ISAÍAS
Judá menu tsókë Israel unikama 'ucha bana
1
Amósnën bakë bëchikë Isaías an ka namákësokin uisai kara Judá 'imainun Jerusalén 'inuxun 'aia kixun, ënë 'apukama 'ain Diosan ismikëxun isakëxa, akamax ka 'iakëxa, 'apu Ozías, Jotam, Ahaz 'imainun Ezequías ënëkamax ka Judá menu bëtsix bëtsix 'iax chikikëbë 'apu 'iakëxa.2 Kamabi ñu axa naínu 'ikë 'imainun menu 'ikë
an ka Nukën 'Ibu Dios ax ka ësai kiaxa kuati 'ikën:
“'Ën kana 'ën bakë bëchikë bëbukama 'imainun xanukama chatanun kanioruakën,
'aínbi ka atux 'ën bana kuaisama tani 'ëmi nishakëxa.
3 Vaca bënën ka aín 'ibu 'unania,
'imainun ka burro bënën anuxua aín 'ibun pimikë xubu 'unania;
usa 'aínbi ka Israel unikaman 'ën unibu 'ixunbi
an unio 'ikëbi 'ë 'unánima 'ianan 'ën kakëxunbi bana kuaisama tania.”
4 ¡Usa 'ain ka atux kamaxi 'uchakanxa
'ianan ka a unikaman 'itsaira 'atima ñuishi 'aia,
atun chaitiokëkamaxribi 'atima ñuishi 'akë unibu 'ia 'ain ka
atun 'aisa tankë ñu 'atimashi 'akania!
Usa 'ain ka aín 'Ibu 'ikëbi 'ë ënkanxa
'ëx kana Israel unikaman Dios upíira a 'ain,
usa 'ikëbi ka 'ën bana kuaisama tankin 'ë manuaxa.
5 Mitsux kamina uisaxun ñu 'atima 'ati kara kixun sinani kushi kananin,
usa 'ain ka mitsun nami anu 'atima oti 'aíma 'ikën.
Usa 'ain ka aín maxkánuribi ankëti chankukë 'aish, an 'imikëx kushiñuma 'ikën.
6 Taë rëbumiaxi ka mitsun maxkánubi
bërúti chamarabi mitsun nami asábi 'aíma 'ikën;
kamabi namix ka chankui 'uákë 'ianan; tëakin chakakësa 'ianan, nami këñui kutankëx anuax tanpëkësa 'ikën;
usa 'ikë ka uínbi ronkin chupa sanin rabunkëma 'ikën,
'ianan ka uínbi aín paë bachubuti tantitanun xënin síkakëma 'ikën.
7 Usa 'ain ka atun mekamax 'atima okë 'aish anu uni 'ikëma mesa bëruaxa,
'imainun ka atun ëma kamaxribi anu rëkirukin tsin në́nkë 'ikën.
Mitsun 'ismainunbi ka
axa mitsumi nishkë unikaman mitsun 'apákë ñukama bixun piaxa.
Usakia 'akëbë ka kamabi mekamax anu uni 'ikëma mesaribi 'i,
Sodoma ëmaxa këñukëx 'ia usaribiti 'iaxa.
8 Usakin 'akëbë ka Jerusalén ëma axëshi bëruaxa,
usa 'aish ka anu uvas 'apákë naë nëbëtsi 'uta 'akësashi 'ikën,
'ianan ka aín tuá piti melonar kakë ñu 'apáxun nëbëtsi xaban xabanbu 'inun kënëkë usaribi 'ikën,
'ianan ka a ëmax ami nishkë unikamainshi bëarabuinkë 'ikën.
9 Nukën 'Ibu Dios ax kamabi kushiñu 'ixun ka
nun chaitiokëkama ië́miama 'ain sapi kananuna,
nukamax bëríbi Sodoma 'imainun Gomorra 'iásai 'aíma 'itánun këñúkë 'itsían.
Uisakin kara asérabi Dios rabiti 'ikë kikë bana
10 'Apukama Sodomanu 'iása mitsun kamina ësaia Dios kikë aín bana kuati 'ain;
'imainun Gomorranu 'ia unikamasa mitsunribi kamina 'upiokin nun Diosan bana bëmë́kin kuati 'ain,
nukaman Diosan ka mitsu 'unánmisa tania.
11 Ësai ka Dios kiaxa: “¿Uisa kupín kaina mitsun 'aisamaira ñuina rëxun 'ë xaroxunin?
'Ëx kana 'aisamaira carnero rëxun 'aímai këñutanun kixun xarokankë a isi anun atsan,
'imainun kana vaca bërí kanikëkama aín xëni abi kuëënima;
'ianan kana vaca 'ain bënëkama 'ianan carnerokama 'imainun cabra bërí kanikëkama aín imi bikë akamabi kuëëniman.
12 Mitsux kamina 'ëbë banai ënu 'ain,
'aínbi kara ¿uin anuxun 'ë rabiti xubu ëman me mëníokë a chua oimi rikianun mitsu kax?
13 'Ë nanxuinshikatsi kixun mitsun 'aisamaira ñu bëkankë ax ka ñankáishibimi bëkankë 'ikën;
usa 'ain kana a ñukama xarokëxa kuínkë aín kuin a xëisama tanin.
Mitsun kamina unikama 'uxë ió 'ikëbëtan 'anan anun ñu mëëtima nëtë 'ikë anun kuëënin,
'aínbi kana 'ën an ñu 'atima 'akë unikaman usakin fiesta 'akin ñu 'atima 'akë a kuëënima.
14 'Uxë ió 'ikëbëtan fiesta 'akë 'imainun ñu 'atima 'akë unikamax timëkankë a kana 'ën istisama tanin;
¡'ianan kana usakia 'akë ñukama a iskin
'atimakin sinanin!
15 Uínsaran kaina 'ë ñukákin manámi okin mëkën birui ëbë banain,
anunbi kana 'ën usakin 'aia mitsu istisama tani 'amo kuainakëtin;
'imainun kana 'itsaira ëbë banakin ñukákëxunbi,
'ën a banakama kuatima.
Mitsun mëkënkama ax ka anun uni 'akë 'aish imin mëshikikësa 'ikën.
16 ¡Mitsúnmi 'uchakin 'akë ñukama a ëni kamina mëníokakanti 'ain!
¡Mitsúnmi 'akë 'atima ñukama a kamina, 'ën istisabi okin ënti 'ain!
¡'Aisama ñumi 'akankë akamina ënkanti 'ain!
17 ¡Ñu 'upíshi 'ati kamina 'unánkanti 'ain,
'ianan kamina abi sinani kushikin ñu 'upíshi 'anan,
bëtsi unikaman 'atimoiabi bëtsi 'akinti 'ain,
'akianan kamina 'ibuñumakë tuákama aturibi 'akinti 'ain,
'anan kamina kasunamëkë xanu bëtsi unin 'atima oiabi anun rabanan në́kin 'akinti 'ain!”
18 Ësai ka Dios kiaxa:
“Bërí kamina uisai kaina 'ikanti 'ai kiax ënë bana mëníonanti timë́ti 'uti 'ain:
Mitsun 'uchakamaxa uvas baka chininkë chëxëira iskësa 'ikëbi kana,
axa matsi irukë uxuira uxu iskësa 'itánun mitsu mëníoxunti 'ain;
atun 'uchakamaxa chupa bëtsi bëtsi ñun pukukë iskësaribi 'ikëbi kana,
'ën xapu uxuira uxu iskësa 'itánun mëníokin tërënxunti 'ain.
19 Mitsun 'ën bana kikësabiokin 'ati kuëënkin 'ën bana tankin, kamina menu 'apákëxua upíokin tuaia 'ain bimi bixun piti 'ain;
20 'aínbi kamina abi ñunshinakëkin kakëxunbi ñu 'akani,
an mitsu 'akinti 'aíma 'ain 'akanankënuax bamakanti 'ain.”
“Usakin mitsu kanun ka Diosanbi 'ë kaxa.”
Diosan ka an ñu 'upima 'atishi kuëënkë Jerusalén ëmanu 'ikë unikama 'atima oti kixun ñuia bana
21 ¡Jerusalén ëmanu 'ikë unikamax ka upiti buküakëxa, 'aínbi ka bërí bëtsi bëtsi unibë 'ikë xanusa 'ikën!
Bëráma kamina mitsux upiti tsókin upíokin
ñu 'akë 'iakën, 'anan kamina upiti tsóakën,
'aínbi kamina bërí an uni 'akë unikamasaribi 'ikanin.
22 Bëráma kamina manë uxua 'akë kuríkisa 'ikankën, usa 'ia 'aibi kamina ñu puti bukúnkësa bërí 'ain.
Bëráma kamina uvas baka vino 'akësa 'ikankën, usa 'ia 'aibi kamina bërí uvas baka 'umpaxkë usaribi 'ikanin.
23 Mitsun 'apukamax ka bana kuakëma 'ianan, an unin ñu
bainu bëaraxun mëkamakë unikamabë 'unánankë 'ikën.
Usa 'ixun ka akaman kuríkinën kupíokëxun
an ñu 'upima 'akëma unibi 'atima ñu isa 'axa kixun kanan ñu 'inainshiti akamaribi baria.
'Ianan ka papañuma 'imainun titañuma tuákamaribi uisakin kara 'akinti 'ikë usakin 'akinima 'ianan,
xanu kasunamëkë akamaribi tëmërai tsótiabi 'akinima.
24 Usa 'ain, ka kamabi kushiñu,
Israel unikaman Dios ax asérabi kiakëxa:
“¡Asá ka anuishi ka 'iti 'ikën!
'Ën kana axa 'ëmi nishkë unikama aín 'akë ñukama iskin uisakin karana 'ati 'ai usakin 'ati 'ain.
'Ën kana atun 'akë ñukama 'unánkin uisa karana oti 'ai usakin 'ati 'ain.
25 'Ën kana amiribishi mitsun ñu 'akëkama
mëníoxunkin ñu puti bukúnxun në́nkë;
usa 'itanun mitsun 'atima ñu 'akëkama upíira upí 'itánun mëníoti 'ain.
26 Usakin 'anan kana amiribishi an uisai kaina 'ikani, usai 'ia mëníoxunti akamaribi bërámami 'ikan usaribitimi aña 'ikanun mitsu 'imixunti 'ain,
'anan kana an mitsu bana ñuixunkin 'ësëti akamaribi bërámami 'ikan usaribiti 'itëkënun 'imiti 'ain.
Usakin 'ën 'an ka mitsu, rabi ësai kikanti 'ikën,
ëmanu tsókë unikaman ka upíokin bëtsi unikama 'akinia, 'ianan ka a ëmanu tsókë unikama asérabi ñu 'akatsi kara kia usakinbi ñu 'aia.
27 'Ën kana asérabi 'ëx kikësabiokin an uni ië́mikë a 'ain, usa 'ixun kana Jerusalénnu tsókë
unikama axa 'ëmi sinántëkënkë akama 'iëmitëkënti 'ain;
28 'aínbi kana an bana kuakëma unikama 'imainun 'uchañu unikama 'ianan an 'ën bana
kuaisama tankë a unikama bamati 'ikën.
29 Usokin 'akëbë kamina anuxunmi mitsun dios rabikankë
ñu 'apákë naëkama anu buküax kuëënkimi
dios rabikankë anuax rabinkanti 'ain.
30 Mitsux kamina i aín pëchi ëskikë usaribi,
'ianan naë anu ñu 'apákë 'umpaxñumasa 'ain
ëskikë usaribi 'inuxun 'ain.
31 Uni aín kushibu mitsunu 'ikë ax
ka ñusmai basi chushikësa 'ianan,
an 'akë ñukamax a sinántëkëntisama 'itánun këñuti 'ikën:
Usakin 'akëx ka a rabëtaxbi a nëtënbi an bënánti 'aíma 'ain rëkirui këñuti 'ikën.”