Diosan kakëxun Israel Judánu 'ikë unikaman kuaisamatan ñuikë bana
6
16 Nukën 'Ibun ka 'ain unikama ësakin kakëxa:Bainu nirakëxun isi kamina,
uisai kara mitsun chaitiokëkama 'ën 'inánkë 'ën bana 'ai tsóakëxa kiax ñukákananti 'ain,
uisai kara uni upitax tsóti 'ikë kiax;
usakin 'ai kamina a 'unánkin ax kikësokin 'ai 'upitax tsókanti 'ain.
'Aínbi ka atux kia: Nux kananuna usai i tsótisama tanin.
17 Nukën 'Ibun ka an bërúanti unikama nanxun aín unikama kakëxa:
An manë banañu banókë unin banókë a kamina bëmë́kin kuati 'ain.
'Aínbi ka unikama kakëxa: Nukaman kananuna a kuaisamatanin:
18 Usai atux 'ikëbë ka ësai Nukën 'Ibu kia:
Bëtsi bëtsi menu tsókë unikama mitsun kamina,
uisa ñu kara 'ën unikama inuti 'ikë kixun 'unánkanti 'ain.
19 Men ka unin 'akësokin kuati 'ikën:
Ënë unikama kana 'aisama ñu inúnun 'imiti 'ain,
atun ka ñu 'aisama 'atishi sinánkanxa usa kupín;
'imainun ka 'ën bana kuaisama tankëxa usa 'ain,
'ianan ka 'ën bana kikësokinshi 'aisama tankëxa,
usai 'ikin ka a tanti 'ën bana timakankëxa.
20 ¿Uisoti kaina mitsun Sabá menu 'ikë
sanuira ñu a 'imainun ro ua sanuira 'ura 'ikë me kamanua 'ikë a 'ë bëxun kanin?
'Ëx kana kuëënima 'aímai këñutanun xarokë
a 'ianan, bëtsi ñukamaribi bëxun xarokëxbi ka 'ën iskëx upíma 'ikën:
21 Usa 'ain ka Nukën 'Ibu ësai kiakëxa:
Ënë unikama ami nishkë unikaman 'anun kana 'amiti 'ain.
Aín papakama 'ianan ain bakë bëchikëkama 'imainun a rapasu 'ikë unikama 'imainun an 'unánkë unikamaxi ka
bëtsi 'akësaribiti ñuti 'ikën.
Amia nishkë unikaman Israel unikama aín tsipumiaxi 'uxun bëara buinxun chikínti ñuikë bana
22 Ësai ka Nukën 'Ibu kiakëxa:
Aín tsipumia 'ikë 'uraira me anuax ka achúshi ëma chaiira 'aish kushiira ax mitsu 'ai unux mëníokatia.
23 Usa 'aish ka aín suntárukama aín pia, aín kanti 'imainun aín manë xëtokë a bitsi upiti mëniokakë 'ikën;
usa 'aish ka akamax bënë́kinshi bëtsi tëmëramikë 'ianan, nuibananti 'unánma 'ikën;
atux kushiira banakë ax ka parúmpapa xukirui bëchuni banakë usaribi 'ikën,
usa 'ain ka atun caballonu tsótax kuanti 'ikën.
Usa 'ain ka Jerusalén 'anux mëníoka kuatsini utishi 'ikën.
24 Jerusalénnu tsókë unikamax ka ësai kia:
Nun kananuna axa numi nishkë unikamaxa nu 'ai unux mëníokakë a bana kuan,
usa 'ain kananuna a bana kuax rakuë́ti kushiñumasa tanin;
usa 'ain kananuna 'itsaira tëmërai
xanuxa aín tuá bakënux paë tani tëmërakë usaribiti 'in.
25 ¡Usa 'ain ka uixi nitsima 'imainun
bainubi nikantima 'ikën!
¡Axa numi nishkë unikama ka mëníoka kuatsini aín manë xëtokë tuíanx uti 'ikën;
usa 'ain ka unikama amanu amanua tsókë atúxribi rakuë́kania!
26 ¡'Ën unikaman 'ini bëchikë xanukama mitsun kamina anun paë masá nuitukin,
pañukë anun chupa xëni pañutankëx,
chimapunuax kuainakë bëkini anun chuati 'ain.
Usai 'i kamina masánuituti nishi inkanti 'ain,
usai 'i kamina 'ain bakë bëchikë achúshira 'aíshbi ñukëbëa uni 'ikë usaribiti 'ikanti 'ain;
an nu 'atima okin masóti unikama ka basirakëma 'aínshi ukanti 'ikën!
27 Ësakin ka Diosan 'ë kakëxa: 'Ën kana uisai kara 'ën unikama 'ia isnuxumi tanun mi 'amiti 'ain. Usa 'ain kamina uisai kara atux, nitsia kixun isti 'ain.
28 Kamabi a unikamax ka bana kuakëmairabu 'ikën;
usa 'aish ka a unikamax nishanani kuamianani ñuiananishi tsotia;
usa 'aish ka manë panshian 'imainun manë tunan irusamaira a unikama 'ikën.
29 Anun xunkati anun kushin xunkakëx ërë́ti ka tsi plomo charotishi 'ia.
Usaribiti ka an xunkakin tsi ërë́nkin manë charokë ax 'ia,
'aínbi ka ñankáishibi an manë charoti 'akë ax tëia.
Usaribi ka atux 'ikën,
usa 'ain ka an ñu 'atima 'akë unikama atux nëtë́tima.
30 Usa 'ain ka atux. Kuríki 'atima okë kakin anëkë 'iti 'ikën,
usa 'ain kamina mix Dios 'ixun 'atima ñu aín upí kaístankëxun pukësa 'inun atu 'imian.