EZEQUIEL
Ezequielnën namákësa okin anua 'ikë anu tsókë Dios isa ñuikë bana
1
1-3 'Ëx kana sacerdote Ezequiel 'iakën, 'ën papax ka Buzí kakë 'iakëxa, usa 'ain ka mapai achúshi baritia 'apu Joaquín Judá menu uankë 'iakëxa, anúan rabë́ 'imainun rabë́ 'uxë 'ikë ax mapai achúshi nëtë 'ikë anun kana 'ëx treinta baritia 'iakën. Usa 'ain kana 'ëx ñatanbiankin Babilonianu uankë a kamabëbi Quebar kakë baka kuëbí Babilonia menu 'ikë anu 'iakën, anuxun kana naíkamë 'ëo baaki panárabëkëbëtan Dios isakën. Usa 'ain ka Diosan anbi 'ë kakin aín mëkën 'ënu nankësa 'inun aín kushi 'ë tamiakëxa. 4 Usa 'ain kana aín tsipumiaxa suñúan kushiira aia isakën; isanan kana kuin chaiira anuaxa tsi rëkirukësa ax kaná kamë 'ëo mëríru mërirui 'ikësai 'ia isakën, 'imainun ka mëríru mëriruia 'ikë a rapasu kuainakëkin ichu ichukikë an pëkakë 'iakëxa. 'Ianan ka tsi rëkirukësa a nëbëtsi niba niba kikë 'itanuan unin ñu mëniokësa usaribi 'ianan ichu ichukikë anu mërakëxa, 5 'imainun ka tsi rëkirukë aín nëbëtsi anubi, rabë́ 'imainun rabë́ uni iskësa mërakëxa. 6 Usa 'ain ka akama achúshi achúshinëx rabë́ 'imainun rabë́ bëmánañu 'ianan rabë́ 'imainun rabë́ pëiñuribi 'iakëxa; 7 'imainun ka aín kisikamax puntëira 'aish, vaca bakë 'untsisa 'iakëxa, 'ianan ka manë panshian unin chabáchabákikë 'itánun nibókësa 'iakëxa. 8-9 'Ianan ka rabë́ 'imainun rabë́ bëmánañu 'ianan rabë́ 'imainun rabë́ pëchiñu, 'aish a ñukamax, unin mëkënsa, rabë́ 'imainun rabë́ amokamanu aín pëchi shimú 'iakëxa. Usa 'ain ka aín pëchikaman bëtsibë bëtsibë pëntikanankë 'iakëxa, usai 'ika kuainakëtima puntëishi kuani kuankëxa. 10 'Ianan ka aín bëmánankamax rabë́ 'imainun rabë́ unin bëmánansa 'iakëxa: usa 'ain ka aín bëmanaira ax unin bëmánansa 'iakëxa; 'ianan ka aín mëkeu 'ikë aín bëmánan ax paru 'inúan bëmánansa 'iakëxa; 'imainun ka aín mëmiu 'ikë ax vaca bënën bëmánansa 'iakëxa; 'ianan ka aín kaxú 'ikë ax tëtëkamë 'ëo bëmánansa 'iakëxa. 11 Usa 'ain ka aín pëikamax manámi ki pëntikanani pënchakë 'iakëxa, 'imainun ka rabë́ aín pëi aribi pëntikanankë 'iakëxa, 'ianan ka rabë́ anúnribi aín nami mapukë 'iakëxa. 12 Usa 'ain ka akamaxbi puntëishi kuani kuainakë kuatsini utëkënima puntëishi kuankëxa. Usai 'ika uinu 'ikë anun kara Diosan kushin buania amibi kikiani kuankëxa. 13 Usa 'ain ka unisa ñukama ax tsi ëxku ënxaira iskësa 'ianan ñu tiríoxun buánxun bëtëkënkësa atu nëbë́tsi 'iakëxa; usa 'ain ka tsi ëxku ërë́kësa ax anubi ërë́akëxa, usai 'ikëbë ka anuax kaná kamë 'ëo mëriti 'ikësai 'iakëxa. 14 A ñukama uni iskësa ax ka kuantankëx bënëtishi utëkëni kaná mëriti 'ikësai 'iakëxa.15 A unisa ñukama iskin kana menua atu achúshi achúshinua, axa mañákë aribi isakën. 16 Usa 'ain ka rabë́ 'imainun rabë́ mañákë ax uisakin kara bëtsi axa usakinbi 'akë 'aish sënë́nbi 'iakëxa, usa 'aish ka topacio 'ikësairibi ichuakëxa. Usa 'aish ka akama 'ukëmëubi axa mañati bëtsiribi 'akësa 'iakëxa. 17 Usa 'aish ka uimi kara kuankatsia abu kuani, utëkënima kuanshiti kuainsa 'iakëxa. 18 Usa isanan kana rabë́ 'imainun rabë́ mañakë anua 'ikë ain bërukama, an buinarakin upíokin pëkakë isan. 19 Usaia unisakama ax kuankëbë ka axa mañakëkama ax atubëbi kuankëxa, 'imainun ka unisa ñuinakama axa menua nirukëbë axa mañakëkama axribi niruakëxa, unisa ñukama 'imikëbë axa mañákë akamaxribi atubë niruakëxa, axa mañákë ñukama ax ka unisa ñukama abëbi 'ikë 'iakëxa. 20 Usa 'ain ka unisa ñukama ax uin kuanun kara Diosan kushin 'imia amibi kikiani kuankëxa, kuankëbë ka axa mañakëkama ax atubëbi niruakëxa, axa mañakëma ax ka unisakama amibi birukin 'akë 'iakëxa. 21 Usa 'ain ka uínsaran kara unisa ñukama ax shaíkia anun axa mañakë ñukama axribi shaíkiakëxa, 'imainun ka uínsaran kara atux nirakëtia anuribi axa mañakëkama ax nirakëakëxa; 'imainun ka uínsaran kara unisa ñukama ax menuax niruia anun axa mañákë ñukama ax atubë niruakëxa, axa mañakëkama ax ka unisakama amibi birukin 'akë 'iaxa.
22 Unisa ñukama aín maxká manámia kuman batsisa anu chaiira ichu ichu kikë 'aish bëxnan bëxnan kikësa iskë 'iakëxa. 23 Anu niti 'akë a shimú ka unisakama ax aín pëchi rabë́ ax puntëira 'inun bëtsin pëchi rëbumi aín pëchi rëtikanani 'iaxa. 'Imainun ka rabë́ aín pëchi anúnribi aín namikama mapukë 'iakëxa. 24 'Imainun kana aín pëchikama kuankin banamia kuan: ax ka baka 'ëi kushiira xukirui banakë usaribi 'iaxa, usai 'ika Dios kamabi kushiñu ax banakësari 'iaxa, 'ianan ka suntárukama 'aisamaira 'aish bëtsibëtan sënënbi chaninrukiani kuani me banamibiankë usaribi 'iaxa. 'Ianan ka uínsaran kara nirakëtia anun aín pëchikama pëntsispuküaxa. 25 'Imainun kana anu niti 'akë atun maxká manámi 'ikë anuaxribia achúshiti banai xukirui 'ia kuan. 26 Kuanan kana anu niti 'akë a manámia anu tsóti 'akësa maxax upíira zafiro kakë, kuman batsisa isan isanan kana anu tsóti a manámiaribi uni achúshi iskësa 'iaxa. 27 Ax ka aín chixumiax manámi 'ikë ax manë pënë́ 'itánun nibókësa 'iaxa, usa 'ikë ka tsi rëkirukësa an bëararakë 'iaxa, 'imainun ka aín chixumiax shimuribi tsi rëkirukësa an pëkakë kana isan. Usa 'ain ka a rapasunuax ichu ichukikë ax, 28 'uí 'ibúnuxa nëtë kuínu nón bai mërakë usaribi 'iaxa, usa 'ain kana 'ën Dios ax ka kushiira 'ikë kixun isan. Usa 'ikë isi kana 'ëx rantinpuruni memi bëtiki 'ian.