3
Usa 'ain ka Diosan ësokin 'ë kaxa: “Mix unin bëchikë 'ixun kamina kirika tarankë anu kuënëokë ënë piti 'ain, 'abianxun kamina Israel unikama kai kuanti 'ain.”2 Ësokin kakëx anchatia ka anbi kirika tarankë anu bana kuënëokë a 'ë pimiaxa. 3 Usokin 'amitankëxun ka 'ë kaxa: “Bërí kamina kirika tarankë kuënëokë 'ën mi pimi ënë pitankëx anun puchati 'ain.” Kixun kakëxun pikinbi kana 'ën buna rëpasa 'aish bataira 'ikë tan. 4 Usa 'ain ka ësokin 'ë kaxa: “Anu kuaxun kamina Israel unibu 'ën kaisatankë banakama ënë kai kuanti 'ain. 5 'Ën kana aín bana kuaisama inúa banakë unikamanu mi xutiman, usa 'ain kana Israel unikamanubi mi xutin. 6 'Ën kana mi bëtsi bëtsi menu 'ikë unikama 'uakamë 'ëokë aín bana min kuaisama 'inua banakë anu mi xutiman. 'Ën anu mi xutia sapi ka bëtsi bëtsi ëmanu 'ikë unikama atun kuni min bana kuati 'ikën. 7 Usa 'aínbi ka Israel unikaman min kakësabiokin 'ati kuëëntima 'ikën, atun ka 'ën kakëxunbi 'ën bana kuaisamatania. Kamabi Israel unikamax ka bana kuakëma 'aish maxká iru 'ikën. 8 'Aínbi kana 'ën atusamaira 'aíshmi bana kuakëmasa 'inun mi 'imiti 'ain.
9 'Ën kana tsasitisama iruira 'imianan, maxá irusamaira mi 'imiti 'ain. Usa 'ain kamina atumi rakuë́tima, 'ianan kamina atun bëmánan nishkëira okëbëbi atumi ratutima 'ain, atux ka bana kuakëma unibu 'ikën.”
10 Usa 'ain ka 'ë kaxa: “Ñuitsimarua tsóxun kamina 'ën mi kakë banakama a sinánkin min maxkátan sinánti 'ain. 11 Anu kuanxun kamina min aintsikama mi këñunbia ñatanbiankin buan, akama min kakëxun kara kuati 'ikë, kara kuaisama tanti 'ikë abi. Ësai ka Nukën 'Ibu kiaxa kati 'ain.”
12 Usa 'ain ka Diosan Bëru Ñunshinan 'ë biruaxa, birukëxun kana 'ë kaxakúaxa kushiira rërëkikësai banaia kuan, usai ka anua 'ikë anuaxa Diosan kushi nirukëbë 'iaxa. 13 Unisa aín pëchikamaribi kana bëtsibë tsënkanania kushiira banaia kuan, kuanan kana a axa mañákë akamaxa kushiira banakë akamaribi küan; usa 'aish ka aín banakëkama ax chaiira 'inun banakë 'iaxa. 14 Usa 'ain ka Diosan kushi anua 'ë chikíanxa, chikinkëx kana anuax masá nuitukë 'ianan nishkë kuan, kuankinbi kana Diosan aín mëkënanbi kushiokin tuinkësa tan. 15 Usakin 'akëx Tel Abibnu kuantankëx kana, anua Quebar kakë baka kuëbí anua Israel unikama raíri ñatankë 'ikë anu bëba, anu kana mapai 'imainun rabë́ nëtë a ñu karana 'ati 'ai kixun 'unánan, uisakin karana kati 'ai kixun 'unánimabi atubë 'ian.
Diosan Ezequiel an bërúankë unisa 'inun anëa ñuikë bana
16 Usa 'ain ka mapai 'imainun rabë́ nëtë ax inúkëbëtan, ësokin Diosan 'ë kaxa: 17 “'Ën kana mi, unin bëchikë 'ikë an bërúankë unisa 'ixun an Israel unikama bërúanti 'imin. Usa 'ixun kamina usakinmi kanun 'ën mi kakëxun atun 'unánkë 'itánun 'ëx kikë banakama kati 'ain. 18 'Ëx kana uni 'uchañukamax ka aín 'atima ñu 'akë anubi bamati 'ikë kiax kiti 'ain; usa 'aínbi min a uni 'atima sinánñukama aín ñu 'atima 'akëkama ëntankëxua ñu upí 'anun kakëma 'ain ka ain 'ucha kupíbi bamati 'ikën, 'aínbi kana 'ë mi aín bamakë kupí uisa kupí kara ax bamaxa kixun ñukáti 'ain. 19 Usakin min kakëxunbi, aín ñu 'atima 'akë ëinsama tani ka, aín 'uchanbi bamati 'ikën, usaía ax 'ikëbëbi kamina mix uisa ñubi inútima ië́kë 'iti 'ain. 20 'Aínbi ka uni upí achúshinën an ñu upí akë a ënkin ñu 'atima 'ati 'ikën, 'akë kana 'ën anúan bamati ñu 'inánti 'ain, usakin 'akëbi min kakëma bamakë ax ka min 'ucha 'iti 'ikën. Usai 'ikëbëtanbi kana 'ën an ka ñu upí 'akëxa kixun sinántima 'ain, ax ka aín 'uchakënënbi bamati 'ikën, 'aínbi kana 'ën mi aín bamakë kupí uisa kupí kara bamaxa kixun ñukáti 'ain. 21 'Aínbi ka min kakëxun kuakin, a unin aín 'uchakë a ëni 'uchaima tsóti 'ikën, an ka min kakëxun kuaxa usa 'ain, usai ax 'ikëbë kamina mixribi ië́kë 'iti 'ain.”
Diosan 'imikëx Ezequiel banañuma 'ia ñuikë bana
22 Usa 'ain ka Diosan, anu 'ëx 'ikë anuxun 'ë kaxa: “Anu mi 'ikë ënuax nirukiani kamina me sapan 'ikë anuxun mi kanun kuanti 'ain.” 23 Usokin kakëx kana nirukiani anua me sapan 'ikë anu kuan, anuxun kana Diosan kushi Quebar kakë baka kuëbí anuxun iskësokin istëkëan. Usa 'ain kana anuax tëtúbuti tsóbuti 'ën bëmánan memi tikai 'ian, 24 'aínbi ka Diosan Bëru Ñunshinan 'ënu ukin nirunun 'ë 'imiaxa. 'Imikëx niruia ka Diosan ësakin 'ë kaxa: “Min xubunu kuantankëx kamina anu xëpúakati 'ain. 25 Anuxun ka mi raíri unikaman mëxin nëakanti 'ikën, usakin 'akëx kamina unikamabë chikítima 'ain. 26 'Ianan kana 'ën min ana manxantanu takásh kikësai 'ikëbëmi banañuma 'inun 'imiti 'ain. Usa 'ixun kamina atu bana kuakëma unibu 'ikëbi usai kamina 'itima 'ai katima 'ain. 27 'Aínbi kana 'ën mi ñu ñuikin kaisatankin amiribishi bananun 'imiti 'ai, usakin 'imikëxun kamina ësakin kati 'ain: Ësai ka Dios kiaxa. Uin kara kuatia an ka kuati 'ikën, uin kara kuaisama tania an ka kuatima 'ikën. Atux ka bana kuakëma unibuira 'ikën.”