9
10 Aín bashikama 'imainun anu uni 'ikëma menu 'ikë pastokama ax ka nëmëkë 'ikën, usa 'ain kamina inkanti 'ain,usa 'ain ka uíxbi anun 'inútima 'ikën,
'imainun ka anua vaca manki banaia kuakë 'aíma 'imainun,
ñuina pëchiñu, ñuina raëkëma akama kuani abati nëtë́kë 'iti 'ikën.
11 'Ën kana Jerusalén ëma bëtsiokin maxákama bukunkësa 'itánun 'imiti 'ain;
'imikëbë ka anu kamun raëkëma kama 'iti 'ikën,
'imianan kana anu uni 'ikëma mesa 'itánun Judánu 'ikë ëmakama 'imiti 'ain,
'imikëbë ka a ëmakama uniñuma 'iti 'ikën.
12 ¿Uin kara an 'itsaira ñu 'unánkë 'ixun uisai kara ënë ñu 'ia kixun 'unánti 'ik? ¿Ui uni kara Diosan ënë ñukama unánmiaxa, an 'unánxua raíri unikama usa ka ñu 'ikë kixun ñuixunun 'unanmiakëx? ¿Uisa kupín kara a menu 'ikë ëma masókan 'aían anu uni 'iamasa 'ain, anu uni 'ikëma mesa 'ain, anun uinu 'ikë unixi nitëkënkëma 'iti 'ik?
13 Usa 'ain ka Dios ësakin kakëxa: Kamabi ñua Israel unikama 'inua ax ka 'ën 'inánkë banakama kikësoibi 'ikinma rakankë 'aían 'ikë 'iakëxa, usai 'ikin ka 'ëx kikësoi 'ikinma a banakama 'unánxunbi abi 'akima manukankëxa. 14 Usai 'ikin ka bana kuakëmasa 'ixun aín nuitu iruarakin, unínbia rabinuxun 'akë dioskama a rabikin uisakian 'anun kara atún papan 'unánmiakëxa usakinbi 'akankëxa. 15 Usa 'ain kana kamabi kushiñuira Israel unikaman 'Ibu 'aish 'ëx ësai kin: 'Ën kana piti 'aisama 'inun kachakë na pinun 'inánan, 'umpax muka rokëñu mëskukë aribi xëakanun 'inánti 'ain. 16 Usakin 'anan kana 'ën mekamanu 'ikë atun papanbi 'unánma ëmakamanu kuani abístanun 'iminuxun 'ain; usakin 'anan kana axa ami nishkë unikaman 'ain manë xëtokë tuínxun anun 'anan achirabi nitánuma kamabi binun bimiti 'ain.
Jerusalénnu ëmanu tsókë unikama masá nuituti 'inkan ñuikë bana
17 Nukën 'Ibu kamabi kushiñu ax ka 'ësai kia:
“¡Axa rarumati 'unáirakë xanukama kamina rikuatsinun kamiti 'ain!”
18 ¡Kamikëx bënëkuatsini 'ishtun aia atux nukama kupín inkëbë;
ka kamaxi bëunan mëskúkanti 'ikën;
usai 'i kananuna a nëtëkaman masá nuituti nun bëun purupurukai inti 'ain!
19 Kamabi Jerusalénnu 'ikë unikama sharati masá nuituti inkë ax ka kamaxunbi kuakë 'iti 'ikën:
¡Axa numi nishkë unikaman ka nun ëma masókin rurupaxa!,
¡usa 'ain kananuna 'itsaira 'atimokëx tëmëran!
Usa 'ain kananuna nun xubukamaribi chánkapakë 'ikë axa numi nishkë unikaman ka nun me ënun kixun nu bënëia, usa 'ain kananuna nun me ënti 'ain.
20 Xanu kamanribi ka Nukën 'Ibu Dios kikë bana kuati 'ikën,
kuakin ka ain bana upíokin 'ati 'ikën.
'Anan ka aín tuákamaribi usai kara inti 'ikë aribi 'unámianan,
usaía masá nuituti ini kiti 'unamiti 'ikën:
21 Usai 'ikëbë ka uni aín xubunu atsínkësa 'inun nukamax ñuti axribi nun xubukamanu atsíankëxa,
'imainun ka anu 'apu 'ikë 'apun xukamanuribi 'ianan,
tuá ëman niabakë akamaribi ñumainun,
uni bënábu anu tantiti plazanu bukukë akamaribi këñuti ñuakëxa.
22 Usai ika uni ñukëkama ñuinakan pui chë́ki bukukiankë ninua iskësa 'ianan,
ñu bimi unin bikin ënkëxa bikëxma chë́kibukuainkësa 'inun 'iakëxa.
Ësai ka Nukën 'Ibu asérabi kiakëxa.
23 Ësai ka Nukën 'Ibu kiaxa:
Uixi ka rabiakati an ñu 'unairakë anun 'ëx kana ñu 'unánkë 'ai kiax rabiakatima 'ikën,
'imainun ka kushiira uni axi 'ëx kana kushiira 'ai kiax rabiakatima 'ikën,
uix kara ñuñuira 'ikë axi ka 'ëx kana ñuñuira 'ai kiax anun rabiakatima 'ikën.
24 Usa 'ain ka uikamax kara rabiakatia, abi rabiakatima 'ëmi sinani 'ën kakësabiokin 'akë ax ka Dios an 'ën 'unánmikë 'ikë kixun sinánti 'ikën,
usa 'ain ka 'ën ënë menu upíokin ñu 'akëbëtan an ka uni nuibatia kixun unin 'unánti 'ikën,
usa 'ain ka unínribi upíoki ñu 'ati 'ikën.
Ësai ka Nukën 'Ibu asérabi kiakëxa.