4 Usa 'ain ka abëtan ñu 'aia iskë raíri 'imainun 'apukaman uisakin karaisa 'atimakin a menu ñu 'aia kixun bariakëxa, 'aínbi ka Daniel ax upí uni 'ain an 'akë 'atima ñu achúshirabi mërama 'ikën; usa 'ain ka Danielnën ka ñu 'atima 'aia kiax ami këmëi manánti 'atima ñubi 'aíma 'iakëxa. 5 Usa 'aínbi ka, uisai kara ami manánti 'ikë kiax atuxi kanankëxa. Kánani ka uisari Danielmi manánti kara kananuna mëraima kiax kiakëxa, ki ka Danielnën 'apun iskëxun aín Diosan bana kikësa okin 'atima 'ikën, an ka aín Dios rabia usa 'ain. 6 Usai kanantankëx ka an ñu 'aia bërúankë 'imainun aín kushikama atux 'apu Daríobë kananuna banai kuanti 'ai kixun sinani kanankëxa.

Kanankiani kuanxun ka anua 'ikë aín xubunu bëbakin 'apu kakëxa:

—Mix 'apu 'aish kamina xënibuax 'iti 'ai kixun kakëxa. 7 Kamabi 'apukama ëma kamanua 'ikë atún ka timë́xun ësokin sinánxun bana nanxa, uínbi ka achúshi 'uxë sënë́mi atún dios ñukatima 'ikën, usai ika uibi ñukatima mix kikësoishi 'ikanti 'ikën. Usa 'ain ka uin kara a bana kikësokinbi 'aima ax ka anua paru 'inúan bukukë kini anu nikë 'iti 'ikë kixun ka sinánkanxa. 8 Usa 'ain kamina min ënë bana mix 'apu 'ixun a tantiokin, uínbi a bëtsiokin nainsama okin min anë nankin kuënëoti 'ain. Usa 'ikë ka uínbi medos 'imainun persanu 'ikë bana kikësokin 'akë 'ikë uínbi a bana tërëkatima 'ikën.

9 Usakin kakëxun ka 'apu Daríonën ain anë nankin a bana kuënëokëxa. 10 Usokin a bana kuënëokë ka Danielnën kuakëxa, kuabiani ka aín xubunu kuankëxa, kuanx atsínxun ka anua uxkë anua 'ikë ain xëputi chukúmakama Jerusalénmi okin xësunkin 'akë a xëókatankëx rantinpuruni tsóbukin Dios ñukákin rabiakëxa. Usokin ka rabë́ 'imainun achúshi okin achúshi nëtën nëtën an 'akësabiokin 'akëxa. 11 Usa 'ain ka a unikama kuantankëx anua Daniel 'ikë xubu anu atsíankëxa, 'atsínkinbi ka abë banakin Dios rabia mërakankëxa.

12 Usakin mërabianishi ka a unikamax an usai 'iti nankë bana a ñuikin 'apu kai kuankëxa, kuanxun ka ësokin kakëxa:

—Mix 'apu 'ixun kamina achúshi bana ësokin nan uin kara achúshi 'uxë anun uinu 'ikë diosbi ñukánan, uibi ñukatima 'ikën, uix kara mix 'apu 'aínbi mibë banaima ax ka anua paru 'inúankama 'ikë kini anu bixun nikë 'iti 'ikë kian, ¿asérabi kara usama 'ik? kixun ka atun kakëxa.

Kakëxun ka asérabi —ka usa 'ikën —kixun 'apun kakëxa, usa 'ain ka a bana kikësabiokin 'akin medos 'imainun persanu 'ikësaribi 'ikë uínbi tërëkatima 'ikën.

13 Usa 'ain ka a unikaman karaishikin 'apu kakëxa:

—Achúshi uni ñatanbëtsinkin bëa Daniel kakë judíos uni an ka mix 'apu 'ixunmi usai 'iti nankë bana a tanima, nun kananuna isan rabë́ 'imainun achúshi okían nëtë́tibi 'ain Dios ñukatia mëran kixun ka ax ami manánkin unikaman kakëxa.

14 Usokin kakëxun a bana kuati ka 'apu 'itsaira masá nuituakëxa, masá nuitukin ka uisakin kara Daniel ië́miti 'ikë kixun bariakëxa. Barikin ka bari xupibutamainun uisakin kara ië́miti 'ikë kixun sinánkëxa, 15 usa 'ain ka a unikama amiribishi anu rikiantëkënxun 'apu ësokin katëkëankëxa:

—Mix 'apu 'ixun kamina 'upiokin 'unan, medos 'imainun persanu 'ikë unikaman 'apun ax kikësama oi 'itima nankë bana aka uínbi bëtsiokin nantima 'ikën.

16 Usa 'ain ka 'apun bëtankëxuan Daniel anua paru 'inúankama 'ikë kini anu ninun kixun ain unikama kakëxa. 'Aínbi ka usakin 'akëma pan 'ain 'apun Daniel kakëxa:

—¡Min Dios ax kikësabi okinmi aín bana tankin 'axunkë an ka mi ië́miti 'ikën!

17 Usa 'ain ka Daniel anua paru 'inúan 'ikë kini anu 'ain, mapara pará chaiira bëxun anun kini xëkuë a xëpúakëxa, usakin 'aiaka 'apun anun kirika sellakë anun sellakëxa, 'anan ka 'apu chabu ax 'apu aín anun kirika sellakë anúnribi 'akëxa, usakin ka axa kikë bana ax kikësabi oia Daniel 'inun 'akëxa.

18 Usokin 'abiani ka 'apu aín xubunu kuankëxa, kuantankëx ka xupinbukëbëtanbi pianan ax 'ikësabi kuaianan, 'ima 'uxi rakabuakëxa usai rakabuaxi ka a imë́ uxima 'inëakëxa. 19 Usai 'inëti ka pëkarakëma 'aínshi bënëtishi nirukiani kuantankëx anua paru 'inúankama 'ikë kini anu bëbakëxa.

20 Bëbakin ka 'urama okin 'apun Daniel masá nuitukëishi aín bana 'ixun ësokin kakëxa:

—Daniel Dios këñutima oi tsókë aín uni, ¿ami ax kikësabiokin min 'axunkë an kara paru 'inúan kamanua mi ëñëmiax?

21 Kakëxun ka Danielnën kakëxa:

—¡Mix 'apu 'aish kamina xënibua 'aínbi tsóti 'ain! 22 'Ën Diosan ka 'ë uisabi oima paru 'inúankama kuëëtsë́kinun an 'imiti ain ángel xuaxa, Diosan ka 'ëx kana uisa ñu 'atimabi 'akëma 'ai kixun 'unánan 'ën kana uisa ñu 'atimabi mix 'apu 'ikë 'axunkëma 'ai kixun 'unánxa.

23 Usa 'ain ka 'itsaira kuëënkin 'apun anua paru 'inúan 'ikë kini anua Daniel binun kixun aín unikama kakëxa. Kakëxuan bitsia iskëxbi ka Diosmi katamëkë 'ikëa paru 'inúanën uisabi aín namikama okëma isakëxa.

24 Usokin 'an ka an Daniel ñankaíshibi 'uchokë unikama 'apun bana kikësabiokin atun xanu 'imainun atun bakë bëchikëkama këñunbi bëakëxa, bëkë ka anua paru 'inúankama 'ikë kini anu nikankëxa, nia ka paru 'inúankaman anua atux bukukë anu pakëkëmaishi atunu 'irukin bikin xoñuma rakankin piakëxa.

25 Usa 'ain ka 'apu Daríonën kamabi menu 'ikë unikama 'imainun bëtsi menu 'ikë unikama aín banan banakë akama ësakin kakin achúshi kirika kuënëokëxa: 'Ëx kana mitsúxmi 'upitax bukuti kuëënin, 26 'imainun ka ësokinribi unikama kanun kakëxa, kamabi uni 'ëx 'apu 'aían tsókë unikaman ka Danielnën rabikë Dios 'ashi rabikanti 'ikën.