5 An upíokin ñu 'akë uni an ka ñu 'akin upíokin 'aia: 6 usa 'aish ka atun dios rabikian matá mekamanuxun unikaman piti 'akë anu 'ianan, Israel unikaman dios isa kixun këmëkinshi rabikë ñukama ami katamëtima; 'imainun ka bëtsi uni aín xanu bikuanima 'ianan ka, aín xanun pëi machakë sënë́nkëmapain 'ain abë 'ima; 7 'ianan ka uibi an 'inantëkënuxun aín ñu ñukáxun bikë aribi usaribi okin upioxun 'inántëkënia; 'anan ka uinu 'ikë unin ñubi mëkamakin bitsima; 'ianan ka pitiñuma 'aish panankë uni a aín piti 'inánan chupañuma uni aribi aín chupa 'inania; 8 'inánan ka mi 'ën kuríki 'inámainun kamina mi 'inankë a inumikin 'ë 'inánti 'ai kixunbi kaima; kanan ka uinu 'ikë unibi 'atima oima; usa 'ixun ka bëtsibë 'atima onani nishanankë uni a mëníoxunkin a rabë́bi atun 'akë ñu a upíokin mëníoxunia; 9 usa 'ixun ka a unin 'ën banakama kikësabiokin 'akin ax kikësabi oi 'iti banakama a upíokin 'aia. A unix ka asérabi upí sinánñu 'aish upiti tsóti 'ikën. 'Ëx Dios 'aish kana ësai kin.

10 Usa 'aínbi ka a unin bëchikë achúshi an bënë́kinshi ñu 'akë 'ixun bëtsi uni 'ati 'ikën, ësokin ënë ñukama 'akë 'iti 'ikën, 11 usakin 'akin ka aín papan 'asama okin ñu 'akë 'iti 'ikën, usa 'ixun ka anuxua unikaman aín dios rabikin piti 'axun pikë matá me anu anribi atubëtan rabi kuania kuanxun ka anuxun bëtsi uni aín xanu bikuania, 12 usokin 'anan ka ñuñuma uni a 'imainun an ñu kuëënkë uni aribi 'atimonan bëtsi unin ñukamaribi mëkamatia, usa 'ixun ka 'inantëkënuxun aín 'ibu ñukáxun bëtsi unin ñu bikë a 'inantëkënima, usakin 'ai ka bëtsi unin dioskama a mi katamëanan bëtsi ñu 'ën a kuëënkëma 'aia, 13 usai 'ikin ka bëtsi uni aín kuríki 'inanxunbi a 'inánkë a inumikinsa cha 'inanun kixun ubíokin kaia: usa 'aish ka a uni upiti tsótima 'ikën. Usakin kamabi 'ën kuëënkëma ñukama 'atankëx ka a uni uisokinbi unin mënioisama 'inun bamati 'ikën, usaía a uni bamakë ax ka aín 'uchanbia bamakë 'iti 'ikën.

14 Usa 'aínbi ka a uni achúshi bëchikëñu 'iti 'ikën, an ka ain papaxa a 'ai 'uchakë ñukama 'unánkë 'iti 'ikën, usa 'aínbi ka ax aín papa 'ikësaribiti 'itima 'ikën; 15 ax ka 'ikë, unikaman matánuxun atun dios rabikë anu kuanima 'ianan, Israel unikaman a rabinuxun 'akë dioskama ami katamëtima 'ianan; bëtsi uni aín xanu bikuanti sinanima 'ianan, 16 uinu 'ikë unibi aín ñu ñukákëxun 'inanxun 'ë kamina 'ën ñu 'inánti 'ai kixun bënë́kin kaima; usakin 'anan ka uibi mëkamatima 'ianan, axa pitiñuma 'aish 'akëñuma tsókë uni aribi aín piti 'inánan chupañuma uni aribi aín chupa 'inania; 17 'inánan ka uinu 'ikë unibi 'atima oíma 'ianan ka bëtsi uni aín kuríki na 'inántëkënua 'inánkë a inumikian 'inánun kaima: 'imainun ka a tanti 'ën bana ax kikësa 'oíshi 'ikë: a uni ka aín papa 'uchakëkama a kupín bamatima 'ikën. Usai 'ika asérabi tsóti 'ikën. 18 Usa 'ain ka aín papax, bëtsi uni 'atima okë 'ianan ñu mëkamakë 'iakëxa, 'anan ka anua tsókë ëmanuxun aín aintsikaman ismainun ñu 'atima 'akëxa, usa 'aish ka aín 'uchakëkama anunbi bamati 'ikën.

19 Mitsux kamina ñukákanani kananti 'ain: ¿Uisa kupí kara aín bakë bëchikëribi aín papan 'ucha kupín 'atimokëma 'iti 'ik? Usama ka aín bakë bëchikënën ka ñu upí 'akin 'ën banakama tankin ax kikësabiokin 'axa: usa 'aish ka asérabi a unin bakë bëchikënëxëshi tsóti 'ikën. 20 Usa 'ain ka uix kara 'uchaia axëshi ñukë 'iti 'ikën. Usa 'ain ka aín bakë bëchikënëx aín papa 'uchakama kupín tëmëratima 'ikën, 'imainun ka ain paparibi aín bakë bëchikënën 'uchakama kupín tëmëratima 'ikën. Usa 'ain ka uni upíkama an upíokin ñu 'akë 'ixun a 'inánti ñu a biti 'ikën; 'imainun kana 'atima sinánñu unikama aribi 'atimokin sinánkin ñu 'akë 'ikë 'atimoti 'ain.

21 Usa 'ain ka uni 'atima sinánñu an kamabi ñu 'atima 'aia 'uchakë a sinanakin aín 'ucha a ënkin 'ën banakama ax kikësaibi 'iti a tankin 'anan ñu upíokin 'ai ka asérabi ñuima a unix tsóti 'ikën. 22 'Ën kana an 'a ñu 'atimakama a sinántëkëntima 'ain, usa 'ain ka a unix upiokinshi ñu 'ai upiti tsóti 'ikën. 23 'Ëx kana an ñu 'atima 'akë uni ax ñuti kuëënima, usa 'ain ka an 'akë ñu 'atimakama ëntankëx upitax tsóti 'ikën. 'Ëx Dios 'aish kana ësai kin.

24 Aínbi ka an ñu upí 'akë 'ixunbi a ënkin uni 'atima unikaman 'akë ñu a 'ati 'ikën, ¿mitsun sinánkëx kara usakin ñu 'akë unikama ax upitax tsóti 'ik? 'Ën kana amiribishi an ka ñu upíokin 'akëxa kixun sinántëkëntima 'ain: usa 'ain ka an 'unánkinbi usakin ñu 'ai 'ain 'uchakë kupín a unix bamati 'ikën.

25 'Aínbi kamina mitsux abi nëtë́tima 'ëinsana upiokin ñu 'akima 'atimakin ñu 'ai kikanti 'ain; 'aínbi kamina Israel unikama mitsun kuati 'ain, ¿mitsun sinánkëxun karana 'ën 'upiokin ñu 'aiman? ¿Usama ka mitsun kuni kamina ñu 'atimakin 'akanin? 26 Usa 'ain ka uni ñu upí akë ax an 'akë ñu upí a ënkin ñu 'atima 'ai, anunbi 'atimati bamati 'ikën. 27 Usa 'aínbi ka ui unin kara 'atima sinánkin ñu 'atima 'akë 'ixunbi, a ënkin ñu upí 'aia ax kuni ië́ti upiti tsóti 'ikën. 28 Usai 'ika 'ën kakësabiokin 'ën bana kuakin, an 'akë 'atima ñukama ëni, asérabi upiti tsóti ñutima 'ikën. 29 Usa 'aínbi ka Israel unikama kiti 'ikën, 'ën isana 'upiokin ñu 'aima kiax kiti 'ikën. ¿'Ën karana 'upiokin ñu 'aíma? ¿Israel unikaman atúnbi sinánxun ñu 'akëmakama ax kara upiokin ñu 'akë 'ik?

30 'Ën kana achúshi achúshi uni Israel unibu mitsu uisakin kaina ñu a usakinbi 'ati 'ain. 'Ëxmin 'Ibu 'aish kana asérabi ësai kin. Usa 'ain kamina bëríbi mitsun ñu 'atima 'akëkama a ënti 'ain, usa 'ain ka a kupín 'uchokë 'itima 'ain. 31 Usa 'ain kamina kamabi ñu 'atima 'ën kuëënkëma mi 'akë a ënkanti 'ain, usakin ëni kamina upíokin sinani kuëëni tsókanti 'ain. ¿Uisa kupín kara Israel unikama bamati 'ikën, 32 'ëx uibi bamati kuëënkëbëmabi bamati 'ik? Usa 'ain kamina ñu 'atima 'akëkama ëni upiti tsókanti 'ain. 'Ëx Dios 'aish kana ësai kin.”