Diosan Oseas aín xanu bëtsi bëtsi unibë 'ikë a nuibatëkënun ká bana
3
Ësokin ka Diosan amiribishi 'ë katëkëankëxa:“Min xanu min 'unánkë unibëa 'ikë a kamina nuibatëkënti 'ain.
Ax ka bëtsi bëtsi uni kuëënkë xanu 'ikën.
Usaribi okin kana 'ën kamabi Israel unikama nuibatin,
atúxa bëtsi bëtsi ñu rabikë 'ikëbi, 'imainun ka batokin pán uvas ë́skakë këñun
mëskukin chookin atun dios 'axunkë 'ikëbi pia.
2 Usa 'ain kana Gómer 'ën xanu 'inun bitëkënuxun mapai rabë́ 'imainun mapai achúshi,
manë uxua 'akë kuríkinën kupíokin maruakën 'imainun
kana trescientos treinta litronu 'ikë cebada maruan.
3 Usakin 'axun kana 'ën kan: 'itsa nëtën kamina 'ën xubunu 'ëbë 'iti 'ain;
usa 'ain kamina bërí bëtsi bëtsi uni min nami 'amima 'ianan uni itsibë 'itima 'ain.
Usa 'ain kana 'ënribi anun nun ñu 'ati nëtë 'itámainun uisa ñubi 'atima 'ain, kiax ka kiakëxa.”
4 Usai akama 'ikë 'ain ka Israel unikamax 'itsa baritia 'apuñuma 'ianan atun
kushi kamañumabi 'iti 'ikën,
'ianan ka añu ñubi xaroima 'ianan maxá upíibu akama 'ianan, sacerdotekaman pañukë chupa abi pañuima:
'ianan atun aintsia rabikë ñukama abi rabitima 'ikën.
5 Usai pain ënë ñukama 'ikë 'ain ka
Israelkaman ami sinanatëkënkin,
Nukën 'Ibu Dios rabiti sinántëkënti 'ikën,
'imainun ka atun 'apu 'ia David aín rëbúnki achúshi atun 'apu 'iti 'ikën.
Anuan ënë nëtëkama këñuti a nëtë 'ikëbëtan ka ami rakuë́kin Dios
upíokin a 'akinun kixun ñukáti 'ikën.