2
Usa 'ain kamina mitsun rarëbakëkama kati 'ain: “Mitsux kamina Diosan unikama 'ain.”'Imainun ka atun chirabakëkamax “Nuibakin kakë 'iti 'ikën.”
Israel unikama Diosan kakësama oi 'ikan ñuikë bana
2 Ësai ka Israel unikama ñui Dios kiaxa:
“¡Mitsun tita kamina min 'uchoti 'ain, ax ka bërí 'ën xanuma 'ikën,
'imainun kana 'ëx aín bënëma 'ain!
¡'Ianan ka aín nami 'akë xanusa 'ikëa unin 'unánkë a ënti 'ikën!
¡'Ianan ka an 'ain nami 'akë unikamabëa 'ikë a ënti 'ikën!
3 Usakin 'aiama kana achúshi uni chupañuma 'ikë usaribi 'itánun atiaira ënti 'ain:
usakin 'akin kana anuan bakë́an nëtë́a 'iásaribitia 'inun 'imiti 'ain,
'imianan kana anu uni 'ikëma mesa 'inun bëtsiokëbë,
aín me ëskinun 'imiti 'ain,
usakin 'akëbë ka shiman bamati 'ikën.
4 Aín tuákama a nuibati kana nitë́xëtima 'ain,
atux ka unían aín tita nami 'akin ami bëchikë tuákamasa 'ikën.
5 Aín titax ka bëtsi bëtsi uni aín nami 'amikë 'iakëxa;
usa 'aínbi ka upí sinánñu xanu 'ikë a nëtë́ti kiakëxa:
Abë 'ëx 'ikë unikama a kana bari kuanti 'ain,
atun ka 'ën piti 'imainun 'umpax,
'ianan 'ën pañuti chupa lino 'akë a 'ianan,
xëni 'imainun a 'ën xëati akama 'ë 'inania.
6 Usa 'ain kana muxan atun bai bëaranan anu bukukë a bëararamikin achúshi kënë 'ati 'ain, usakin 'akëxun ka aín baikama a mëratëkënkantima 'ikën.
7 Usai 'ikin ka 'ain mërati 'ikë unikama nuiti 'ikën,
'aínbi ka nukutima 'ikën;
'ianan ka barikinbi mëratima 'ikën.
Usakin mërakima tani ka kiti 'ikën:
Ax paían 'ën bënë 'ia uni anubi kana kuantëkënti 'ain,
abë kana bërí 'ëx 'ikësamai upiti tsóakën.
8 Aínbi ka xanun 'ëx kana an ñu 'inánkin trigo,
uvas baka vino 'akë xëni akama pishínmikinma 'inánkëxunbi 'ën 'inánkë ka ax 'ikë kixun 'unánma 'ikën;
'ën manë uxua 'imainun kuri akama cha 'inun
'inánkëxunbi ka a rabinuxun ñukama tankin uniokëxa.
9 Usa 'ain kana amiribishi 'ën 'inánkë,
trigo 'imainun 'ën uvas baka vino 'ati,
anun atun ñu 'apákë aín bimi biti nëtë 'ikëbëtan bikuantëkënti 'ain,
'anan kana 'ën anúan rakuti 'inánkë chupa lino 'akë a bianan,
anun mapúti 'inánkë chupa aribi biti 'ain.
10 Aín bënëan achúshi xanu bëtsi bëtsi unibë 'ikë abëa 'ikë unikaman istánun aín chupa
biküanxun mëëkë usaribi okin kana Israel unikama an bëtsi bëtsi dioskama rabikë unikaman istánun 'ati 'ain.
Usakin 'aia ka uínbi usakin kamina 'atima 'ai kixun 'ë katima 'ikën.
11 'Ën kana kuëënkian fiestakama 'akë a 'imainun
'uxë ió 'ikëbëtan akë akama 'ianan anun
ñu mëëtima nëtë́an timë́kë akama këñuan,
kamabi atux a 'ai timë́kë akamaribi këñuti 'ain.
12 Aín uvas 'apákëkama 'imainun higuera,
'apákëkama a ñuia xanu ax ësai kia:
Ënëx ka abë 'ixun bëtsiñu diosmabi rabikë axa 'ëbë 'ikë unikaman 'ë 'inan 'ikë kikë akama kana këñuti 'ain.
Usakin 'akëbëtan ka axa me 'atima 'ikëbëtan anua raëkëma ñuinakaman piti 'ikën.
13 Usa 'ain kana bëráma nëtë inumikin atun bëtsi dioskama rabia a kupín tëmëramiti 'ain,
atun ka bëtsi dioskama a rabikin,
mëñusuti 'imainun aín tëñuti akama
'amiakëxa, usakin 'ai ka bëtsi ñu diosmabi rabi
'ëmi manúkankëxa 'ëx Dios
'aish kana ësai kin, kiax Dios Israel unikama ñui kiakëxa.
Diosan kaisa 'ixun Israel unikama nuiba ñuikë bana
14 'Ën kana Israel unikama mëratiokësa obiankin:
anu uni 'ikëma menu buántënkënti 'ain,
anuxun kana upíokin kakin atu sinánmitëkënti 'ain, kiax ka Dios kiakëxa.
15 Usokin 'atankëxun kana atun 'apá uvakama atu 'inántëkënkin,
me sapan Acor kakë anua 'apákëxa
'itsaira bimiñu 'inun 'imiti 'ain.
Anuxun ka bëná 'ixuan 'asa okin 'anan, anúan
Egiptonuax chikíkë nëtë anun 'asaribiokin 'ë kati 'ikën.
16 Usa 'ain ka anuxun mix kamina 'ën bënë 'ai kixun 'ë kati 'ikin,
kakin ka Baal mix kamina 'ën 'ibu 'ai kixun katima 'ikën.
'Ëx Dios 'aish kana ësai kin.
17 Usakin 'akin kana amiribishi Baal kaman anë ñui banatëkënun 'imitima 'ain,
usakin 'akëx ka uínsaranbi amiribishi aín anë ñui banatëkënkantima 'ikën.
18 Usa 'ain kana 'ën a nëtën Israelkama uisabi oxuma 'anun achúshi ñu ñuina
raëkëma kamabëtan 'akin,
manan nuánkë 'imainun men niríkë runukama abëtan 'ati 'ain.
'Anan kana 'ën unikama upiti bukunun,
ënë menua aín kanti 'imainun aín manë xëtokë,
'ianan 'akanankë aribi këñuti 'ain.
19 'Ën kana Israel unikama 'ën xanusa xënibua
'aínbi 'inun 'imiti 'ain,
usokëx ka asérabi a tanti bana unin ka xanu biti 'ikë 'ëx kia usaibi 'iti 'ikën,
'ën kana a 'itsaira nuibatin.
20 'Ën kana 'ën xanusami mitsux 'ain añu ñubi mitsu 'axuntima 'ain,
usa 'ikë kamina mitsun 'ë
'ëx kana Dios 'ai kixun 'unánti 'ain.
21 'Ëx Dios 'aish kana ësai kin,
a nëtëkaman kana 'ën uni Israelkama
ñukákëxun naínuax 'ibúkian 'uñenën me chabónun 'amiti 'ain;
22 usokin 'akëbë ka trigo,
uvas baka 'imainun xëni akamax
'itsaira 'iti 'ikën, usa 'ikë kana Jezreel kakin atu anëti 'ain.
23 Usa 'ain ka 'ën me 'inánkëx anu tsóti 'ën unikamax 'ënanshi 'iti 'ikën;
usa 'ain kana mi kana nuibatima kixun kakin 'ën Lo-ruhama,
kakin anëkin Israelkama nuibati 'ain, 'imainun kana. Lo-amí 'ën unima kamina 'ai kixun 'ën kakë Israelkama bërí kamina 'ën unikama 'ai kixun kati 'ain,
kakëxun ka atun mix kamina 'ën Dios 'ai kixun 'ë kati 'ikën. Kiax ka Dios kiakëxa.”