Jeremíasnën anuxun Dios rabiti xubu xëkuënuxun unikama bana ñuixunkin ka
7
Nukën 'Ibu Diosan ka Jeremías ësokin kakëxa: 2 Anun 'ë rabi atsínti anu kuantankëx nirakëkin kamina 'ëx kikë ënë banakama unikama ñuixunti 'ain: Kamabi Judá menu 'ikë unikama axa Dios rabi ënë xëpútikaman atsínkë mitsun kamina ënë bana kuati 'ain. 3 Nukën 'Ibu Israel unikaman Dios kamabi kushiñuira ax ka ësai kiaxa. Mitsux upiti tsókin ñu 'atima 'akë mëníokakin, ñu 'atima 'akë ënia kana 'ën ënë menubi mi tsónun 'imiti 'ain. 4 Usa 'ain kamina axa këmëi mitsu paráni banai ësai kikë a unikama ami rarámatima 'ain. Atun ka ësai kikin mitsu kati 'ikën: ¡Ënu ka anuxun Dios rabiti xubu 'ikën!5 Mitsux upiti tsókin ñu upíokin 'ai bëtsibë bëtsibë upiti nuibanankin kamina; 6 'atimokin aín ñu bikuanan tuá papa ñumakama 'imainun xanu kasunamëkë 'imainun bëtsi menu tsókë aribi 'atima oíma 'ianan, uni 'atima ñu 'akëmabi ënë menuxun 'anan, unínbia a rabinuxun 'akë a rabi 'atimatiama kana, 7 'ën anumi tsókankë me min chaitiokëkama xënibua 'aínbia atunanbi 'inun 'ën 'inan me ënubi tsónun mitsu 'imiti 'ain. 8 Mitsun kamina paránkin kakë banakama a asérabisa ax 'ikë kixun sinánkanin. 9 Mitsun kamina ñu mëkamanan uni 'anan, bëtsi unin xanubë 'ianan, këmëishi anuxun bana mëníokë anuxun bëtsi uni 'uchonan, asérabi ñu 'akatsi kianan a rabikankë Baal rabikin sanuira ro xaroxuanan, mitsun usakin 'ati 'ikëmabi unínbia a rabinuxun 'akë dioskama a rabikanin, 10 usakin 'atankëx ka anuxun 'ë rabiti xubu ënuribi 'ëbë bana katsikiax rikuatsinin. Atun ka sinania ënuax kananuna ië́kë 'iti 'ai kixun; usa 'ixun ka abi kananuna 'ati 'ai kixun 'ën kuëënkëma ñuira 'akania. 11 ¿Atun kara anuxun 'ë rabiti xubu ënëx ka anua mëkama unibu bukukë 'ikë kixun sinánkanin? 'Ënbi kana usakin 'akania kamabi isan. 'Ëx Nukën 'Ibu 'aish kana ësai kin.
12 Anuxun 'ë rabiti xubu Silónu 'ikë anuxun pain 'ë rabikin pëukan a karana 'ën uni Israelkaman 'ucha kupí uisokën, kixun kamina anu kuantankëxun isi kuanti 'ain.
13 'Ën amiribi amiribi usaími tsókankë a ñuikin kakëxunbi kamina mitsun kuaisama tankën, usa 'aínbi kamina kuaisama tankin, 'ëbi kaisama tankën. 'Ëx Min 'Ibu 'aish kana ësai kin.
14 Usa 'ain kana anuxun 'ë rabiti xubu Silónu 'ikë 'ásaribiokin, bërí anuxun 'ë rabiti xubu ënë mikama 'imainun mitsun chaitiokëkama 'inan amimi mitsux katamëkankë ënë 'ati 'ain.
15 Usa 'ain kana anu 'iti 'ën mikama 'inan me ënua min xukë́nkama Efraínën rëbúnkikama 'asaribiokin mitsu chikínti 'ain.
Diosan kakësabi oi Israel unikama 'isama tan ñuikë bana
16 Diosan ka Jeremías kakëxa, minmi ënë unikama abi 'ë ñukáxunkëxunbi kana min bana kuatima 'ain. 'Ianan kana ñunshinakëkin kakëxunbi 'ën min bana kuashiti 'ain.
17 ¿Min kaina Judá menu 'ikë ëmakamanuxua 'akë ñukama 'imainun Jerusalén ëmanu 'ikë anun niti baikamanuxua 'akë ñukama a isiman?
18 Atun bakë bëchikë 'imainun 'ini bëchikëkaman ka karu bitsinkin bëia, bëia ka atun papakaman ërë́rutanun tikaia usokëbëtan ka xanukaman harina chabóxun pán bata 'inun 'atankëxun, atunbia rabinuxun xanu tankin 'akë, naíkamë 'ëonu 'ikë kakin anëkë 'apu xanu a 'inania. 'Inánan ka atúnbi 'unánkëma bëtsi dioskama aribi uvas baka vino 'akë rabikin 'inánkin 'ë nishmia.
19 'Aínbi ka 'ëa aín banan nishmikë usamaira oi atúxa kikë bana anunbi nishia, usai 'ika aín bana anunbi katë́ti 'ikania. 'Ëx Min 'Ibu 'aish kana ësai kin.
20 Usa 'ain kana 'ëx Dios 'aish asérabi kin, ënë me 'ianan unikama 'imainun ñuinakama, nikama, 'ianan ñu 'apákëxa tuákë akamami kana 'itsaira nishan. Usa 'ain ka 'ëx nishkë ax ërë́ruia tsi bënantisama usaribi 'iti 'ikën.
21 Nukën 'Ibu kamabi kushiñuira Israel unikaman Dios ax ka ësokin aín unikama kai kiaxa: Mitsun kuëënkësa okin ñuina 'aímai këñutanun xaronanbi, këñutanuma xaroxun kamina 'ain namikama tëxëkë a pikanti 'ain.
22 'Aínbi kana 'ën mitsun chaitiokëkama Egipto menua chikíntankëxun, usakin kamina ñuina xarokin 'ati 'ai kixun uisakinbi káma 'ain.
23 'Aínbi kana ësaia 'ën bana tani 'ikanun kakën; 'ëx atun Dios 'imainua atux 'ën unikama 'inun kixun kana kakën. Usai 'ia 'ën kakësabi oi 'ikëbë ka mitsun 'akë ñukama upí 'iti 'ikën.
24 'Aínbi ka 'ëx kikësokin 'aisama tanan, 'ën bana kuaisamatani, atun kuëënkësokinshi ñu 'atima 'atishi sinani 'ikankëxa. Usakin 'akin ka 'ëmi sinántëkënkinma, atun kuëënkë ñuishi rabiti 'akankëxa.
25 Anun mitsun chaitiokëkama Egipto menua chikía a nëtëkamanribi 'a 'ixunbi kana an 'ën bana ñuikë unikamaribi nëtë́kinmaira bëríbi mitsunu xutin.
26 'Aínbi kamina mitsun 'ën kakëxunbi kuaisamatankën, usai 'ikamina mitsun chaitiokëkama 'iásamairai atiaira bana kuama 'ain.
27 Jeremías min kamina kamabi ënë ñukama ñuikin min kakëxua kuanumabi atu kati 'ain; usakin kakëxunbi ka atun miribi katima 'ikën.
28 Ënë kamina: Aín 'Ibu Diosan kakëxunbi kuaisama tanan, uisakinbi kati kuëënkëma 'ianan, uínbi uisokinbi kaisama unibu akama kati 'ain. Mitsun kamina ax kikësoibi 'iti bana a 'imainun achúshi ñu mitsubëtan Diosan 'a 'ikëbi ami manúkin a rakan irakan.
Israel unikamax ka bëtsi ñu axun rabi Jerusalénnuax 'uchakankëxa
29 ¡Judá menu tsókë unikama mitsun bu tëatankëx kamina ka masánuitukan kixuan 'unántanun niti 'ain!
¡Nianan kamina aín bashi matákama anu uni 'ikëma anuax masánuituti kantati 'ain!
Diosan ka mikaman nishmikëxun rakankësa 'inun mitsu ëanxa.
30 Ësai ka Nukën 'Ibu asérabi kiakëxa: Judá menu tsókë unikaman ka 'ën kuëënkëma ñu 'axa: 'Akin ka anuxun 'ë rabiti xubu a 'atima okin anu atun rabikë ñukama anu buákarukin nankëxa.
31 Usa 'ain ka Ben-hinom kakë me sapan anuxun ñuina xaroti Tófel kakë 'akëxa, anuxun ka atun bakë bëchikë 'imainun 'ini bëchikama xarokëxa, 'akin ka usakin ka ñu 'anuxun, 'aia kixun 'ën sinánkëma ñuira 'akëxa, usa 'ain kana 'ëxbi kin.
32 Usa 'ain kana 'ëx Min 'Ibu 'aish asérabi ësai kin, anun a me Tófel kananbi me sapan Ben-hinom, kakin anëtima achúshi nëtë ka 'inuxun 'aia. Usa 'ain ka a me sapan anuxun uni 'akë kakin anëkë 'inuxun 'aia. Usa 'ain ka Tófet kakë ax anu uni ñukë 'itsaira maínkë 'iti 'ikën, usa 'ain ka anu maínti 'aíma 'ain raíri axa atumi nishkë unikaman 'akë 'ikë ëman rakankë 'iti 'ikën.
33 Usa 'ain ka an ñu bamaia pikë ñuina pëchiñu 'imainun raëkëma ñuina pianankë akaman piti ñuia rakankë uni 'inuxun 'aia, usa 'aínbi ka uínbi a ñuinakama an 'ibinti 'aíma 'iti 'ikën.
34 'Ën kana Judánu 'ikë ëmakama 'imainun Jerusalénnu anun niti 'akë anuaxa unikamax fiesta 'ai kuëëni kantakë 'imainun xanu bitsi kuëëni kantakë akama nëtë́nun 'imiti 'ain, usaía 'inun 'imikëbëka kamabi ëma anu uni 'ikëma mesa 'iti 'ikë kiax ka Dios kiakëxa.