'Apu Nabucodonosor aín sinan bëtsi 'atima ñuikë bana
4
Ësai ka 'apu Nabucodonosor kiakëxa: 'ëx kana kamabi ëmanu 'ikë unikama 'imainun bëtsi menu 'ikë unikama 'ianan bëtsi banan banakë unikama atun menu 'ikë akamaxa upiti ñuñu 'i bukukanti kuëënin kixun ka 'apun kirika kuënëomiakëxa. 2 'Ën kana mitsunmi Dios kamabi kushiñu an 'ë 'axunkë ñukama mitsun 'unánti kuëënin. 3 An 'akë ñux ka chaiirabu 'imainun upíira 'ikën, usa 'ain ka ax xënibua 'aínbi 'iti 'ikën, 'imainun ka aín kushi ax xënibua 'aínbi këñutima 'iti 'ikën.4 'Ëx 'Apu Nabucodonosor 'aish kana, 'ën xubunu upitax tsóti ñuñuira 'aish 'itsaira kuëëni Babilonia ëmanu tsoóakën. 5 'Aínbi kana achúshi imë́ 'uxi 'ibúxunbi 'atimakin namán, namáxun 'ën bëtsiokin sinánkëkama anunbi 'itsaira rakuëan. 6 Usai 'ikin kana 'ë isia ukanun kamabi an ñu 'unánkë unikama Babilonia ënu ikë unikama kamian, atua uisakin namákë kara 'ën namákë ax 'ikë kixun 'ë ñuixuni unun kamian. 7 Usakin kamikëx ka an ñunshinan 'amikëxun ñu 'akë 'imainun, an ñu tankë 'ianan, an ñu 'unánkë 'imainun, uisai kara ñu 'inuxun 'aia kixun an tankë, Babilonianu 'ikëkama atux uaxa, aia kana 'ën namákë a ñuixuan, 'aínbi ka atun uisakin namákë kara ax 'ikë kixun 'ë ñuixunkëma 'ikën. 8 Usai atux pain uan ka Daniel kakin anëkë 'ikëbi Beltsasar kakinribi anëkë axribi 'ën dios rabi ukësa kuatsini uakëxa, 'aíshbi ka ax Dios upíira aín bëru ñunshinan aín tsóti 'akinkë 'iakëxa, usa 'ikë kana 'ën namákë ñuixunkin ësokin kan:
9 Beltsasar an ñu tankë unikaman kushi 'ën kana 'unanin Dios upíira aín bëru ñunshin an ka mi 'akinia, usa 'ixun kamina min kamabi 'unántisama ñu abi 'unanin kixun kan. Usa 'ain kamina 'ën namákin iskë a mi ñuixunkin kamainun kuati 'ain, kuakin kamina uisakin namákë kara 'ën namákin iskë ax 'ikë 'ë ñuixunti 'ain. 10 Ësokin kana 'ën 'uxun namákin isan:
Me nëbëtsi i achúshi chaxkë́ira nikë kana namákin isan.
11 Usa 'ain ka a i kani chaiira 'iaxa;
usai 'ikin ka aín pëñanën naíkamë 'ëo tikakë 'iaxa, usa 'aish ka ax uinu kara me kuainakëakëxa
anuxunbi iskë 'iaxa.
12 Ax ka aín pëchikama upíira 'ianan,
'aisamaira 'inun bimikë 'iaxa,
usa 'aish ka kamaxunbi pitibëtan sënën aín bimi 'iaxa.
Kamabi ñuinanëx ka aín tupëonkënu 'iaxa,
'imainun ka aín pëñan kamanu ñuina pëchiu kaman nóopa buinkë 'iaxa,
usa 'ain ka kamabi menu 'ikë unikama 'imainun ñuinakamaribi a imi katamëti tsókë 'iaxa.
13 Usa 'ain kana usokin namánux 'uxunmabi achúshi ángel an bërúanti nankë namákin naínuax ubutia isan,
14 ax ka kushin banai ësai kiaxa:
i akamina menu nipakëtanun rëti 'ain 'axun kamina aín pëñankama tëakëbëa,
aín pëchikama tákikëbë aín bimikama abístanun tëati 'ain.
Usokin 'akëbë ka an tupë́onkë tëmú bukukë ñuinakama 'imainun ñuina pëchiu aín pëñanu 'ikë akamaxribi kuani nëtë́ti 'ikën.
15 'Aínbi ka aín buru 'imainun aín tapunkama ax menu ënkë 'iti 'ikën;
a kamina manë tunan këñun manë panshian 'akë risi anun tëkërëkati 'ain,
'atankëxun kamina ninu 'ikë basinua 'inun ënti 'ain.
Usokin 'akë 'ain ka anu nibí 'ibúti 'ikën,
'imainun ka an basi pikë ñuinakamabëtan basi pi niti 'ikën.
16 'Imainun ka unin sinánkësa okían sinánkë a nëtë́ti ñuinanën sinánkësoi achúshi ñuinasaribi 'iti 'ikën,
usaía 'atimakë ax ka mapai achúshi 'imainun rabë́ baritia pain basiti 'ikën.
17 Ënëx ka usai ka 'iti 'ikë kiaxa an bërúanti nankë
ángelkama ax kikë 'ikën,
usa 'ikë ka kamabi unikaman 'unánti 'ikë,
ax ka manámi 'ikë Dios kamabi kushiñu a 'ikën,
an ka uikara 'apu 'imitisatania a 'apu 'imianan uix kara ñuumasara 'ikë a unikamaribi aín kushia aín menubi 'inun 'imia.
18 Ënëx ka 'apu Nabucodonosor 'ixun 'ën namákë 'ikën. Usa 'ain kamina mix Beltsasar 'ixun bërí uisokin namákë kara 'ën namákë ax 'ikë kixun 'ë ñuixunti 'ain, uinu 'ikë unínbi ka 'ëx 'apu 'ain, an ñu 'unánkëkama achúshinënbi ka 'ën uisakin namákë kara ax 'ikë kixun 'unánkëma 'ikën, usa 'aínbi kamina Dios upíira 'ain bëru ñunshinan 'akinkëxun min kuni 'ë ñuixunti 'ain kixun kaxa. 19 Usa 'ain ka Daniel kakin anëkë 'ikëbi Beltsasar kakinribi anëkë ax 'ëorapain ain sinánkë rakarakëtamainun sinani niaxa. Usai 'iabi kana 'ëx 'apu 'ixun kan: Beltsasar 'itsaira sinánkinma kamina uisakin namákë kara 'ën namákë ax 'ikë 'ë ñuixunti 'ain kixun kan. Kakëxun ka Beltsasarnën 'ë kakëxa: Min namákë ax ka uin kara mi 'aisama oisatania a unikamanubi pakëti 'ikën.
20 I chaxkë́ 'ianan chaira 'ikëmi min, naíbëtan sënën 'ikëa unin uranxunbi istisa namákin iskë, 21 ax ka pëi upíirabu 'ianan, aín bimi 'aisamaira 'ikë kamabi ñuinakan piti 'iaxa, 'imainun an tupë́onkë tëmú 'itsaira ñuina ninu 'ikë anu tupëni bukukë 'iaxa, 'imainun ka ain pëñankama anu ñuina pëchiñu kaman atun na 'akë 'iaxa, 22 a iásaribi kamina mix 'apu 'aish chaiira 'ianan kushiira 'ain. Usai 'imi mix chaiira 'ikë ax ka naíbëtan sënë́nsa 'ikën, usa 'ain kamina min kamabi menu 'ikë unikama minan 'inun 'imia.
23 'Imainun kamina min namákin 'apu 'ixun achúshi ángel an bërúankë unisa 'aish upíira naínuax ubuti ësai kia kuan: I chaiira ax ka rëratankëxun masókë 'iti 'ikën, 'aínbi ka 'ain buru menu 'ikë a 'imainun 'ain tapunkama ax anubi ënkë 'iti 'ikën, usakin 'axun ka manë risi tunan 'imainun panshian mëskukin 'akë anun tëkërëkatanxun ninu 'ikë xubi kamanu 'inun ënti 'ikën. Usokin 'akëx ka ami nibí 'ibúmainun ñuinakamabëtan ninu nikin basi pi mapai achúshi 'imainun rabë́ baritia niti 'ikë kiax ka kiakëxa. 24 Ënëkamax ka ësai kikë 'ikën, Dios kushiira manámi 'ikë an ka usokin mi 'apu 'ikëbi 'atima oti 'ikë kixun sinánxun nanxa. 25 'Imainun kamina mix 'apu 'aíshbi chikiti unikamabë ënanantankëx chikítankëx ñuina kamabë niti 'ain; usai 'ikin kamina vaca bënëkamasa 'ixun pasto pinuxun 'ain, usai 'ia ka pëkarakuatsínkëbëtan nibí 'ibúkin min nami chabóti 'ikën. Usai kamina mix 'apu 'aish mapai achúshi 'imainun rabë́ baritia anúnmi Dios an ka kamabi kushiñu 'ixun axa aín kushi 'iti unikama ax kuëënxun aín kushi 'inun 'imia, kixun 'unánti nëtë 'itámainun niti 'ain, an ka uikara 'apu 'imitisatania a 'apu 'imia.
26 Aín buru 'imainun aín tapunkama ñui kikë ax ka ësaimi 'iti ñui kikë 'ikën, mix kamina amiribishi 'apu 'itëkënti 'ain, mix 'apu 'ixun Dios ax ka asérabi kushiñu 'ikë kixun 'unanin. 27 Usa 'ain kamina 'ën mi kakësokinbi 'ati 'ain, 'ai kamina amiribishi 'uchatëkënkinma 'upiokin ñu 'ati 'ain, 'akin kamina 'atima okinmi ñu 'akë ënkin uni ñuñumakama 'akinti 'ain, usokin 'ai kamina 'apu 'aish uínbi uisabi okëma kuëëni tsóti 'ain kixun ka Danielnën 'apu kakëxa.
28 Usa 'ain ka ënë ñukama ñuikin Danielnën kakësabi oi 'apu Nabucodonosor inúakëxa. 29 Usa 'ain ka achúshi baritia an namákë ñukama a inúkëbë 'apu ain xubu Babilonianu 'ikë a manámi tëëkitsi anu kuaruax, 30 nitsax ësai kiakëxa: ¡Ka kuat, chaiira cha ka Babilonia ëma 'ikën! 'Ëx kushiira 'ixun kana anu 'ëx 'apu 'ia 'ikëa unin ax kushiira 'ixun ka usakin 'amiakëxa kixuan unin 'unánun kana 'amia kiakëxa.
31 Usai banai sënë́nxumabi ka 'apun naínuaxa ësai achúshi bana kia kuakëxa: Ënë bana kamina kuati 'ain 'apu Nabucodonosor anumi 'apu 'ikë ëma ax ka minama 'ikën; 32 'ën kana unikamabë 'imami ñuinakamabë 'inun mi 'imiti 'ain; anuxun kamina pasto vaca bënëkaman 'akësaribi okin mapai achúshi 'imainun rabë́ baritia anúnmi, Dios ax ka ënë menu 'ikë ëmakama aín kushi 'ianan ui kara aín kushi 'imitisatania a aín kushi 'imia kixun min 'unánti nëtë sënë́ntamainun 'iti 'ain.
33 Usai ka 'iti 'ikë Daniel kikësabi oi ka a bana kuatishi Nabucodonosor unikamanuax chikíakëxa; chikínxua vaca bënëkaman 'akësaribi okin pasto pi nitsia nibítan aín nami chabókëx ka aín rani 'imainun aín 'untsiskamaribi uruakëxa, usai 'ika tëtëkamë 'ëo aín rani uruanan 'untsis urukë usaribi 'iakëxa.
Diosan Nabucodonosor usai tëmëranun 'imitankëxun mëníotëkëa ñuikë bana
34 Anun 'ëx usai 'iti nëtë a sënë́nkëbëtan kana 'ëx Nabucodonosor 'ixun naímiu bësukin isan, iskin kana 'ën sinan bëtsikë a mëníokakin asábi tan; usai 'ikin kana Dios manámi 'ikë a asabika kixun sinánxunkin rabian, ax ka nëtë́tima oi tsotia, aín kushix ka këñutima oi 'iti 'ikën, ax ka kamabi nëtën xënibua 'aínbi 'iti 'ikën.
35 An iskëx ka kamabi menu tsókë unikama ñuumara 'ikën.
An ka uisakin kara 'aisatania usakin naínu 'anan menuribi ñu 'aia.
Usa 'ain ka an usakin kamina min kushi ñu 'atima 'ai kixun kanan, uisa kupín kaina usakin ñu 'ai kixun an kati uni 'aíma 'ikën.
36 Ësai banai sënënishi kana a nëtënbi 'ën 'atimakin sinánkë a mëniokatëkëni pëxkúti amiribishi upíokin sinánkën. Usai 'ia ka 'ëx 'apu 'aia aín kushikama 'ixun an bana mëníokë unikama 'imainun an uni bana ñuixunkin 'ësëkë akama 'ënu utëkëankëxa, uxun ka amiribishi ënë menubi 'apu 'inun 'ë 'imiakëxa, 'imikëx kana bëráma 'iásamaira 'inun 'apu 'itëkëni chaiira 'apu 'ianan kushiira 'apu 'iakën, usai 'i mënin sinánñushi 'ia ka usa ka a 'apu 'ikë kixun unin 'unánkë 'iakën.
37 Usa 'ain kana 'ëx Nabucodonosor 'ixun bërí Dios naínua 'apu 'ikë a rabin, an 'akë ñukama ax ka asérabi 'ianan upíira 'ikën, an ka ax isa usaira 'ikë kixun sinani rabiakakë unikama aín kuëënkësa okin 'ati 'ikën.