5 Usakin 'akëbëbi ka a horabi achúshi unin mëkën rëbu anua tirítan nankëxun pëkakë anu mërakëxa, mërakin ka anua timëkankë 'ukëmëu kënë uxua anu kuënëokëxa. Kuënëoia mëkën rëbu a isíshi ka 'apu, 6 ratuti bëpëki bërëi saki 'ikë anunbi aín xo rabë́ bëtsimi ratíkai aín maxkámibiki 'itsaira rakuë́ti bërëakëxa.

7 Usai 'i munuma kuënkëni ka an ñu tankë uni 'imainun an ñu 'unánkë unikama 'imainun an uisai kara ñu 'iti 'ikë an 'unánkë unikama Babilonia anu 'ikëkama ka uti 'ikë kiax kiakëxa:

—Uin kara kuënëokë a isti 'ikën, istankëxun uisai kikë, kara a 'ë ñuixunia a unix ka chupa upíira okin kuënëokë a pañumikë 'iti 'ikën, 'ianan ka manë risi kuri 'akë tëñumikë 'aish 'ësaribi 'aish 'ë kaxú 'apu 'iti 'ikën.

—¡Mix 'apu 'aish kamina xënibua 'aínbi tsóti 'ain! Usa 'ain kamina 'itsaira sinani min bëmánan pëki 'itsaira ratutima 'ain, 11 mix 'apu 'ain ka achúshi uni dioskaman bëru ñunshinan 'akinkë anu 'ikën. Min papa 'apu 'ain ka a unin upíokin sinánkë 'iakëxa, usa 'aish ka ax ñu 'unáinra 'ianan an ñu tankë 'aish dios kamasaribi 'ikën, usa 'ikë ka min papa Nabucodonosornën a uni Daniel kakë an ñu tankë unin 'apu 'imainun an ñu ñunshinan kushin ñu 'akë 'ianan an ñu 'unánkë 'imainun uisai kara ñu 'ia an tankë ënë menu 'ikë atun kushi 'inun anëakëxa, 12 usa 'ikë ka Daniel a min papan Beltsasar kakin anëakëxa, ax ka an kikë bana a 'inumikin sinánñuira 'ixun uisakin namákë kara a 'imainun 'unántisama bana abi kuaisabiokin ñuianan ñu 'aisama inuti abi ñuikë 'iakëxa. Usa 'ain kamina Daniel kuëënti 'ain, an ka uisai kara kënëkënu kuënëokë ax kia kixun mi ñuixunti 'ikën.

13 Usa 'ain ka Daniel aín unikaman 'apunu buánkëxa buankëka 'apun ñukákëxa:

—¿Mix kaina Daniel, 'ën papa Nabucodonosornëan 'apu 'ixun ñatanbëtsinkin Judánua bëa a 'ain? 14 Mix ismina dioskaman bëru ñunshin upíñu 'ai kixun ka 'ë kaxa, 'imainun ismina mix upíokin sinánkë 'ianan, sinánñuira 'ianan ñu 'unáinrakë 'ai kixun ka 'ë kaxa. 15 An ñu 'unánkëira unikama ënë menu 'ikë kana ax ka ënu 'iaxa an ka istankëxun uisai kikë kara ënë banakama 'ë ñuixunti 'iaxa, 'aínbi ka uisa kara a bana kia kixunbi atun 'unanima. 16 Usa 'aínbi kana, 'ën min ismina bëtsi ñukama 'imainun mënioisama tëira ñu mënion kixun ñuia kuan. Usa 'ain kana minmi a bana istankëxun uisai kara a bana kia 'ë ñuixunkëxun, mi chupa upíira upí 'itánun kuënëokë a mi pañumiti 'ain, 'amianan kana kuri, manë risi, 'akë a mi tëñumianan 'ëx 'ikësaribitimi 'ëx 'apu 'ain 'apu 'inun mi 'imiti 'ain.

17 Kakëxunbi ka Danielnën 'apu kakëxa:

—Mix kamina 'ëmi 'inainshikatsi kikë min ñukama abëbi bërúti 'ain, 'imainun kamina uinu 'ikë bëtsi uni karamina min xubunu 'imitisa tani ñukama a 'inánti 'ain. 'Ën kana mixmi 'apu 'ikë kënënu kuënëokë bana ax kara uisai kia mi ñuixunti 'ain. 18 Dios manámi 'ikë kushiira an ka, min papa Nabucodonosor, axa 'apu 'aish chaiira 'ikëa kamabi menu 'ikë unin uisakinbi kakëma 'inun 'imiakëxa. 19 Usa 'ain ka an kushiira 'inun 'imiakëxa, 'imikë 'ain ka kamabi ëmanu 'ikë unikama 'imainun bëtsi mekamanu 'ikë unikama 'ianan aín bananbi banakë unikaman uisakinbi káma 'ikën, kaima ka ami rakuë́ti 'ianan a kuati bërëi ami 'ikankëxa. 'Imainun ka ui kara 'amikatsia a 'amianan ui kara 'amitisama tania a 'amiama 'ikën. Usakin 'akin ka bëtsi bëtsi cha 'imianan; bëtsi bëtsi ñuumarasa 'inun 'imiakëxa. 20 'Aínbi ka 'ëx kana usaira 'ai kixun sinani ax chaiira 'ia iskin, an kuëënkësa okia uni 'aia Diosan aín kushi biküankëxa. 21 Usakin 'atankëxun ka uni 'ikëbi unikamanua chikinkin achúshi ñuinasa 'inun 'imiakëxa; usokëx ka ñuina raëkëma 'imainun vaca bënëkamabëtan pasto pi nitsia ka, nibítan 'ibúkin aín nami chabókëxa, usa 'ain ka Dios manámi 'ikë an kushiira 'ixun kamabi menu 'ikë unikama 'akianan, ui kara 'apu 'imitisa tania a 'apu 'imia kixuan anun 'unánti nëtë 'itámainun 'akëxa.

22 Usa 'aish kamina bërí mix aín bëchikë Belsasar, 'aish axa usai 'ia 'unánxi upitax tsókëma 'ain. 23 Usa 'ain kamina mix 'apu 'aish Nukën 'Ibu Dios naínu 'ikë ami kuaikin mesanuxun ami xëakë xampakama anuxun Dios rabiti xubunua 'ia akama bëan, bëxun kamina min kamikë unikamabëtan ami uvas baka paëokin vino 'akë xëakin min dioskama kuri, manë uxua, manë panshian, manë tunan, i 'akë 'imainun maxá 'akë mitsun dioskama rabikin ami xëan; akaman ka isima 'imainun kuatima 'ianan ka añu ñubi 'unanima. Usa 'aínbi kamina Dios an mix 'apu 'ikë bërúankin tsónun 'imikë a rabikëma 'ain, an ka an kuëënkësa okin mi kamabi ñu min 'akë a 'anun mi 'amiaxa. 24 Usa 'ixun ka an banakama ësai kikë ënë kuënëoti mëkën xuaxa, 25 MENÉ, MENÉ, TEKEL 'imainun PARSÍN, 26 ax ka ësai ki kikë 'ikën: MENÉ: Diosan ka anúnmi mix 'apu 'ikë nëtëkama a tupuanxa 'imainun ka anúnmi mix 'apu 'ikë nëtë sënë́nti aribi nanxa; 27 'imainun ka TEKEL: kikë bana ax ësa 'ikën: mix 'apu 'ikë ka anun ñu 'ië tupúnti anun tupuanxa, usa 'aínbi kamina anu sënën tupúnti nankë anu sënënima a shimú 'ian, usaribi ka mix 'apu 'ikë ax 'ikën; 28 Usa 'ain ka PARSÍN kikë bana axribi ësaribiti ki kikë 'ikën: Diosan ka mixmi 'apu 'ikë anua chikínkin mi medos 'imainun persianu 'ikë unikaman 'anun mi 'inánti 'ikën. Kixun ka Danielnën kakëxa.

29 Usakin kakëxun ka 'apu Beltsasarnën, aín unikama Daniel chupa upíokin kuënëokin 'akë pañumianan kuri manë risi tëñuti tëñuminun kakëxa, kanan ka kamabi unikama bënë́kinshi, Danielnëx ka 'ësaribi 'inun 'apu 'iti 'ikë kixun kamabi unin kuanun kuakokëxa. 30 A 'imë́bi ka Beltsasar caldeo unikaman 'apu 'ikëbi uni itsin 'akëx ñuakëxa. 31 Bamakë 'ain ka Darío, Medianu, an 'apu 'ikin pëuakëxa. Anu ka Darío sesenta 'imainun rabë́ baritia 'irukë 'iakëxa.