Danielnën aín aintsikama kupín Dios ñuká bana
9
“Darío Asuero kakë uni 'ain bëchikë medos kakë ñakánu 'ikë, ax ka Babilonia unikamanu 'apu 'iakëxa. 2 Axa 'apu 'itabakë baritia anun kana 'ën an Dios kikë bana ñuikë Jeremías an kuënëo banakama a 'iskin 'akin 'unánkën, a ka Diosanbi setenta baritia 'imia uisai kara Jerusalén masókë 'iti 'ikë kixun Nukën 'Ibun ain bana uni ñuixunkë a kakëxa. 3 Usa 'ain kana añu ñubi pima chupa xëni pañuax chimapunu tsókin ësokin Dios ñukákën. 4 Ñukákin kana ësakin Dios kakën: Nukën 'Ibu Dios chaiira 'ianan kushiira min kamina mix kikësabiokin ñu 'akin, nuibanankë 'ixun min kikësabiokin kara min unikama ñu 'aia isin, a tanti min bana a kara asérabi 'aia kixun isin: 5 nukamax kananuna 'atima ñu 'ai 'uchan; usai 'ikin kananuna 'atima ñuira an; 'ianan min usai tsóti kuëënkë a 'unánimabi 'ian; usai 'ikin kananuna a tanti min banakama kikësokin 'anan, min sinánmikësoi 'isama tan. 6 'Ianan kananuna an min bana ñuikë min unikama kakëxunbi kuaisamatan, atun ka nun 'apukama 'imainun nun kushikama 'ianan nun chaitiokëkama 'imainun kamabi Israel unikama min anë ñuikin bana ñuixuankëxa. 7 Nukën 'Ibu Dios mix kamina uisa ñu 'atimabi 'akëma a 'ain, 'aínbi kananuna judíos unikama nux bërí rabinkësa tanin; Jerusalénnu tsókë 'imainun raíri Israel unikama 'imainun, 'urama 'ikë 'ianan 'ura 'ikëkama min kakësa okin 'aiama, min 'amikëxun axa numi nishkë unikaman atun menu buanka akama 'ikën. 8 Nukën 'Ibu, nukamaxribi kananuna nun 'apukama 'ianan, nun kushibu, nun chaitiokëkama 'iásaribiti mimi 'uchakë 'ixun rabinkësa tanin. 9 'Aínbi kamina mix Dios 'ixun nu nuibanan usai karanuna 'iisa tani uisai 'iabi nu nuibakë ax kuni asábi 'ikën. Nukamax kananuna min kakësoi 'ikëma 'ain, 10 nun kananuna min kakëxun min bana kuakinbi ax kikësokin 'akëma 'ain, Nukën 'Ibu 'imainun nun Dios kananuna min kakëxun min unikama an bana ñuikëkaman 'unánmikëxun min bana kuakëma 'ain. 11 Kamabi Israel unikaman ka min 'unanmikëxunbi min bana kuaisama tanxa, usa 'ain ka nunu 'atima ñuira min uni Moisésnën usakin kana 'atima oti 'ai kixun kuënëomia usaibi 'iaxa, nux kananuna mimi 'uchan usa 'ain. 12 Min nunu ñu 'atimaira 'imikin kamina usokin kana 'ati 'ai kiaxmi kia usabi okin nu 'imianan 'apukamanuribi 'imian, usa 'ain ka uínsaran nëtënbi bëría 'ikë ësai Jerusalénnu ñu 'ikëma 'ikën. 13 Kamabi ñu 'atimakama nuxnu 'inúkë ax ka Moisésnën kuënëo bananu kikësabi oi 'ia; usa 'aínbi kananuna nun mixmi nun Dios 'ikë mi barikëma 'ain, 'ianan kananuna nun ñu 'atima 'akëkama abi ënkëma 'ain, 'imainun kananuna min bana kikësoibi 'ikëma 'ain. 14 Usa 'ain kamina mix Dios 'ixun ënë ñu 'atimakama inuti tëmëranun nu 'imian, mix kamina nun 'Ibu 'ianan Dios 'ain, usa 'ain ka min 'akë ñukama 'upíira 'ikën, 'aínbi kananuna nukaman min bana kuaisatankin min kikësokin 'aisama tan.15 Nukën 'Ibu Dios min kamina Egipto menua chikínkin min kushi chaiira min unikama ismiakën, usakin 'akin kamina min anë axa bëtsi ñukaman anësamaira 'inun 'imia 'ixun bërí 'imin, 'aínbi kananuna nukaman min kuëënkëma ñu 'atima 'ai 'uchakin 'atima ñuira 'an. 16 Nukën 'Ibu nun kananuna 'unanin mix kamina axa nuibanairakë a 'ain. Usa 'ain kamina Jerusalénnu tsókë unikamami mix nishkë a ënti 'ain, ax ka min ëma 'ianan min bashi 'upíira kakë a 'ikën. Kamabi menu 'ikë unikama atu 'urama 'ikë ax ka Jerusalén 'imainun an mi rabikë unikama ami kuaia, nux 'uchakë kupí 'ianan ka nun chaitiokëkama 'ucha kupín usai 'ikania. 17 Usa 'ain kamina mix Dios 'ixun min kaisa uni 'ixun 'ën mi ñukákëxun 'ën bana kuati 'ain; minbi kamina a isi masá nuitukin uisa kara anuxun mi rabikë xubu ax bërúakëxa kixun isin. 18 'Ën kakëxun kamina mix Dios 'ixun kuati 'ain; 'upiokin nukama isanan kamina, anuxun min anë rabikë ëma ax kara uisa 'ikë isti 'ain. Nun kananuna nux upiti tsóti a kupín mi ñukátima, usa 'aínbi kananuna mix nuibanairakë ax chaiira 'ain mimi katamëkin mi ñukatin. 19 ¡Nukën 'Ibu, Nukën 'Ibu! ¡Nun bana kamina kuati 'ain, nun 'akë ñukama kamina nu mëníoxunti 'ain! ¡'Anan kamina nukamannu mi ñukákëkama nu 'akini uti 'ain! ¡Mixi Dios 'ixun 'anan kamina min ëma 'imainun min unikama an min anë rabikë akama 'akinti 'ain kamina basitima 'ain!
Danielnëan setenta semana ax usai 'iti namákësa okin isa ñuikë bana
20 'Ën kana ënkinma abi 'ën 'uchakëkama chikinanan 'ën uni Israel kamananribi ñukaxunkin chikinaxuan, 'anan kana 'ën 'Ibu Dios 'ain bashi upíira a kupínribi abë banakin kan. 21 Kakëbëbi ka Gabriel kakë ángel 'ën namákësokin iskëbëa 'ëmi mërakë ax nuánkësakuatsini anu 'ëx 'ikë anu uaxa. Ukë anun ka Dios ñuina xaroxunti hora 'iti chukúmara pishinkë 'ain bari kuabuti 'iaxa. 22 Anun ka ukin 'ë kaxa:
Daniel 'ëx kana bërí Jeremíasnën kuënëo 'ikëmi kirikanua 'iskin 'akë a uisai kikë kara kixunmi kuanun mi ñuixuni aín. 23 Minmi abë banakin kakëxumaishi ka Diosan min bana kuaxa. Usa 'ain kana 'ëx uisai kara ax min ñukákëx kiaxa mi kai ain, Diosan ka 'itsaira mi kuëënia. Usa 'ain kamina bërí bëmë́kin uisakin namákë kara min namákësokin iskë a mi ñuixumainun kuati 'ain:
24 Setenta semana ax ka (cuatrocientos noventa baritia inuti ñui kikë 'ikën) min unikama 'imainun min
ëma upí a inuti 'ikën, inutankëxun ka ax bana kuaisama tani 'ikëkama 'imainun aín 'uchakë kamaribi ënti 'ikën.
Usai 'ia ka Diosan aín 'uchakëkama unikama tërënxunti 'ikën,
usakin 'akin ka uníxa bëtsibë bëtsibë xënibua 'aínbi nuibananti a nanti 'ikën.
Usai ka min namákësokin iskë 'imainun an bana ñuikë Jeremías ax kiásabi oi 'iti 'ikën,
'ianan ka upíira kakë anu 'ikë ax upíira 'itánun mëníokë 'iti 'ikën.
25 Ënë kamina upíokin kuakin min 'unánti 'ain:
An kaískë 'apu bëbatamainun ka Jerusalén birutëkënkin 'atëkënti 'ikë Dios kiti nëtë ka 'iti 'ikën,
siete semana inuti ñui kikë ax ka (cuarenta baritia inuti ñui kikë 'ikën)
'imainun ka Jerusalén ëmanu anun niti baikama 'anan anun kënëarakë kënëkama 'akë ax sesenta 'imainun rabë́ semana ñui kikë ax ka (cuatrocientos treinta y cuatro baritia panáti ñui kikë 'ikën)
'aínbi ka a nëtëkamax anun 'itsaira tëmërai masá nuituti 'iti 'ikën.
26 Usai sesenta 'imainun rabë́ semana ax 'inúkë 'ain ka
Diosanbia kaískë 'apu ax 'akë 'iti 'ikën.
Usa 'ain ka Jerusalén 'imainun anuxun Dios rabikë xubu ax masókë 'iti 'ikën.
Achúshi 'apun ka aín suntárukamabë uxun 'atima okin masóti 'ikën.
Usakin 'akëx ka bakan 'ishi kuatsinkin ñu mapurukë usaribi 'iti 'ikën.
Usa 'ain ka uni 'akanankin ñu 'atima okin masókë ax usai ka 'iti 'ikë kixun Diosan nankësabi oi 'iti 'ikën.
27 Usa 'ain ka achúshi semana 'itëkënkë anun 'itsa uni kamabëtan mëníokin achúshi ñu 'ati 'ikën,
'aínbi ka achúshi semana 'ikë a nëbë́tsinuxunshi uínbi ñuina 'aímai këñutanun Dios xaroxuanan ñu 'inainshitima 'ikën.
Usa 'ain ka anuxun ñuina Dios xaroxunkë ax 'atima tikiti 'ikën,
usa 'ain ka 'ami kuaikin usakin an 'akë uni a Diosan 'atimaira oti 'ikën, kiax ka kiakëxa.” (Bana 'unánkë uni raírinën sinánkëx ka achúshi semana 'ain ki kikë ax siete baritia 'ikën.)