Danielnën namákësa okin rabë́ 'imainun rabë́ ñuinakan 'ëo isa ñuikë bana
7
Achúshi imë́ kana anua Beltsasar Babilonia menu 'apu 'ikin pëukë a bari anun namákësa okin 'ëx Daniel 'ixun isakën. Isun kana raíri a 'aisa akamaishi kuënëokën. Kuënëo aka ënëx 'ikën.2 'Ën kana namákin suñúan kushiira ain rëbumiax 'ianan, ain tsipúmiax 'imainun, ami bari kuabúkë amiax 'ianan amiax bari urukë amiax bëkikëbë parúmpapa 'umpax bëchunia isan. 3 Usai 'ikëbëshi ka 'ën usakin sinánkë 'aímabi rabë́ 'imainun rabë́ribi ñuinakan 'ëo 'ën iskëx raíri iskësamabu 'aish parúmpapanuax chikíaxa. 4 Usai 'i ka anpan chikíkë ax paru 'inúansa 'iaxa, 'aíshbi ka tëtëkamë 'ëon pëchisa 'iaxa. Usa 'aíshbi ka aín pëchikama ëchikicëbë, menuax nirui aín taë kaxú 'ikëkama ami tatíki niruaxa, usai 'ikëbë ka aín sinánkëkama ax unin sinánsaribi 'iaxa.
5 Usai 'ikëbë ka bëtsi axribi xaëónsa 'iaxa, usa 'aish ka amo chairukësa 'ianan, aín putu rabë́ 'imainun achúshiribi ax ka aín xëtakama anu 'ikë anuribi 'iaxa; usa 'ain kana ësai kia 'ën kuan: ¡Nirukin kamina uiti nami kaina 'aisatani anu sënën nami piti 'ain kiax ka kiaxa!
6 Usai 'ikëbë ka bëtsiribi aín rani panshian 'imainun tunanën tsaka tsaka 'inu iskësa axribi mëraxa, 'aínbi ka rabë́ 'imainun rabë́ pëchiu aín naminu 'iaxa; 'ianan kana rabë́ 'imainun rabë́ maxkáñuribi isan, an ka 'unánkëma uni aín kushi 'inánxa.
7 'Imainun ka ashiti sënë́nkin 'ën namákësokin iskë ñuinakan 'ëo ax 'aisama 'ianan rakuë́mianankë 'aish kushiirabu 'iaxa. Aín xëta ax ka chaiira 'aish manë iruira usa 'iaxa; usa 'ixun ka kamabi ñu pianan masókin 'anan axa tëxëkëkama aribi chakakin amáxa. Usa 'aish ka achúshi ñuinakan 'ëo 'ën namákësokin iskë usama 'iaxa, 'imainun ka mapai rabë́ manchanñu aín maxkánu 'iaxa.
8 Usa 'ain ka 'ën aín manchankama a iskëbë aín manchan anubi chukúma manchan achúshi chikíaxa, usai 'ikëbëtan ka mapai rabë́ manchan anpan urukë 'ën iskë anua rabë́ 'imainun achúshi manchan ëchiaxa, anu ka axa bërí urukë unin bërusa ax uruaxa ax ka kuëbíñu 'aish 'ëx kana usaira 'ai kiax rabiakati banaxa.
Diosan ñuinakan 'ëo uisa kara okatsia usakin 'a ñuikë bana
9 Usai 'ikëbëtan abi 'ën iskëxun ka anu tsótikama nanxa,
nankëbë ka anu achúshi uni apan tsóbuaxa. Aín chupax ka matsi uxua iskësa uxuira 'iaxa, 'imainun ka aín bu axribi xapu uxua upíira iskësa 'iaxa.
Usa 'ain ka anua tsókë anun mañakë ax tsi ërë́rukë iskësa usaribi 'iaxa,
10 usa 'ain ka tsi ërë́rukë ax ka achúshi baka iskësa 'aish a bëtánain chikíaxa.
Usa 'ain ka miles 'imainun miles unikaman ñu mëëxumainun,
millones 'imainun millones unikama a bëtánain sëtë́kë 'iaxa, anuxun ka a bana usai anu sëtë́kankë 'ain
bana ñuikin pëukin kirika, anua usai uni 'ikë kuënëokë akamaribi bakakë 'iaxa.
11 'Ën iskëx ka manchan chukúma ax 'atimatira anun rakuë́tisa 'inun banai ësai kiaxa; 'imainun ka 'ën iskëxun ñuina chaiira a 'atankëxun aín nami chánkapaxa, usotankëxun ka uni 'unánkëma an tsi rëkirukënu aín nami xarátia këñutanun puruaxa.
12 'Imainun ka raíri ñuinakan 'ëo aribi aín kushi bikuanxa, 'aínbi ka anúan 'ati aín hora 'itámainun tsópainun ëanxa.
13 'Ën kana ënë ñukama namákësokin imë́ isan:
Iskëbëshi ka nëtë kuin mëu unin bëchikësa 'aish uaxa, aia anua tsókë ami kikiani kuania ka uni apan an a 'urama onun 'amiaxa.
14 'Amitankëxun ka uni apan an aín kushi 'inánkin axa 'apu chaiira 'i kushiira 'inun 'imianan,
kamabi menu 'ikë 'imainun bëtsi banan banakë
unikaman ñu mëëxunkin rabinun 'imiaxa.
Usa 'aish ka aín kushi ax 'iásabi kushiira 'iti 'ikën,
'imainun ka uínbi ax 'apu 'ikë uínsaranbi masókë 'itima 'ikën.
15 “'Ëx Daniel 'aish kana namákësokin iskë anun 'itsaira rakuëan; usai 'i kana 'ën iskë ñukama ami 'itsaira sinan,
16 usai kana axa nikë unikama achúshi uisai kikë kara akama 'ikë an 'ë ñuixunun kixun ñukan. Ñukákëxun ka mi kana akama ñuixunti 'ai kixun 'ë kaxa:
17 A ñuinakan 'ëo rabë́ 'imainun rabë́ ax ka rabë́ 'imainun rabë́ 'apu an ënë menu 'apu kushiirabu 'ixun atun kuëënkësokin unikama 'ati a 'ikën.
18 Usokin 'akë 'aínbi ka Dios manámi 'ikë an kaískë unikama atúxa xënibua 'aínbi 'apu 'inun 'inánkë 'iti 'ikën.
19 Usa 'ain kana 'ën ñuinakan 'ëo rabë́ 'imainun rabë́ribi a uisa kara bëtsi iskësa iskësama 'aísha 'atimaira a 'unánkatsi 'ian: ax ka aín xëtakama manë iruira 'ianan aín 'untsisribi manë panshian 'akësa 'iaxa; usa 'ixun ka kamabi ñu pianan raíri masókin atima onan axa tëxëkëkamaribi aín taën amákin 'atima oxa. 20 'Imainun kana 'ën uisaira kara mapai rabë́ manchan kamañu 'imainun manchan chukúmañu 'aish bëruñu 'ianan, kuëbíñu 'aísha rabiakati banakë a 'unánkatsi 'ian, usa 'aish ka ax raíri manchan kamasama kushi 'iaxa, 'imainun ka rabë́ 'imainun achúshi manchan ax anu xabankë 'inun ëchikiaxa. 21 Usa 'ain kana a manchankaman abë 'akanankin Diosan unikama kanania isan, 22 usakin 'akëbëbi ukin ka uni apan ax bëbakin an ira Diosan kaískë uni 'akë unikama 'anun 'amiaxa, usakin 'atankëxun ka anuan 'ati nëtë sënë́nkë 'ain atúxa 'apu 'inun 'imiaxa. 23 Usa 'ain ka ësai kiaxa:
A ñuinakan 'ëo achúshinëx ka raíripan 'ia 'ain, axribi ënë menu 'apu 'iti 'ikën,
ax ka bëtsi 'apukama 'iásama 'iti 'ikën.
Usa 'ixun ka an kamabi menu 'ikë 'apukama uisa kara okatsia usakin 'ain taën amákësokin masókin këñuti 'ikën.
24 Mapai rabë́ manchankama ax ka mapai rabë́ 'apu axa bëtsix 'ikëbë 'ikëbë ënë menu 'apu 'ikanti a 'ikën.
Usai atux pain 'apu 'ian ka bëtsiribi,
'apu 'iti 'ikën, ax ka ax pain 'apu 'ikë usamaira 'iti 'ikën, ax ka manchan chukúma a 'iti 'ikën.
Usa 'ixun ka an rabë́ 'imainun achúshi 'apu atu meu 'inun 'imiti 'ikën,
25 Usa 'ixun ka an Dios manámi 'ikë kushiira 'atimakin ñuianan an rabikë unikama këñukin pëuti 'ikën;
'anan ka Dios kia bana aribi bëtsiokin nainsa tanan usakin unikaman fiesta 'atia Dios kia aribi bëtsiokin nainsa tanti 'ikën,
usa 'ain ka an Dios rabikë unikaman 'apu an kakësokinshi 'ati 'ikën, rabë́ 'imainun achúshi baritia 'irukë anua mapai achúshi 'imainun achúshi 'uxë sënë́mi kiti 'ikën.
26 'Aínbi ka anuxun bana mëníokë anuxun a 'apu aín kushi bikuankin a meu 'imikin,
ñankáishi bërutanun kamabi këñúkë 'iti 'ikën.
27 Usa 'ain ka Dios manámi 'ikë an a rabikë unikama atux kushiira 'ixúan,
xënibua 'aínbi bëtsi bëtsi menu 'ikë 'apukama 'akinun 'imiti 'ikën.
Usokin 'akinkëxun ka kamabi menu 'ikë unikaman ain bana tankin ax kikësabiokin 'akánti 'ikën.
28 Ënëx ka anu sënë́nkin namákësa okin iskë ñuikë a 'ikën. 'Ëx Daniel 'aish kana 'itsaira anun masá nuitukin sinani, 'ën bëmánanbi pëki 'ian; usai 'ikinbi kana uibi a ñukama ñuixunkëma 'ain.”