Bimianan ka Nabucodonosornën aín suntárukamabëtan ñatankia bikë unikama aín me Babilonianu buánkëxa, 'imainun ka ami xëatia 'akë upibu anuxun Dios rabiti xubunua bikë akamaribi anuxun atun dioskama rabiti xubunu nankëxa; 3 usakin 'amianan ka an 'apun xubu bërúankë unikaman kushi Aspenaz a kakëxa, 'apun bakë bëchikëkama 'imainun kamina uni ñu 'unanbu atun bakë bëchikë, 4 bënábu usa ka a uni 'ikë kixun unin kakëma, 'ianan uisaibi aín namimi ñukin tankëma, sinan ñuira 'ixun kamabi ñu 'unántisabi, 'ixun an 'apun xubunuxun ñu mëëtisabi. A uni bënákama ka caldeo bana 'unámianan kirika kuënëoti 'unánmiti 'iti 'ikën. 5 'Imainun ka Nabucodonosornën uni bënákama a aín pikë piti a 'imainun an xëakë xëati abi nëtë́tibi 'inánun kakëxa, kanan ka rabë́ 'imainun achúshi baritia 'imikin kirika 'amikëxun 'unántankëxa a ñu mëëxuni anu 'inun 'iminun kakëxa.

6 A uni bënákamabë ka Daniel, Ananías, Misael 'imainun Azarías, Judá menu 'ikë ñakánu 'ikë 'iakëxa, 7 anuxun ka an 'apun xubu bërúankë aín kushi an atu aín anë bëtsiokin anëakëxa: Anëkin ka Daniel Beltsasar kakin anëanan; Ananías, Sadrac kakin anëanan; Misael, Mesac kakin anëanan; Azarías aribi Abed-negó; kakin anëakëxa.

8 Usa 'aínbi ka Danielnën 'ën kana 'apun pikë piti a 'imainun an xëakë a xëatima 'ai kixun sinánkëxa, sinánkin ka an 'apun xubu bërúankë aín kushi, a pitikama pinun kixun ubioxuma 'anun kakëxa. 9 Diosan 'amikëxun ka an 'apun xubu bërúankë aín kushi an Daniel upí sinánñu 'ikë isakëxa, 10 'aínbi ka aín kushi an Daniel kakëxa:

11 Usa 'ain ka an 'apun xubu bërúankë aín kushi an atu bëruánti nankë abë Daniel, Ananías, Misael 'imainun Azarías akama anu 'ain: abë Daniel banakëxa, banakin ka ësokin kakëxa:

12 —'Ën kana an mi ñu mëëxunkë nukama tankin ësokin 'anun mi kain: mapai rabë́ nëtë 'imikin paxa piti ñuishi pimianan 'umpax xëshi nukama xëaminun mi kain. 13 Usakin 'atankëxun kamina a nëtëkama inúkëbëtan, min nukama uisa karanuna an 'apun piti pikë bënákama abë 'ai kixun isti 'ain, usakin istankëxun kamina nukama uisa kaina oisa tani usakin 'ati 'ain. 14 Usakin kakëx ka an bërúankë uni ax asábi ka kana mitsu usakin 'ati 'ai kiakëxa, kitankëxun ka mapai rabë́ nëtë 'imikin atu tankëxa.

15 Usokin 'akëbëa mapai rabë́ nëtë inúkëbë a bëná unikamax, kushiirabu asábi 'apun piti an pikë bëná unikama asamaira 'iakëxa. 16 Usa 'ain ka an bërúankë 'apun piti 'inánan xëati 'inánkinma ëankëxa, ëanan ka paxa piti an pikë ashi buánxuankëxa.

17 A bëná unikama rabë́ 'imainun rabë́ a ka Diosan sinánñuira 'ixun bëtsi bëtsi kirika 'unánun 'unámianan uisa kara ñu 'iti 'ikë abi 'unánun 'unánmiakëxa. Usa 'ain ka Danielnën namákësa okin iskë a 'imainun, namákin iskë akamabi uisai ñu 'iti namákë kara ax 'ikë abi 'unánkë 'iakëxa. 18 Usa 'ain ka rabë́ 'imainun achúshi baritia 'apu kikë a sënë́nkëbëtan, a bëná unikama 'apun xubu 'ikë anu buánkëxa.

19 Anuax ka a uni bënákamabë 'apu banakëxa, 'aínbi ka a uni bënákamanu achúshi uni bënábi axa Daniel, Ananías, Misael 'imainun Azarías akamabë sënë́nkë 'aíma 'iakëxa, usa 'ain ka akamax 'apu ñu mëëxuni anubi bërúakëxa. 20 Anuxun ka kamabi ñu 'unánkëira 'iti bana 'imainun, sinánñuira 'iti banakama a 'apun ñukákëxa, ñukákinbi ka an ñu 'unánkëira mërakëxa, usa 'aish, a menu 'ikë an ñu tankë 'imainun an ñu 'unánkë unikamabëtan sënë́nmaira 'ikë mërakëxa. 21 Usa 'ain ka Daniel Ciro kakë uni axa persianu 'apu 'ikë achúshi bari 'ain anu bërúakëxa.