2 Ësai ka uisai kara Israel unikama 'iti 'ikë kixun ñuixunkin Oseas kai Dios kiakëxa: “Kamabi Israel menu 'ikë unikama ka bëtsi bëtsi ñu 'ai 'ëmi manuti xanu aín nami mëakakënëx 'ikësai 'iaxa. Usa 'ain kamina minribi anu kuantankëxun achúshi xanu bëtsi bëtsi unibë 'ikë min xanu 'inun biti 'ain, bitankëxun kamina ami bakë bëchiti 'ain, bëchikëx ka akamax achúshi xanu aín nami mëakakënën tuá 'iti 'ikën.”

3 Usakin kakëx kuanxun ka Oseasnën Diblaimnën bëchikë Gómer kakë xanu a aín xanu 'iti biakëxa, bixun 'ikinkin ka tuákin achúshi bëbu tuá ami 'akëxa. 4 Usa 'ain ka Diosan Oseas kakëxa: “Min bëchikë bëbu tuá bakënkë akamina Jezreel kakin anëti 'ain, ënuax basikëma 'aínshi kana Jehú kakë 'apu aín rëbúnkikama 'atima oti 'ain, an ka Jezreel menuxun 'atima ñuira 'akin a tanti bana kikësokin 'akinma uni 'atima okin 'amiakëxa. 'Ën kana Israel menua uinu 'ikë aín rëbúnki achúshinëxia 'apu 'iaxma 'inun 'imitima 'ain. 5 A nëtën kana 'ën Jezreel kakë me sapan anuan 'akanankë a këñunbi Israel unikaman suntáru masóti 'ain.”

6 Usa 'ain ka Oseasnën xanu Gómer kakë ax amiribishi tutëkëntankëx achúshi xanu tuá bakë́ankëxa. Bakënkë 'ain ka Diosan Oseas kakëxa: “Min ini bëchikë bakënkë a kamina Lo-ruahama kakin anëti 'ain, 'ën kana amiribishi Israel menu 'ikë 'apu nuibatëkëntima 'ain, 'ianan kana atun 'akë ñu 'atimakama tërënxunkin mëníotima 'ain. 7 'Aínbi kana Judánu 'ikë unikaman 'apu atumi 'atimakin sinanima 'ikima nuibati 'ain: usakin nuibakin kana 'ëxbi 'ain Dios 'ixun ië́miti 'ain. 'Aínbi kana 'akanankë 'ianan, kantiñu 'ianan, manë xëtokëñu 'ianan, caballo an nikinkë uniñu 'ikëbi a kupín 'imikima 'ënbi ië́miti 'ain.”

8 Usa 'ain ka Lo-ruhama an kanikin xuma ënkë 'ain Gómer ax tutëkëntankëx bëbu tuá bakë́ankëxa. 9 Usai bakëan ka Diosan amiribishi Oseas kakëxa: “Min bëchikë bëbu tuá bakënkë akamina Lo-amí kakin anëti 'ain, ax ka ësai kikë 'ikën, bërí kamina mitsux 'ën unima 'ain 'imainun kana 'ëx mitsun Diosma 'ain.”