanatëkënkin ënti nëtëribi anu 'ikën.
Anu ka anun ñu bukunrukin nanti nëtë 'ikën,
'imainun ka anun ñu puti nëtëribi anu 'ikën.
7 Anu ka anun ñu tukapati nëtë 'ikën,
'imainun ka anun këxëti nëtëribi anu 'ikën.
Anu ka anun banaima tsóti nëtë 'ikën,
'imainun ka anun banati nëtëribi anu 'ikën.
8 Anu ka anun nuibananti nëtë 'ikën,
'imainun ka bëtsimi nishti nëtëribi anu'ikën.
Anu ka anun 'akánanti nëtë 'ikën,
'imainun ka anun 'akananima nuibanani tsóti nëtëribi anu 'ikën.
9 ¿Añu ñuira kara 'itsaira ñu mëëkin unin kananti 'ik?
10 'Ën sinánkëx ka Diosan usakian unin ñu mënun 'inan ax chaiira 'ikën, usa 'ain ka ax kuëënkësai 'itia kia 'ain, usakinbi unin kushikin mëënu 'inan 'ixun ñu mëëia.
11 Usa 'ain ka Diosan ënë nëtë uniotankëxun; kamabi ñu upí 'itánun uniokëxa; 'anan ka uniribi sinánñu 'ixúan uisai kara ñukama 'iakëxa kixun 'unánan, uisai kara bërí ñu 'ia 'unánkin uisai kara 'inuxun 'aia kixun akama 'unántiokin 'akëxa, usa 'aínbi ka unin uisaira 'inun kara Diosan ñu 'akëxa kixun 'unanima 'ianan uisokin kara 'anuxun 'aia kixun kamaira 'unanima.
12 'Ën 'unánkëx ka a 'aia uni tsóti ñu upí 'aíma 'ikën, usa 'ain ka uni ñu 'ai kuëëni tsókë ax kuni asábi 'ikën, 13 usa 'ain ka nun pianan ñu xëanan kakë ax ñu 'apátankëxun tuaia aín bimi bikë ax, Diosan nu 'inánkë 'aish asábi 'ikën. 14 'Ianan kana 'unanin kamabi Diosan unio ñukama ax ka uínsaranbi këñutima oi anubi 'ia. Usa 'ain ka a 'atëkënti ñukama 'aíma 'imainun ax ka 'aisama 'ikë kixun a rakanti ñu 'aíma 'ikën; usa 'ain ka unikamax ami sinani upiti tsóti 'ikën. 15 Kamabi ñu bërí 'ikë ax ka bërámabia 'ia 'ikën, 'imainun ka uisa ñukama kara 'inuxun 'aia axribi bëríbi anu 'ikën. Usa 'ain ka Diosanbi bëráma 'ia ñukama a 'itëkënun 'imia.
Upiokin 'ati 'ikëbi 'atima okin ñu 'akë bana
16 'Ianan kana ënë nëtënuaribi 'ën isan 'aisama ñukama 'imainun atima ñuribi mënioisa 'ikëbi 'apukaman 'akëma akama kana isan. 17 Ënë nëtënu ka anun kamabi ñu 'iti nëtë 'ikën, usa 'ain ka Diosan ka kamabi unikama an ñu upí 'akë 'imainun an ñu 'atima 'akëkama isti 'ikën, anu ka anúan kamabi ñu 'iti nëtë 'imainun kamabi ñu upí 'akëkama isti nëtëribi 'ikën.
18 'Imainun kana ësairibi unikama ñui kin, Diosan ka unikama atúnbi 'unánkian nukamax kananuna ñuinasaribi 'ai kiax sinananun 'imia. 19 Asérabi ka unikama 'imainun ñuinakamax bamakiani anu kuanti anu 'ikën: usa 'ain ka uni 'ikësaribiti ñuinakama atúxribi bamaia, 'ianan ka unix 'ikësaribiti suñun uíni tsotia: usa 'ain ka a ñukamax uínbi 'unántisama 'inun inutia, 20 'ianan ka uinu kara kamáxbi bamax 'iti 'ikë anu 'iti 'ikën; me putu unio ka kamabi uni 'ikën, usa 'aish ka me 'itëkënti 'ikën. 21 ¿Uin kara unin kaña naínu kuanmainun kara ñuinakaman kaña me 'ukëmëu kuania kixun 'unánti 'ik? uínbi ka 'unanima. 22 'Ënbi kana iskin sinan, unían 'akë ñukamax ka upí 'ikën, usa 'aínbi ka aín ñu mëëti 'ai tsókë axira bëtsi ñukamasamaira upíira 'ikën, usai 'itiokin ka uni 'akëxa, usa 'ain ka uni bamakë 'ikë, uisa ñukama kara 'ia kixun istëkënun an bëtëkënti 'aíma 'ikën.