Diosan ka kamabi menuaxa uni 'akananima upitax bukunun 'imiti 'ikën
2
Ënëx ka usai ka Judá 'imainun Jerusalén 'inuxun 'aia kixun, Amósnën bëchikë Isaías a namákësa okin Diosan ká 'ikën:2 Nëtë xënibukëbë ka anúan 'iti nëtë 'ikëbë anua
Diosan xubu 'ikë bashi ax bëtsi bashikamasamaira 'inuxun 'aia.
Usa 'ain ka a bashixa bëtsi bashikamasama
'ain bëtsi menu 'ikë kamabi unikamax anu uti 'ikën;
3 usa 'ain ka bëtsi bëtsi menu 'ikë 'itsaira uni anu bëbai, bëtsibë bëtsibë kánani kikanti 'ikën:
“Diosan bashi anuxun a rabiti xubu 'akë anu kananuna kuaruti 'ain,
anu ka Jacobnën rëbúnki Israel unikama Dios anuxun rabiti xubu ax 'ikën,
anuxun ka uisai karanuna tsóti 'ai kixun an nu 'unánmiti 'ikën,
'unánmikëx kananuna ax kuëënkësabi oi tsóti 'ain.”
Usa 'ain ka Jerusalénnuxun Diosanbi 'ain bana nukama 'unánmiti 'ikën.
4 Diosan ka bëtsi bëtsi menu 'ikë unikama
'akanantëkënima upitax bukunun 'itsaira uni uinu kara tsotia anuabi 'imiti 'ikën.
Usakin 'imikëxun ka atun manë xëtokë anua 'akanankë a anun ñu mëëkin me anun naëti 'anan,
aín paka pia akamaribi anun bimia ñu 'apákë tëakin biti taxuñu okin 'ati 'ikën.
Usokin 'axun ka uinu 'ikë ëma kamanuxunbi bëtsibë 'akananuxun anúan 'akanankë a bitëkëntima 'ikën.
Usonan ka uisai 'akánanti kara kixun uínbi bëtsi 'unámitima 'ikën.
5 ¡Usa 'ain kamina 'ën aintsi Israel unikama mitsun kuati 'ain,
Diosan nu 'unánmikësabi oi kananuna ami sinánishi tsóti achúshi tirítan nu pëkakësa 'inun añu karanuna 'ati 'ai kixun 'unánti 'ain!