Nukën 'Ibun kakësama oi Israel unikama 'isamatan ñuikë bana
2
Nukën 'Ibu Diosan ka ësokin 'ë kakëxa:2 Anu kuanxun kamina Jerusalén ëmanua 'ikë unikama;
munuma kuëníshkin upíokian kuanun kati 'ain:
¡Ësakin mitsu kanun ka Nukën 'Ibu kiaxa!
'Ën kana bëná pain 'ixunmi 'ën kakësabiokin 'á a sinanin,
usa 'ixun kamina an biti unían mëratiokëxun xanun nuikësa 'inun mitsun 'ë nuibakën,
'imainun kamina anu uni 'ikëma me anu ñu 'apátisama anuxunbi 'ë 'akiankën.
3 Israel unikama ax ka upíira 'inun 'ën kaískë 'aish ñu bimi upíirabu usaribi 'ikën.
Usa 'ikëbia an 'atima okë unikama akana uisa ñubi kara anu 'imikin 'ën 'atima okën.
'Ëx Dios 'aish kana usai kin.
4 Jacobnën rënbunki Israelnën 'aintsikaman ka Dios kikë bana kuati 'ikën.
5 Ësai ka Nukën 'Ibu kiaxa:
¿Añu ñu 'atima ënua mërax, kara min chaitiokama 'ëmi 'unánkëx?
Atúnbi bëtsi dioskama añu ñu 'ikëmabi rabikë kupín,
atúxribi usaribi ñankáishi bërukankëxa.
6 Usai 'ikin ka 'ën Egipto menua chikían 'ixunbi 'ë bariti sinánkama 'ikën,
anu uni 'ikëma me, me ëskikë 'imainun kuëtú me,
'umpaxñuma 'imainun anun nisama 'atima me,
anu uni tsókëma 'ianan, me anun uni nikëma anun nitsiabi 'ën 'akian, a sinánkin 'ë rabiti sinánma 'ikën.
7 'Ën kana mitsu me upíira anu 'apákëxa,
ñu 'itsaira tuaiami piti me anu mitsu bëakën.
'Aínbi kamina mitsun anu utankëxun 'ën 'inánkë me masókën,
usakin 'akin kamina 'ëx a me isi kuínsanun 'ë 'imikin,
'ën 'inánkë me 'atima okën.
8 'Imainun ka sacerdote kamanribi 'ën 'akinun 'ë bariti sinánma 'ikën,
'imainun ka an 'ën bana kuënëo 'unánkë unikamanbi 'ë 'unántisamatankëxa, 'imainun ka 'apukamaribi 'ëx kikësokin 'aisamatamainun,
an Dios kikë bana ñuikë unikamaxribi 'ëmi manutankëx unin rabikë Baal a ñuishi banakëxa,
usai 'ikian a ñukama rabikë ax ka ñankabia 'akë 'iakëxa.
Dios usakian Israel unikama 'ati kia bana
9 Usa 'ain kana 'ëx Min 'Ibu 'aish ësai kin.
'Ëx kana bërí mitsu 'imainun mitsun xutakama ñui usakin ka an bana mëníokë 'apukaman 'anuxun 'aia kin.
10 Amia bari kuabúkë au rikianxun upíokin pain istankëxun kamina;
anuxun bëtsi uni Guedar kakë ëma anu kuankin upíokin,
an bërí 'ikësai kara ñu 'iakëxa, kixun an kuatanun uni xuti 'ain,
11 usa 'ain ka an Diosan bana kuakëma unikaman kara a rabitia 'akë ñukama ëanxa kixun ñuikania uínsarabi kuakëma 'ikën.
¡A ñukamax ka këmëkinshia 'akë ñu 'ikën!
'aínbi ka 'ën kaisa unikaman, kushiira 'ikëbi 'ë rabiti ënxun bëtsi ñukama rabia.
12 ¡Naíkamë 'ëo ka unix 'ikësai ënë ñukama 'ikëbë, rakuë́ti 'ikën!
¡Usai 'ika ñu 'aisama 'ikëbë bërëti 'ikën!
'Ëx Min 'Ibu 'aish kana usai kin.
13 'Ën unikama ka 'iásamaira 'inun chaiira 'uchaxa:
Usai 'ikin ka 'ën bana kikësama oi 'ikin 'ë manukankëxa,
anua 'umpax 'ikë nëminra usaribi 'ixun na tsónun 'akinkëxunbi 'ë manúakëxa,
usakin 'ë manuika anua 'umpax biti nëminra 'umpaxñuma 'inun ëskikë usai atux 'iakëxa.
Israel unikama aín 'ucha kupí anunbi tëmëra ñuikë bana
14 Israel unikama ax ka unin ñu mëëmikëma;
'ianan ka atux tëmërakin ñu mëëmikë anuax bakë́ama 'ikën.
¿Uisa kupín kara usa 'ikëbi usakin 'akanin?
15 ¿Uisa kupín kara axa ami nishkë unikama paru 'inuánëxa, aín piti ñu binux kuëëkë usa kuatsini ukin,
Israel unikama bëara buinkankëx?
Axa atumi nishkë unikaman aín me 'atima onan;
aín ëmakamaribi nënkin xarokë 'ain ka achúshi unirabi anu bëruama 'ikën.
16 Egipto menua 'ikë ëma rabë́ Menfis 'imainun Tafnesnu 'ikë unikama,
maxkukin ñuumara 'inun 'imiakëxa.
17 Ësaia 'ikan ax ka atun 'Ibu Dios 'ikëbi,
'ë rakankë kupín 'ia 'ikën,
'imainun ka uisai tsóti kara kixun kuania unánmia 'ixunbi 'ë manukankëxa.
18 Bërí kaina, ¿Egipto menu 'ikë Nilo kakë baka 'umpax xëanan, anu 'ikë unikaman 'akinun ñukati kuankin kaina añu biti 'ain?
¿Añu kaina Asiria menu 'ikë Éufrates kakë baka 'umpax a xëanan, anu 'ikë unikaman mitsu 'akinun ñukákin biti 'ain?
19 Min ñu 'atima 'ai 'uchakë anbi mi 'atima oti 'ikën,
mix 'atimakë anbi mi 'atima oti 'ikën.
Usa 'ain kamina min sinánti 'ain, 'ëmi ënkin rabikëma ax ka 'aisama ñu 'ikë kixun isti 'ain,
'ëx kana min 'Ibu Dios a 'ain.
'Ëx Dios kamabi kushiñu 'aish kana usai kin.
Diosan bana Israel Judá menu 'ikë unikaman kuaisamatan ñuikë bana
20 Bërí ka 'itsabaritia anun mitsun 'ën bana kuaisamatani 'ikan 'ikën,
usai 'i kamina 'ëbë ënanankësa 'iakën, 'ianan kamina 'ë rabitisama tani 'ikankën.
Usai 'ikin kamina 'ë kakën: Bërí kananuna min kakësokin 'atima 'ai kixunribi 'ë kakankën.
'Ianan ka kamabi aín bashi manámi 'ikë 'imainun i pëñanakëkëkama tëmúxun,
xanun uni aín nami 'ami 'ikësaishi niakën.
21 'Ën kana mi i upíira 'apákësa 'imianan,
uvas bëru upíira 'apákëx kókësa usaribi 'inun 'imiakën.
¡'Aínbi kamina atiaira 'aisamai ninu 'ikë bimi mukaira 'inun tuákësa usaribi 'ikankën,
usa 'ikë kana 'ënribi mitsu 'unánkëmasa okën!
22 Anun chupa uxu 'itánun chukakë a 'imainun,
anun chupa chukati ñu anun uitishi okin chukakëxbi ka
'ën iskëx mitsun 'ucha anubi 'iti 'ikën.
'Ëx Mitsun 'Ibu 'aish kana usai kin.
23 ¿Uisa 'aish kaina mitsux: Nux kananuna mimi ñu 'atima 'ai 'uchanan bëtsi dioskamaribi rabi 'uchakëma 'ai kiax kikanti 'ain?
Kamina sinánkanti 'ain, uisai kaina mitsux me sapan Ben-hinom kakë anuax bëtsi dios rabi 'ikankë kixun.
Usa 'ain kamina upíokin pain añu kaina mitsun 'akë kixun iskanti 'ain,
mitsux kamina camello aín xanuxa bëtsi bari bënëti kuani amami amami nikë usaribi 'ikanin;
24 burro raëkëma aín xanux ka ninu atsanx kuantankëx rakatax
aín bënëbë 'isatani munuma raxëkanani uíni rëxun kia.
Usai 'ikin aín xanu ñuñakë ax ka uínbi ñonkin ënanamitisama 'ikën.
'Ianan ka aín bënë achúshitan aín xanu barikin mëraxun atsankimaira ñuñaia:
usa 'ikin ka aín bënën bënë́kinshi mëraxun ñuñaia.
25 ¡Israel unikama mitsux bëtsi dioskama rabi abákiani taëinshi kuani min taë ñumi tachakanan,
shimai mitsun tëru ëskitima 'ain!
'Aínbi kamina mitsux kiakën: Nukaman kananuna bëtsi dios rabikin ëntima aín;
usa 'ain kananuna bëtsi menuxun rabikë dioskama, nuibati atunu kuani nitsin.
26 An ñu mëkamakë uníxa ñu mëkamatia mërakëx rabinkësa,
usaribiti ka Israel unikamax rabinkë 'iti 'ikën,
usai 'ika Israel unikama atun ëmanu bukukëkama 'imainun,
atun 'apukama kushibu 'imainun sacerdote unikama an Dios kikë bana ñuikë akamabëbi katë́kë bërúti 'ikën;
27 usa 'ixun ka achúshi i nikë ësokin kakania: Mix kamina nun papa 'ain
'imainun ka achúshi maxáx ësokin kakania: Mix kamina 'ën tita 'ain.
Usokin a ñukama 'akinbi ka 'ëmi kasuakëkin aín bëmánan 'ë ismima.
Usai 'ikinbi ka 'aisama ñu inúkin tankinshi 'ë 'akinun kixun kakania:
¡Nu kamina ië́mi uti 'ain!
28 Judá menu tsókë unikaman. ¿Uinu kara bërámami mitsúnbi 'a dioskama ax 'ik?
¡Mitsun dios ax ka 'itsaira 'aish ëma kamabëtan sënë́maira 'ikën!
¡Usa 'ain ka atux 'atima ñu inutia uisakin,
ië́misakara kixun mitsu isi uti 'ikën!
Dios Judá menu tsókë Israel unikama atun ñu 'atima 'akë kupí tëmërati kia ñuikë bana
29 ¿Uisa kupín kaina mitsun 'ën bana kuaisamatankë 'ixunbi,
usakin kamina ñu 'atima 'ai kixun 'ë kaisa tankanin?
'Ëx Min 'Ibu 'aish, kana ësai kin.
30 'Ën kana ñankáishibi mitsun bakë bëchikëkama tëmëramiakën,
atun ka 'ën bana 'unánkin ax kikësokin 'aisama tankëxa.
Mitsúnbi kamina paru 'inúan raëkëma,
'ain piti bitsi në́kësa usaribi 'ikin, an 'ën bana ñuikë unikama 'akankën.
31 (Axa bërí tsókë mitsun kamina 'ën bana upíokin kuati 'ain,
'ëx kana Dios 'ain.)
Israel unikama, ¿'ëx karana anu uni 'ikëma mesa mitsunan 'ian?
¿'ianan karana anua me 'itsaira bëánkibukë chichabiantisama usaribi mitsunan 'ian?
'Ën unikama, ¿uisa kupín kaina: bërí kananuna uisa ñu 'atimabi inútima 'ai kianan, uínsaranbi kananuna mi sinántëkëntima 'ai kikanin?
32 ¿Achúshi xanun kara unibë mëranankia bikë 'ain mëñusutikama manukin rakanti 'ik?
Usa 'aínbi ka 'ën unikama, 'itsaira baritia 'imi 'ëmi manúakëxa.
33 ¡Upiokin kamina 'unan uisakin kara unin aín kuëënkë xanu baria kixun!
¡Usa 'ixun kamina anuxun 'atima ñu 'ati xubu anuxun 'akësa 'inun 'atima ñu 'ati 'unánkan!
34 Mitsun chupax ka uni ñuñuma 'imainun ñu 'atima 'akëmabi,
'axun aín imin pukukësa 'ikën,
a unikamax ka ñu 'atima 'aiabi uni mërakëmasa 'iakëxa.
35 'Aínbi ka usakin a ñukama axi atux kia:
Nukamax kananuna ñu 'atima 'ai 'uchama 'ain. Nukën 'Ibu Dios ka bërí numi nishima.
Asábi ka usai ki kamina ismina 'uchakëma 'ai kiax kikanin,
usa 'ain kamina ëbëtan anuxun bana mëníokë anuxun mëníoti 'ain.
36 ¿Uisa kupín kaina bëtsi unikamabë biranankatsi kixun bënë́kinshi sinanin?
Usa 'aínbi ka Egipto menu tsókë unikaman ka mitsu 'akintima 'ikën,
Asiria menu tsókë unikaman mitsu 'akianmasa okin.
37 Usa 'ain kamina Egipto menuax utëkëni chaiira 'inun katë́kë 'aish utëkënkanti 'ain,
'ën kana mitsux ami katamëisa tankë akama mitsu nuibaxunma 'anun kuëënxunkëma 'ain,
usa 'ain kamina atubëtan añubi mitsun 'atima 'ain kixun ka kakëxa.