Anúan Nukën 'Ibun kamabi menua aín unikama upiti tsónun 'imiti ñuikë bana
(Is 2.2-4)
4
'Itsa baritia inúkëbë ka anun usai 'iti nëtëkama 'ikëbë,anuxun Nukën 'Ibu rabiti xubu anu 'ikë bashi ax uínbi uisabi oisama 'iti 'ikën.
Usa 'aish ka a bashi manan 'aish;
bëtsi bashi kamasamaira manainra 'iti 'ikën.
Usa 'ain ka kamabi ëmanu 'ikë unikama anu 'uti 'ikën;
2 ai ka 'aisamaira uni ëmakamanuaxa ukë ax bëbai ësai kikanti 'ikën:
Anua Nukën 'Ibun bashi 'ikë anu kuaruti kamina ukanti 'ain,
anu ka anuxun Dios rabiti xubu anuxuan Israel unikaman rabikë a 'ikën,
an ka anuxun uisai karanuna 'iti 'ai a nu 'unánmiti 'ikën,
usakin 'akëx kananuna upiti niti 'ain.
Usa 'ain ka Siónnuxun Nukën 'Ibu kikë bana a unin 'unánmiti 'ikën,
'imainun ka Jerusalénnuxun aín bana 'ain unikaman ñuiti 'ikën.
3 Usa 'ain ka Nukën 'Ibun bëtsi bëtsi menu tsókë unikama uix kara 'uchaxa kixun istankëxun uisa kara okatsia usakin 'ati 'ikën,
'akin ka 'ura men tsókë unikama 'akanankë a mëníoxunti 'ikën.
Usakin 'akëxun ka atúnbi atun manë xëtokëkama a anun me tukati 'anan,
'ain paka piakama anun ñu bimi biti tëntuñu 'itánun xëtokin 'ati 'ikën.
Usa 'ain ka uinu 'ikë ëmanu 'ikë unínbi anun bëtsibë 'akánanti sinánxun amiribishi anuan 'akanankë a bitëkëntima 'ikën,
'ianan ka uínbi usai 'akánanti ka kixun bëtsi 'unánmitëkëntima 'ikën.
4 Usa 'ain ka kamabi uni rakuë́tima 'ianan,
upí tani atun 'apákë 'apákënu uvas 'imainun higueranën tupëonkënu tantikanti 'ikën.
¡Ax ka Nukën 'Ibu kamabi kushiñu aín banabi 'ikën!
5 Bëtsi ëmanu 'ikë unikaman ka atun diosbi rabia,
'aínbi kananuna nukaman Nukën 'Ibu Diosan kakësokinshi 'ati 'ain.
Nukën 'Ibun 'ain unikama ië́miti ñuikë bana
6-7 Ësai ka Nukën 'Ibu asérabi kia.
A nëtën kana an ñuina 'arakakë unían aín ñuinakama timëkësa okin,
bëtsi bëtsi menu buánxun tëmëramikë unikama a timëti 'ain:
usokin kana ami nishkian tantimikëmax atsanxa abískëkama 'ain.
Akama 'imainun axa bamakëma abi timë́xun kana,
achúshi ëma kushiira 'inun 'imiti 'ain.
Usakin 'akin kana 'ëx Dios 'ixun 'ën unikama aín bashi Sión kakë anuxun 'a 'ixun,
bëríbi ënkinma abi 'akinti 'ain.
8 'Imainun kamina Jerusalén mix anuxun ñuina bërúanti torre 'akë 'imainun, ami katamëti 'akë usaribi Siónan 'iti 'ain,
usa 'ain kamina mix amiribishi bëráma 'ikësai ëma chaiira 'itëkënti 'ain,
usai 'ikamina bërámami 'iásabi chaiira 'iti 'ain.
9 Bërí kaina, ¿Uisa kupín 'ain tuákën paëokëx xanu bënë́kë usaribiti 'i kuënkëni bënë́kanin?
¿Mitsunu kara 'apu 'aíma 'ik?
¿'Ianan kara an mitsu 'ësëkin bana ñuixunkë unikama ñuax?
10 Kuënkëni katsati ka Sión ëmanu tsókë unikama 'iti 'ikën,
usai 'ika achúshi xanu bakënun 'ain tuákën paëokëx 'ikësai 'iti 'ikën,
usa 'ain ka minuax chikíkiani kuani unikama ëman 'iti 'ikën,
usai 'ikiani kuani ka unikama Babilonia menu bëbakanti 'ikën.
'Aínbi ka anuabi Nukën 'Ibun aín unikama;
ië́mikin axa atumi nishkë unikamanuabi bëtëkënti 'ikën.
11 Usa 'ain ka bërí bëtsi bëtsi menu 'ikë unikama
mi 'anux timë́ax mimi banai ësai kikania:
¡Nukamax kananuna Jerusalén masókin rurupakë isi kuëëntisa tanin!
12 'Aínbi ka a unikaman uisakin atu 'ati sinánxun,
kara Diosan mëníoxa a 'unanima;
usa 'aínbi ka an atu timëkin trigo bimi nëatankëxun anuxun tákatinu nanxun tákakë usaribiokin,
atu timënuxun 'aia kixun 'unanima.
13 ¡Jerusalénnu bukukë unikama mitsun kamina kuantankëxun axa mimi nishkë unikama 'atima okin tëmëramikin vaca bënëa trigo aín bimi rëukutanun aín taën chakakë usaribi okin 'ai kuanti 'ain! Usakin 'anun ka Dios kia usa 'ain:
'Ën kana vaca bënë achúshinën kushisa 'inun 'imianan
aín manchankama aribi manë tunánsa iruira 'imianan aín 'untsískamaribi manë panshian 'akësa 'ixun kamabi ëmakama 'atima oti 'amiti ain,
usakin 'atankëxun kamina min atun ñu kupíkëkama a bitankëxun 'ënan 'inun 'imiti 'ain,
'ëx kana mitsun 'Ibu kamabi men 'Ibu a 'ain.