JEREMÍAS
Jeremías usai ka ñu 'iti 'ikë kiá ñuikë bana
1
Achúshi uni anuaxa aín aintsikama sacerdote 'ikë anu ka achúshi uni Jeremías kakë 'iakëxa, aín papax ka Hilquías kakë 'iakëxa, ax ka Anatot kakë ëma anua Benjamínën ñaká bukukë me anu tsókë 'iakëxa, ënëx ka usakin ñu 'anan usai Jeremías kia bana 'ikën.2 Diosan ka Jeremías Amonnën bakë bëchikë Josías ax trece baritia Judá menu 'apu 'ain kakëxa.
3 Kanan ka Joaquím Josíasnën bakë bëchikë axa Judánu 'apu 'ikë a baritiakamanribi kakëxa, kanan ka Sedequías Josíasnën bakë bëchikë itsi axa once baritia sënë́ntamainun Judánu 'apu 'itëkënkëbëtan kakëxa, usa 'ain ka a barin mapai achúshi 'uxë sënë́nkëbëtan Jerusalénnu 'ikë unikama ami nishkë unikaman atun menu buánkëxa.
Diosan Jeremías kakë uni ka ñuikë bana
4 Diosan ka ësokin 'ë kaxa:
5 'Ën kana min titan puku 'ukëmëu 'ikëbi mi kaisakën;
'ianan kana min titan mi bakënkë 'ikëmashi mi kaisakën;
'anan kana kamabi menu 'ikë unikama an Dios kikë bana ñuixunkëmi 'inun mi kaisankën.
6 Ësakin kakëxun 'ënribi kan:
¡'Ën 'Ibu Dios! ¡'Ëx bëná pain 'ixun uisai banati kara abi 'unaniman!
7 'Aínbi ka Diosan 'ë kaxa:
Uni bëná pain kana 'ain kamina kitima 'ain. Mix kamina uinu kuanun karana 'ën mi xuti anubi kuanti 'ain,
usa 'ain kamina kuanxun 'ën mi kakësabiokin atu kati 'ain.
8 Usa 'ain kamina uinu 'ikë unimibi rakuë́tima 'ain.
'Ëx kana mi 'akinux mibëbi 'iti 'ain.
'Ën kana Dios 'ixun mi kakësa okinbi asérabi 'akinti 'ain.
9 Usa 'ain ka Nukën 'Ibun aín mëkën mëshpakin 'ën kuëbí mëëkin 'ë kaxa:
10 'Ën mi bërí 'unánmikë bana usakinbi kamina kati 'ain.
Bërí kana usakin ñukama 'akin anua 'apu 'ikë ëmakama 'imainun bëtsi menu 'ikë ëmakama,
ñankáishi 'itánun masókin rurupakin,
'atima okin këñutankëxun mi,
amiribishi birukin 'atëkënun mi kain.
11 Diosan ka ësokin 'ë kaxa:
Jeremías, ¿añu kara min iskë ënëx 'ik?
Kixun ñukákëxun kana kan, achúshi 'amukutan pëñan bënëtishi uabutia kana isin, —kixun kana kan.
12 Kakëxun ka Diosan asábi ka kamina isan —kixun 'ë kaxa—.
Usa 'ain kana 'ën bana, kikësabi oi kara bënëtishi, 'ia kixun kainin.
13 Diosan ka amiribishi 'ë katëkëanxa:
¿Añu kaina min isin? —kixun ka 'ë ñukáxa.
Achúshi ñutë kana kubinia aín tsipumi ki 'ianan,
aín rëbúmiki pakëti 'uramashi 'ikë, —kixun kana kan.
14 Usa 'ain ka Diosan 'ë kaxa:
Aín tsipúmiax ka ñu anpënkakëx 'ikësa kuatsini,
an ënë menu tsókë unikama tëmëramiti axa ami nishkë unikama uti 'ikën.
15 'Ëx Dios 'aish kana usai ka 'inuxun 'aia kin,
usa 'ain kana aín tsipúmiax 'apukama aín suntárukamabë unun 'imiti 'ain.
Ukëbë ka atun 'apukama atúxribi aín suntárukamabëbi uxun,
Jerusalénnu anun atsínti xëputi anubi atun tsóti akánti 'ikën,
'anan ka anun ëma kënëara abi bëararakin Judá menu 'ikë ëmakama aribi bëararakanti 'ikën.
16 Ënëx ka usakin kana an 'uchakin 'ë rakan unikama a tëmëramiti 'ain kiti 'ikën,
atúnbi rabinuxun bëtsi menu 'ikë unikaman uniokë ñu 'atankëxun,
rabikin sanuira ro a xaroxunkin rabiakëxa,
17 Usa 'ain kamina mix atu 'ën kakë banakama kai kuanux rakuë́ti sinanima, anun 'akánanti nëtën 'ikësai mëníokati 'ain;
usa 'ain kamina kuantankëxun 'ën mi kakë banakama atu kai kuanti 'ain.
Atumi kamina rakuë́tima 'ain, atumi rakuë́tia kana 'ën mi,
atunu kuanimi rakuë́ti bërënun 'imiti 'ain.
18 'Ën kana mi bërí kushiira 'inun 'imikin,
ëma upíokin kënëkin 'akë usa 'ianan,
manë tunan ami xubu buaruti nitsínkë usaribi 'inun 'imianan,
anun ëma kënëarakë manë panshian iruira usaribi 'ixunmi,
Judá menu 'ikë 'apukama 'imainun aín kushibu 'ianan, sacerdotekama 'ianan, kamabi unikama
atusamaira 'ixun minra kanun mi 'imiti 'ain.
19 A unikamax ka mibë mëëananti 'ikën, 'ixunbi ka mi kanantima 'ikën, 'ëx kana mi bërúai mibë 'iti 'ain.
'Ën kana Dios 'ixun kakësa okinbi asérabi mi 'akinti 'ain.