3 Usokin kamikëx uax ka uni ñu 'unanbu 'imainun aín kushibu 'ianan raíri uni chabukama atux anuxun ñu tankin 'amixun nitsinmikë a bëtánain, ënëx ka bërí mitsun rabikë 'iti 'ikë kixun 'apun kanun anu nirakëkankëxa. 4 Usa 'ain ka unikama timë́kë 'ain an pëuti anëkë an munuma banakin unikama kakëxa: Kamabi ëmanu 'ikë unikama axa bëtsi bëtsi menuax ukë 'imainun aín bananbi banakë unikaman mitsun kamina kuati 'ain: 5 Mitsun an manë banañu banoti an banomainun an xunkati 'akë a 'amainun bëtsi ñukama a banamiti a 'aia kuatishi kamina mitsux, 'apu Nabucodonosornën 'amikë kuri 'akë ñu nitsínkë ënë rantinpuruni 'ikin rabikanti 'ain. 6 Usa 'ain ka kamabi unikama an rantinpuruni 'ikin ënë ñu rabikëmakama ax bënë́kinshi suntárunën bitankëxun kini anu tsi tíkakëx ënxaira 'itánun ërë́kë anu nikë 'iti 'ikën.

7 Usa 'ain ka anua timëkamë 'ëokë unikama atun kuatanun an manë banañu banokëkama an 'amainun an ñukama mëëti 'unánkë akamanribi 'aia kuati kamabi unikama rantinpuruni tsóbukin kuri 'axun nitsínkë ñu a rabikankëxa.

8 Usokin 'amainun ka, uiti Babilonianu 'ikë unikama atun judíos uni bënákama ax 'apu kikësoi 'ima kixun 'apu Nabucodonosor kai kuanuxun isakëxa, 9 isbiani kuanxun ka ësokin kakëxa:

—¡Nux kananuna mix 'apu 'aish tsókëpan 'ikëa unin 'itsa baritia 'imikin min kakësokin 'ati kuëënin! 10 Mix 'apu 'ixun kamina kamabi menu 'ikë unikaman ka rantinpuruni 'ikin kuri 'axun nitsínkë a kamabi ñu a banamiti a banamia kuakinshi rabiti 'ikë kixun bana nan, 11 usa 'ain kamina mix uix kara usai 'ima ax ka tsi rëkirukë ënxaira anu nikë 'iti 'ikë kian. 12 Usaími kikë ax ka asábi 'ikën, usa 'aínbi ka uiti judíos karamina mix 'apu 'ixun Babilonia ëmanu 'ikë ñukama an bërúanti anëa akaman mix kikë banakama tainsama tania, usa 'ixun ka a rabiti ñukama rabianan mix 'apu 'ixun kuri amixun nitsinmikë aribi rabitisama tania. Akamax ka Sadrac, Mesac 'imainun Abed-negó akama 'ikën.

13 Usokin kakëxun kuati ka Nabucodonosor xuamati nishakëxa, nishkin ka aín suntáru raíri anua 'ikë anua bitsinkian Sadrac, Mesac 'imainun Abed-negó. Anu bënun kixun xuakëxa, xukëx kuanxuan bëkë ka 14 ësokin ñukákëxa:

16 Usakian ñukákëxun ka uni bëna rabë́ 'imainun achúshi akaman kakëxa:

—Nukamax kananuna ënë ñu rabanan mibë kuëbikanani banatima 'ain. 17 Nukamanu rabikë Dios an ka numi tsi rëkirukë mëu nianan uisa kaina mix 'apu 'ixun nu oisatani, usakin min 'aiabi nu ië́miti 'ikën. 18 'Aínbi kamina nun 'akëbëtanmabi mix 'apu 'ixun upíokin 'unánti 'ain, nun kananuna min rabikë dioskama rabianan kurimi ñu tankin 'amixun nitsínkë aribi ami rantipuruni tsóbukin rabitima 'ain.

19 Usokian rabë́ 'imainun achúshi uni bënákama an kakëxun kuati ka 'apu Nabucodonosor aín bëmánanbi panshínkuatsini 'itsaira nishakëxa. Usai 'ikin ka an ñu mëëxunkë unikama anba tsi rëkarukin anu sënën xanatanua tikakë a inumikian 'aisamaira xana 'itanuan 'anun 'amiakëxa; 20 usokin 'amitankëxun ka aín suntárunën kushi raíri Sadrac, Mesac 'imainun Abed-negó akama nëatankëxun kininua tsi ënxaira rëkirukë a mëu ninun kakëxa. 21 Usa 'ain ka rabë́ 'imainun achúshi bëná uni akama aín kushibunëa pañukë chupa, akëñunbi nëatankëxun tsi ënxaira 'inun rëkirukë anu niakëxa. 22 Usa 'ain ka 'apux ax kikësabi okían bënë́kinshi 'anun kikë 'iakëxa, usa 'ain ka tsi rëkirukë ax ënxaira 'aish rëkikianxun an tsinu rabë́ 'imainun achúshi uni bëná nikë suntárukama aturibi xarokëxa, 23 a uni bënákama nikian 'urama okëxunbi ami rëkikin 'ukëmëu nipakëtia xarokëxa.

24 Usa 'ain ka 'apu Nabucodonosornën anua tsókë anuax ratuti bënëtishi nirukin aín kushibu a munuma banakin kakëxa:

—¿Rabë́ 'imainun achúshi uni bënákama a karanuna nëaxun tsinu nikëma 'ain?

—Kixun kakëxun —ka usa ka —kixun atun kakëxa.

25 —'Ën kana rabë́ 'imainun rabë́ uni tëkërëkakëma 'aish tsi rëkirukë nëbë́tsi uisaibi 'ima nitsia isin, usa 'aish ka atu achúshinëx achúshi ángel iskësa 'ikën.

26 Ësai kiküatsini aí ka 'apu Nabucodonosor tsi rëkirukë xëkuë a 'urama oi munuma banai kiakëxa:

—¡Sadrac, Mesac 'imainun Abed-negó, Dios kushiira naínu 'ikë aín unikama anuax chikíküatsini ka ënu ukan! Usakin kakëx ka uni bënákama ax tsi rëkirukë anuax chikíküatsini uakëxa, 27 usai 'ikëbë ka a menu 'ikë 'apukama anua timë́kë ax uisa karaisa a unikama tsin oxa iskatsi kiax atu 'urama rikuatsiankëxa, rikuatsinxun iskinbi ka tsi rëkirukënëan atun nami uisabi okëma iskankëxa, usa 'ikë ka aín bu achúshirabi tsin sarakakëma 'ianan atun pañukë chupabi tsin uisabi okëma 'aish tsin mënukë 'ishakëbi xëkëma 'iakëxa.

28 Usa 'ikë iskëbëshi ka Nabucodonosor munuma banai kiakëxa: “¡Sadrac, Mesac 'imainun Abed-negó akaman Dios ax ka rabikë 'iti 'ikën, an ka aín unikama an ënkinma rabikin 'apux kikë bana tani aín diosma 'ain ami rantinpuruni 'ikëma 'ikëa bamamiti 'aínbi an ië́miti aín ángel xuaxa! 29 Usa 'ain kana bërí 'ëx ësai kin, uinu 'ikë unikamax kara ënë bëná unikaman rabikë Dios ñui 'atimati banaia ax ka tëapakëx ain tëmërakë anunbi bamakë 'iti 'ikën, 'ianan aín xuburibi 'atima okin rurupakë 'ianan, uisa ëmanu 'ikë kara 'imainun uisa banan banakë kara 'ikëbi usakin 'ati 'ikën, an usakin uni ië́miti bëtsi Dios usaribi ka 'aíma ikë kiax 'apu kiakëxa.” 30 Usakin 'atankëxun ka 'apun rabë́ 'imainun achúshi uni bënákama a Babilonia menu 'ikë ëmanua atux raíri 'apu kamasamaira 'inun anëakëxa.