Mi kana unin bëchikë 'ikë kain: “Usa 'ain kamina 'ën kakëxun kuati niruti 'ain.” 2 Kakëx nirukin a bana 'ën kuakëbëbi ka Diosan bëru ñunshin 'ënu 'irukin 'ë nirunun 'imiaxa. Usa 'ain kana 'ëa, 3 kakë bana a kuan: “Mi uni kana 'ën Israel unikama kakëxun bana kuati 'unánma 'imainun 'ëx kikësabi oi 'isama tankë unikama anu xuti 'ain. Atux ka atun chaitiokëkama 'iásaribiti bërí nëtënbi 'ën kakësoi 'isama tania. 4 Usa 'ain ka atun bakë bëchikëkamaxribi maxkáñumasa 'ixun 'ën kakë bana kuaisama tania. Usa 'ain kana minmi ësokin kanun atunu mi xuti 'ain: Ësai ka Nukën 'Ibu Dios kiaxa. 5 Atun min kakëxun kuananbi min bana kuatima 'ikën, atux ka bana kuakëma unibuira 'ikën, usa 'ixunbi ka nunu ka an Dios kikë bana ñuikë uni 'ikë kixun 'unánkanti 'ikën. 6 Mix unin bëchikë 'aish kamina atumi rakuë́tima 'ain, 'ianan kamina uisakin kara mi kaia usakin kakëx atun banami rakuë́tima, 'ianan i muxañunën bëarabuinkësa tanan nibantakamanu 'ikësa tanibi rakuë́tima 'ain. Usa 'ain kamina uisakin kara mi kaia kakëxi atun banami rakuë́tima 'ain, 'ianan kamina bana kuakëmaira 'ixun 'ain bëmánan nishkë okëbëbi atumi ratutima 'ain. 7 Min kamina 'ën bana kuanabia min kakëxun kuanumabi a unikama ñuixunti 'ain, atux ka bana kuati 'unánma unibuira 'ikën. 8 Usa 'ain kamina min 'ën kakëxun upíokin kuati 'ain, kuati kamina atux 'ikësaribiti bana kuakëma unisa 'itima 'ain. Usa 'ain kamina añu karana 'ën mi 'inani a piti 'ain.”